Выбрать язык
Книги Ветхого Завета
Книги Нового Завета
с русским текстом1Тушмонэдлы пумит ожмаськыны потӥд ке, отысен валъёсты, ожмаськон уробоосты, тынад сярысь соослэсь тросгес калыксэс адӟид ке, соослэсь эн кышка, уго тонэн ӵош тонэ Египет музъемысь поттӥсь Инмаред Кузё-Инмар луоз.2Ожмаськыны кутскон азяды дорады священник мед лыктоз но калыклы мед вералоз,3тазьы мед шуоз: «Израиль, кылзы! Туннэ тӥ тушмонъёсыныды ожмаськыны кутскиськоды, сюлэмды медаз куалекты, эн кышкалэ, эн куалектэ, соос азьын шимес кышканлы эн сётске,4уго тӥ понна тушмонъёсыныды ожмаськыны, тӥледыз утьыны Инмарды Кузё-Инмар мынэ».
5Эскерись-чакласьёс, калыклы ялыса, тазьы мед шуозы: «Кин выль корка пуктӥз но сое ӧз на ке вӧся на, со мед мыноз, дораз мед бертоз, ожмаськыку быроно медаз луы, мукетыз солэсь выль корказэ медаз вӧся;6кин виноград бакча мерттӥз но отысь емышсэ ӧз на веръя ке, со мед мыноз, дораз мед бертоз, ожмаськыку быроно медаз луы, мукет мурт отысь емышъёссэ веръяса, бичаса медаз улы;7кин нылэз кышнолы басьтыны вераськиз ни но сое кышно ӧз на басьты ке, соку со мед мыноз, дораз мед бертоз, ожмаськыку кулоно-быроно медаз луы, солэсь кышно луонзэ мукет мурт медаз басьты».8Эскерись-чакласьёс калыклы, тазьы шуыса, мед ялозы на: «Кин кышкась, куалекъясь, со мед кошкоз, дораз мед бертоз, агай-вынъёслэсь сюлэмзэс аслаз кадь куалекъясь медаз кары».9Эскерись-чакласьёс ваньзэ тае калыклы веразы ке, соку ожен кивалтӥсь йыръёсты калыклы тӧрое пуктылоно.
10Городэз киултыны лыктӥд ке, отын улӥсьёсты сётӥськыны кур;11соос тыныд сётӥськыны соглаш луизы ке, капказэс усьтӥзы ке, отын улӥсь вань калык тыныд выт тырыса улоз, тыныд ужаса-тыршыса улоз;12нош соос тыныд сётӥськыны соглаш ӧз ке луэ, тонэн ожмаськыса улыны кутскизы ке, со городэз котыртыса возь,13нош Инмаред Кузё-Инмар со городэз тынад киулад сётӥз ке, лэчыт меченыд отысь вань пиосты-пиосмуртъёсты виылы;14нош кышноосты, нылпиосты, пудо-животэз, городысь кыӵе ваньбур люкады, ваньзэ аслыд басьты, Инмаредлэсь Кузё-Инмарлэсь тон киулэ сётэм тушмонъёсыдлэсь ваньбурзэс асьтэлы каре;15тӥлесьтыд кыдёкын сылӥсь вань городъёслы но тазьы ик кар, соос татысь калыкъёслэн городъёссы пӧлысь ӧвӧл ке но.16Нош Инмаредлэн Кузё-Инмарлэн тынад киулад сётэм татысь калыкъёслэн городъёсысьтызы одӥг лулэз но улэп эн кельты,17соосты каргаса быдты: хеттейёсты, аморрейёсты, хананейёсты, ферезейёсты, евейёсты, иевусейёсты, [гергесейёсты,] Инмаредлэсь Кузё-Инмарлэсь тыныд сётэм косонзэ быдэстыса ул,18соос тӥледыз асьсэлэн инмаръёссылы лэсьтӥськись юрӟымесь ужъёссылы медаз дышетэ, Инмарды Кузё-Инмар азьын сьӧлыкаса медад улэ шуыса.
19Кема дыр ӵоже городэз киултон вылысь котыртыса возид ке но, котырысьтыз писпуосты эн кора, соослэн емышенызы кӧттэ тырыны быгатод, город котырез тырттэм эн кельты, уго бусыысь писпу адями ӧвӧл, со уг быгаты тынэсьтыд город пушкы пырыса ватӥськыны;20тодӥськод ке, та писпуос сиён сётӥсьтэмесь шуыса, соку быгатӥськод ини соосты кораны, погыръяны, тонэн ожмаськись городлы пумит сое вормытозядлы со коръёслэсь ожмаськыны юрттӥсь юнматэм борддоръёс ӝут.
Глава 20