Выбрать язык
Книги Ветхого Завета
Книги Нового Завета
с русским текстом1Инмаредлэн Кузё-Инмарлэн тыныд сётоно музъем вылаз улӥсь калыкъёсты Инмаред Кузё-Инмар быдтӥз ке, соос бере со музъемез киулад басьтӥд ке, соослэн городъёсазы, коркаосазы улыны интыяськид ке,2соку Инмаредлэн Кузё-Инмарлэн тынад киулад сётэм музъем вылысьтыз аслыд куинь городъёсты висъя;3аслыд сюрес лэсьты но Инмаредлэсь Кузё-Инмарлэсь тынад киулад сётоно музъемез быдэсаксэ куинь люкетлы люк; адями виисьёслы соос ватӥськон-пегӟон инты луозы.4Тани адями виисьёс пӧлысь кыӵеез отчы ватӥськыса улэп кыльыны быгатоз: кин матысьсэ янгышен вииз ке, кин солы толон но, толон валлян но тушмон ӧй ке вал;5кин матысь муртэныз нюлэскы пу кораны мыноз но, тӥрзэ вылэ ӝутыса, сэзъялскоз писпуэз погыртон вылысь, соку тӥр ныдысь корт палдыса матысез вылэ усёз, – соиз кулӥз ке, соку та мурт улэп кыльыны мед быгатоз шуыса, та городъёс пӧлысь одӥгаз мед ватскоз,6вир понна пунэмзэ берыктӥсь пӧсекъяса со сьӧры медаз уйиськы но, пегӟон-ватӥськон интые мынон сюрес кузь ке, та адями виисез сутыса медаз виы, нош та адями виисез виыны кулэ ӧвӧл, уго та кулэм муртлы со толон но, толон валлян но тушмон ӧй вал;7со понна ик уго мон тыныд таӵе косон сётыса шуи: «Аслыд куинь городъёсты висъя».
8Нош куке Инмаред Кузё-Инмар улоно музъемдэ паськытатӥз ке, кызьы Со атайёсыдлы кыл сётыса вераз, атайёсыдлы сӥзем музъемез быдэссэ тыныд сётӥз ке,9туннэ тыныд сётэм вань та курон-косонъёсты быдэсъяса улыны тыршид ке, Инмардэ Кузё-Инмарез яратыса улӥд ке, вань улоно нуналъёсыд ӵоже Солэн возьматэм сюрес вылтӥз ветлӥд ке, – соку та куинь городъёс борды эшшо куинь городъёсты ватса на,10Инмаредлэн Кузё-Инмарлэн тыныд люкетлы сётэм музъем вылаз янгыштэм муртлэн вирыз медаз кисьтӥськы, вир кисьтон [сьӧлыкез] вылад басьтоно медад луы.
11Нош [тӥ дорын] кин ке но матысезлы тушмон луиз ке, сое лушкемен возьмаса улыны кутскиз ке, со вылэ урдскыса вииз ке, собере та городъёс пӧлысь одӥгаз пегӟиз ке,12соку со муртлэн городысьтыз тӧроос сое кутыса вайыны адямиосты мед ыстозы но вир понна пунэм берыктӥсьлэн киулаз мед сётозы, со мед кулоз;13синмыд сое медаз жаля; янгыштэм муртлэсь кисьтӥськем вирзэ Израиль вылысь ӵуш, соку тыныд умой луоз.
14Инмаредлэн Кузё-Инмарлэн тынад киулад сётэм музъемысьтыз тыныд люкетлы сюрем музъемлэсь но матыседлэн музъемез вискы вашкала атайёслэсь пуктэм межазэс-йыранзэс эн сӧры.
15Кыӵе ке янгыш ужез, йыружез, сьӧлык лэсьтэмез судын сэрттыку-пертчыку, кинэ ке янгыше уськытон понна одӥг адӟисьлэн ивортэмез тырмыт уг луы: кык яке куинь адӟисьёслэн огкадь верамзыя гинэ [котькыӵе] суд ужез быдэстыны луэ.
16Шонертэм верась кинлы ке пумит адӟись кариськыса вераськиз ке, йыруж лэсьтэ шуыса, янгыше уськытӥз ке,17соку та ченгешись муртъёс кыкназы ик Кузё-Инмар азе, священникъёс азе, со нуналэ ужась судьяос азе мед султозы;18судьяос пыр-поч эскерыны-чакланы кулэ: адӟись-верась ӧрекчаськись мурт ке, братэз вылэ ӧвӧлтэмзэ вань карыса вераз ке,19соку солы лэсьтэ сое, мар со братэзлы лэсьтыны малпаз вал; озьы ас пӧлысьтыд уродэз-лекез быдты;20мукетъёс соку кылозы но кышкатскозы, азьланяз тон пӧлын таӵе уродэз-лекез уз ни лэсьтэ;21тынад синмыд [сое] медаз жаля: лул понна лул, син понна син, пинь понна пинь, ки понна ки, пыд понна пыд. [Матысь муртэзлы кин кыӵе изъян лэсьтӥз, сыӵе изъянэныз ик солы пунэмзэ берыктоно.]
Глава 19