Выбрать язык
Книги Ветхого Завета
Книги Нового Завета
с русским текстом1Левит священникъёслы, Левий выжыысь одӥг муртлы но Израильын люкет музъем уз сётӥськы: соос Кузё-Инмарлы ваем курбонъёсын, салам-кузьымъёсын кӧтсэс тырыса улыны кулэ;2агай-вынъёсыз пӧлын Левий выжылэн люкетэз уз луы: Кузё-Инмар Ачиз – солэн люкетэз, кызьы Со вераз вал солы.
3Тани калык курбонлы ваем ошъёсызлэсь, ыжъёсызлэсь священникъёслы мар сётыны кулэ: пельпумзэс, анзэс, ӝушсэз;4озьы ик нырысь вуэм ю-няньдэ, выль винадэ, выль вӧйдэ, нырысь ӵышкем ыжгондэ священниклы сёт,5уго вань израиль выжыос пӧлысь Левий выжыез тынад Инмаред Кузё-Инмар бырйиз, со [Инмаредлэн Кузё-Инмарлэн азяз] мед сылоз, мед ужалоз-тыршоз, Кузё-Инмарлэн нимыныз [бакель мед кароз] со ачиз но, солэн пиосыз но вань дауръёс ӵоже.
6Кудысьтыз ке но улоно интыысьтыды, Израиль [пиослэн] музъемысьтызы левит лыктӥз ке, лулызлэн-сюлмызлэн куремезъя Кузё-Инмарлэн быръем интыяз лыктӥз ке,7Инмарезлэн Кузё-Инмарлэн нимыз понна ужаса-тыршыса улӥз ке, Кузё-Инмар азьын сылӥсь вань левит агай-вынъёсыз сямен ик, –8соосын одӥг мында со сиён-юон басьтыны кулэ, атаезлэсь юртъерзэ вузаса поттэм ваньбур люкетэз солэн кияз кылемын ке но.
9Инмаредлэн Кузё-Инмарлэн сётэм музъемаз пырид ке, соку татын улэм калыкъёслэсь юрӟым ужъёссэс лэсьтыны эн дышетскы:10тон дорын луыны кулэ ӧвӧл пизэ я нылзэ тыл вамен поттась, азьпалзэ тунаса верась, туно, пелляськись, ведӥн мурт,11пелляськон кылъёс верась, урод духъёсын кусып возись, син пӧртмась, кулэмлэсь духсэ ӧтьылӥсь;12уго таӵе ужъёсын вырись котькудӥз адями Кузё-Инмарлы юрӟым потэ, таӵе юрӟым-кырсь ужъёс понна Инмаред Кузё-Инмар со калыкъёсты тынад азьысьтыд улля;13Инмаред Кузё-Инмар азьын дун-шектэм лу;14уго тынад улляно калыкъёсыд туноослэсь, пелляськисьёслэсь верамзэс кылзо, нош тынад Инмаред Кузё-Инмар тыныд таӵе ужъёсын вырыны ӧз лэзьы.
15Инмаред Кузё-Инмар тон пӧлысь, агай-вынъёсыд пӧлысь, монэ кадь ик Пророкез ӝутоз, – Солэсь верамзэ кабыл басьтэ, –16тон ачид уго Хорив гурезь выжые люкаськон нуналэ Инмаредлэсь Кузё-Инмарлэсь курид но тазьы шуид: «Медам кулы шуыса, азьланяз Инмарелэсь Кузё-Инмарлэсь куаразэ медам ни кылы, та быдӟым тылэз но азьланяз медам ни адӟы».17Соку Кузё-Инмар мыным шуиз: «Умой соиз, мар соос [тыныд] веразы;18соослы Мон агай-вынъёссы пӧлысь тыныд укшасьсэ Пророкез ӝуто но Солэн кылаз-ымаз Аслэсьтым кылъёсме поно, соослы Со вералоз ваньзэ, мар Мон Солы вераны косо;19нош кин Мынэсьтым верам кылъёсме кабыл ӧз ке басьты, кудъёссэ [со Пророк] Мынам нимыным вералоз, со муртлэсь Мон кылзэ юало;20нош кыӵе ке пророк Мынэсьтым вераны косымтэме Мынам нимыным вераны дӥсьтӥз ке, яке мурт инмаръёслэн нимынызы вералляз ке, сыӵе пророкез вие».
21Сюлэм пушкад шуид ке: «Кузё-Инмарлэсь верамтэ кылзэ кызьы тодмаломы?»22Кузё-Инмарлэн нимыныз пророк вераз ке, нош верам кылыз ӧз ке быдэсмы, ӧз ке пӧрмы, соку тод: та кылъёсты Кузё-Инмар ӧз вера, со кылъёсты Инмарлэсь кышкасьтэм пророк вераз, – солэсь эн кышка.
Глава 18