Выбрать язык
Книги Ветхого Завета
Книги Нового Завета
с русским текстом1Ошедлэн яке ыжедлэн мугор вылаз шекез вань ке, яке солэн мугор вылаз маке но уродэз вань ке, сыӵе пудоез Инмаредлы Кузё-Инмарлы курбонлы эн вайы, уго та Инмаред Кузё-Инмар понна юрӟым.
2Инмаредлэн Кузё-Инмарлэн тыныд сётэм музъем вылысьтыз кудаз ке но улон интыяд пиосмурт яке кышномурт Инмаред Кузё-Инмар азьын кыӵе ке но йӧнтэм уж лэсьтӥз ке, Солэсь сӥзён-косонзэ сӧриз ке,3мыноз но мурт инмаръёслы ужаны-тыршыны кутскиз ке, соослы йыбырттӥз ке, яке шундылы, яке толэзьлы, яке вань ин кужымъёслы йыбырттӥз ке, озьы мынэсьтым косымтэ ужме лэсьтӥз ке,4со сярысь тыныд ивортӥзы ке, со уж сярысь кылӥд ке, соку тон пыр-поч эскеры-чакла: зэмзэ ик со луэмын ке, та юрӟым уж Израильын лэсьтэмын ке,5со йӧнтэм ужез лэсьтӥсь пиосмуртэз яке кышномуртэз капка дорад потты но вылазы изъёсын зӥръяса ви.
6Кык яке куинь адӟись муртъёслэн ивортэмзыя адямиез виыны луэ, нош одӥг адӟись муртлэн ивортэмезъя виыны уг яра.7Адӟись муртъёс виёно мурт вылэ нырысь кизэс вуттыны кулэ, нош мукетъёсыз – таос бере кизэс мед вуттозы; озьы ас пӧлысьтыд уродэз-лекез быдты.
8Вир кисьтонэн вир кисьтон вискын, суд ужен суд уж вискын, жугиськонэн жугиськон вискын со уж пумысен шонер суд лэсьтыны тыныд секыт йӧтӥз ке, капка дорад та пумысен пӧртэм пумо малпанъёс луизы ке, соку султы но Инмаредлэн Кузё-Инмарлэн быръем интыяз [Солэн нимызлы вазиськон интые] мын,9левит священникъёс, со нуналъёсы отын улӥсь судья доры мын но соослэсь юа, соос тыныд вералозы, кызьы-мар карыны кулэ;10[Инмаредлэн] Кузё-Инмарлэн быръем интыяз, [Солэн нимызлы вазиськон интыын], мар соос тыныд вералозы, верам кылзыя лэсьты, марлы соос тонэ дышетозы, тыршы ваньзэ сое быдэсъяса улыны.11Соослэн тонэ дышетэм законзыя, соослэн тыныд верам пуктон-косонзыя ваньзэ лэсьты, мар соос тыныд вералозы, солэн сьӧраз – бурпалаз но, паллян палаз но – эн кожылы.12Нош кин таӵе йӧнтэм ужез лэсьтӥз ке: Инмаред Кузё-Инмар азьын ужась-тыршись священниклэсь яке [со нуналъёсы отын улӥсь] судьялэсь верамзэ ӧз ке быдэсты, со муртэ виыны кулэ, – тазьы Израиль бордысь уродлыкез быдты;13вань калык кылоз но кышкатскоз, азьланяз озьы йӧнтэм ужъёс лэсьтыса уз ни улы.
14Инмаредлэн Кузё-Инмарлэн сётоно музъемаз вуид ке, сое киулад басьтӥд ке, отчы улыны интыяськид ке, шуод: «Котырысьтым мукет калыкъёс сямен ик аслым эксэй пукто»,15Инмаредлэсь Кузё-Инмарлэсь быръем муртсэ аслыд эксэй пукты; аслад агай-вынъёсыд пӧлысь эксэй бырйы; агай-вын луисьтэм мурт калык пӧлысь потэмез аслыд [эксэй] бырйыны уд быгатӥськы.16Только со укыр трос валъёс медаз возьы, валъёсты йылэтон понна со калыкез берен Египетэ медаз келя, уго Кузё-Инмар тӥледлы шуиз: «Та сюрес вылтӥ берен эн ни берытске»;17эксэйлэн укыр трос кышноосыз луыны кулэ ӧвӧл, – сюлмыз соин медаз сӧриськы; азвесьсэ но, зарнизэ но укыр медаз йылэты.18Эксэй пукон вылэ со пуксиз ке, левит священникъёс киын возиськись законэн книгаысь кылъёсты аслаз книгаяз со гожъяны кулэ.19Та книгазэ со ас дораз возьыны, вань улоно нуналъёсыз ӵоже лыдӟыса улыны кулэ, соя со Инмарезлэсь Кузё-Инмарлэсь кышканэн улыны мед дышетскоз, со законысь вань кылъёсты, вань пуктон-косонъёсты но быдэсъяса улыны мед тыршоз;20агай-вынъёсыз азьын сюлмыз вылтӥяськыса медаз улы, законлэсь бурпала но, паллян пала но медаз палэнскы, озьы улыса, со ачиз но, пиосыз но кема аръёс ӵоже Израилен кивалтыса мед улозы.
Глава 17