Выбрать язык
Книги Ветхого Завета
Книги Нового Завета
с русским текстом1Моисей израиль [пиослэн] тӧроосынызы ӵош калыклы таӵе косон сётыса шуизы: «Туннэ ивортэм вань курон-косонъёсты быдэсъяса улыны тӥледыз косӥсько.2Иордан тупала, Инмаредлэн Кузё-Инмарлэн тыныд сётэм музъем вылаз, выжид ке, соку аслыд бадӟымесь изъёс пукты но соосты избурен зыра;3со [изъёс] борды та законысь вань кылъёсты гожъя; [Иордан] тупала выжемед бере ик, Инмаредлэн Кузё-Инмарлэн тыныд сётэм йӧлын чечыен бызись музъемаз пырем берад ик, та ужез лэсьты, кызьы тыныд вераз вал вашкала атайёсыдлэн Инмарзы Кузё-Инмар.
4Иордан тупала выжиды ке, туннэ верам косонме быдэстыса, Гевал гурезе изъёс пуктэ но избурен соосты буялэ.5Отчы Инмаредлы Кузё-Инмарлы курбон сётон ӝӧк лэсьты, курбон сётон ӝӧкез изъёслэсь ӝут, соос борды корт арбериос медаз йӧтӥське;6Инмаредлы Кузё-Инмарлы курбон сётон ӝӧкез пильылымтэ быдэс изъёслэсь лэсьты, со вылын Инмаредлы Кузё-Инмарлы тылын сутӥськись курбонъёс сётылы,7тупаса улонлы сӥзем курбонъёс сётылы, отын [кӧтыд тырымон] си, Инмаред Кузё-Инмар азьын шулдыръяськы;8[та] изъёс вылэ законысь вань кылъёсты адӟиськымон, лыдӟыны луымон гожъя».
9Моисей левит священникъёсын ӵош вань израиль калыклы тазьы шуизы: «Пеляд пон, кылзы, Израиль: та нуналысен тон Инмаредлэн Кузё-Инмарлэн калыкез луид;10озьыен, кылзы Инмаредлэсь Кузё-Инмарлэсь верам кылзэ, Солэсь [вань] курон-косонъёссэ быдэсъя, Солэсь пуктон-косонъёссэ быдэсъя, соосты мон тыныд али верасько».
11Со нуналэ Моисей калыклы таӵе косонъёс сётыса шуиз:12«Иордан тупала выжиды ке, Симеон, Левий, Иуда, Иссахар, Иосиф, Вениамин выжыос Гаризим гурезь йылэ мед султозы но калыкез бакель мед карозы.13Нош Рувим, Гад, Асир, Завулон, Дан, Неффалим выжыос Гевал гурезь йылэ мед султозы но карган кылъёс мед вералозы.
14Левитъёс бадӟым куараен вань израиль калыклы тазьы мед шуозы:15”Кузё-Инмар азьын юрӟым макеез – киын вӧлыса яке ӵыжатыса сульдэрез-идолэз – лэсьтӥсь, сое лушкем интыын пуктыса возись мурт каргамын!” Вань калык, бадӟым куаразэ поттыса, мед шуоз: ”Аминь!”
16”Аслаз атаез яке анаез сярысь урод кылъёс верась мурт каргамын!” Вань калык мед шуоз: ”Аминь!”
17”Матысь муртэзлэсь йыранзэ-межазэ интыысьтыз вырӟытӥсь мурт каргамын!” Соку вань калык мед шуоз: ”Аминь”.
18”Синтэм муртэ кырыж сюрес вылэ келясь мурт каргамын!” Соку вань калык мед шуоз: ”Аминь”.
19”Сьӧрлось вуэм муртэ, анайтэм-атайтэм нылпиез, палкышноез шонертэм судить карись мурт каргамын!” Соку вань калык мед шуоз: ”Аминь”.
20”Атаезлэн кышноеныз артэ выдэм мурт каргамын, аслаз атаезлэсь дӥськут сӧзызэ ӝутӥз ук!” Соку вань калык мед шуоз: ”Аминь”.
21”Пудоен-животэн артэ выдэм мурт каргамын!” Соку вань калык мед шуоз: ”Аминь”.
22”Аслаз сузэреныз, атаезлэн нылыныз, анаезлэн нылыныз артэ выдэм мурт каргамын!” Соку вань калык мед шуоз: ”Аминь”.
23”Вармуминыз выдэм мурт каргамын!” Соку вань калык мед шуоз: ”Аминь”. [”Кышноезлэн сузэреныз выдэм мурт каргамын!” Соку вань калык мед шуоз: ”Аминь”.]
24”Матысь муртсэ лушкемен виись каргамын!” Соку вань калык мед шуоз: ”Аминь”.
25”Адями лулэз уксёен быдтӥсь, янгыштэм вирез дун тырыса кисьтӥсь каргамын!” Соку вань калык мед шуоз: ”Аминь”.
26”Та законлэсь [вань] кылъёссэ быдэсъясьтэм, соосъя улӥсьтэм [котькудӥз адями] каргамын!” Соку вань калык мед шуоз: ”Аминь”».
Глава 27