Выбрать язык
Книги Ветхого Завета
Книги Нового Завета
с русским текстом1Инмаредлэн Кузё-Инмарлэн тыныд люкетлы сётэм музъемаз вуиды ке, сое киулады басьтыса, отчы улыны интыяськиды ке,2Инмаредлэн Кузё-Инмарлэн тыныд люкетлы сётэм музъем вылысьтыз нырысь будэм вань емышъёсыдлэсь люкетсэс мушкояд тыр но Инмаредлэн Кузё-Инмарлэн Аслаз нимызлы улон интылы быръем азе мын;3со нуналъёсы отын улӥсь священник доры лыктыса шу: «Туннэ мон Инмаред Кузё-Инмар азьын танытэк верасько: Кузё-Инмарлэн атайёсмылы верам милемлы сётыны сӥзем музъемаз мон пыри».4Священник тынад киысьтыд мушкоез басьтоз но Инмаредлэн Кузё-Инмарлэн курбон сётон ӝӧк азяз сое пуктоз.5Нош тон Инмаред Кузё-Инмар азьын тазьы шу: «Мынам атае пыдйылчи арамей пи вал, Египетэ мыныса, отчы улыны интыяськиз, бордаз трос ик калыкез ӧй вал, нош отысен со бордысь быдӟым, кужмо, трос лыдо калык потӥз;6нош египет калык милемын ассэ урод возиз, ӝикатыса-ёртыса возизы, секытэсь ужъёсты ужатыса возизы;7соку ми атайёсмылэн Инмарзылы Кузё-Инмарлы тэльмырыса вазиськимы но, Кузё-Инмар кылӥз милесьтым тэльмырыса вазиськеммес, адӟиз шугадӟонъёсмес, ужам-тыршеммес, милемыз ултӥяса возёнэз;8соку Кузё-Инмар милемыз Египетысь поттӥз [Аслаз быдӟым кужыменыз,] кужмо киыныз, юн суйбыгытэныз, быдӟымесь кышкатонъёсын, паймымон тодметъёсын, ужъёсын,9Со милемыз вайиз та интые, та музъемез – йӧлын, чечыен бызись музъемез – милемлы сётӥз;10тани, мон табере, Кузё-Инмаре, мыным сётэм музъемысьтыд нырысь вуэм-кисьмам емышъёсме Тыныд вайи [йӧлын, чечыен бызись музъем вылысь]». Тае тон Инмаред Кузё-Инмар азе пукты но Инмаред Кузё-Инмар азе йыбыртты,11Инмаредлэн Кузё-Инмарлэн тыныд, тынад юртэдлы-семьяедлы сётэм вань ӟечлыкъёсыз понна левитэн ӵош, дорады улӥсь сьӧрлось вуэм муртэн ӵош шумпот-шулдыръяськы.
12Куинетӥ аре, дасэтӥ люкетэз сётон аре, вань будэтэм емышед пӧлысь дасэтӥ люкетсэ левитлы, сьӧрлось вуэм муртлы, анайтэм-атайтэм нылпилы, палкышнолы висъяд ке, соос тынад улон интыяд кӧтсэс тырытозь сиыса мед улозы,13соку Инмаред Кузё-Инмар азьын тазьы шу: «[Аслам] коркасьтым сётоно святой люкетме басьтӥ но сое левитлы сётӥ, сьӧрлось лыктэм муртлы, анайтэм-атайтэм нылпилы, палкышнолы сётӥ – ваньзэ Тынад косонъёсыдъя, Тынад монэ быдэстыны сӥземедъя лэсьтӥ: Тынад курон-косонъёсыдлэн сьӧразы ӧй поты, соосты ӧй вунэты;14бӧрдыса улыкум, святынялэсь люкетсэ ӧй сиы, кырсь дыръям сое ӧй люкылы, кулэм муртлы солэсь люкетсэ ӧй сётылы; Инмарелэсь Кузё-Инмарлэсь верам кылзэ кабыл басьтылӥ, мае Тон монэ быдэсъяны косӥд, ваньзэ сое мон быдэсъяй;15Аслад святой улон интыысеныд, инмысен, учкы но Аслэсьтыд калыктэ, Израилез, милемлы сётэм музъемдэ но бакель кар, уго Тон йӧлын чечыен бызись музъемез [милемлы сётыны] атайёсмы азьын кыл сётӥд».
16Туннэ Инмарды Кузё-Инмар [вань] та пуктон-косонъёсты но законъёсты быдэсъяны косэ: вань сюлэмдэ поныса, вань лулдэ поныса чакла-уть, быдэсъя соосты.17Кузё-Инмарлы тон туннэ шуид, Со тынад Инмаред луоз, Солэн возьматэм сюресъёсыз кузя ветлод, Солэсь пуктон-косонъёссэ быдэсъялод, Солэсь курон-косонъёссэ, законъёссэ утьыса улод, Солэсь верам кылъёссэ санэ поныса улод, тон шуид;18Кузё-Инмарлэсь вань курон-косонъёссэ быдэсъяд ке, тон Солэн калыкез луод шуыса, туннэ Со тыныд кыл сётӥз – кызьы Со тыныд азьвыл ик вераз вал,19вань кылдытэм калыкъёсызлэсь Со тонэ вылӥе пуктоз, шуиз, сӥё-сано, данлыко, быдӟымлыко кароз, Инмаред Кузё-Инмар азьын, кызьы Со вераз, тон святой калык луод.
Глава 26