Выбрать язык
Книги Ветхого Завета
Книги Нового Завета
с русским текстом1Хорив гурезьын Кузё-Инмарлэн сётэм сӥзён-косонэз сяна, тани таиз Кузё-Инмарлэн Моисей пыр израиль пиосын кусып кылдытон понна Моав музъемын сётэм сӥзён-косонэзлэн кылъёсыз луо.
2Соку Моисей вань израиль [пиосты] котыраз люкатӥз но соослы шуиз: «Тӥ ваньзэ адӟиды, тӥляд син азяды Египет музъемысен Кузё-Инмар фараонэн но солэн вань ляльчиосыныз, солэн быдэс музъеменыз мар кариз:3тон ас синмыныд адӟид со быдӟымесь вӧсь каронъёсты, со быдӟымесь паймымон тодметъёсты, паймымон ужъёсты, [кужмо киез, юн суйбыгытэз];4но туннэ нуналозь [Инмар] Кузё-Инмар тӥледлы валаны сюлэм ӧз сёты, адӟыны син ӧз сёты, кылыны пель ӧз сёты.
5Ньыльдон ар ӵоже Со тӥледыз луоё кыр дуннеетӥ нуллӥз, вылысьтыды дӥськутты но ӧз пӧсьты, пыдкукты но ӧз сурыкмы;6тӥ нянь ӧд сие, вина но, сӥкера но ӧд юэ, мед тододы, Мон тӥляд Инмарды Кузё-Инмар луисько шуыса.
7Та интые вуэм берады Есевонлэн Сӥгон эксэез, Васанлэн Ог эксэез асьме вылэ ожмаськыны урдскизы, но асьмеос соосты погыртӥмы;8соослэсь музъемзэс кутӥмы но Рувим выжылы, Гад выжылы, Манассиялэн ӝыны выжыезлы люкетлы сётӥмы.9Та сӥзён-косонысь [вань] кылъёсты уте, соосты вань лэсьтоно ужъёсады азинлыкез мед луоз шуыса быдэсъялэ.
10Туннэ тӥ ваньды Инмардылэн Кузё-Инмарлэн син азяз сылӥськоды – выжыостылэн кивалтӥсьёссы, тӧроосты, [судьяосты,] эскерись-чакласьёсты – вань израиль воргоронъёс,11нылпиосты но, кышноосты но, сьӧрлось лыктэм муртъёсыд но станын улӥсьёс – пу корась бордысен кутскыса вудэ омыръясь дорозь,12татын сылӥськод Инмареныд Кузё-Инмарен сӥзён-косон пыр кусып кылдытон понна, туннэ Инмареныд Кузё-Инмарен сётэм сӥзён-косонэз утьыса-быдэсъяса улыны кыл сётон понна,13озьы Со туннэ тонэ Аслыз калык кароз, нош Со тыныд Инмар луоз, кызьы Со тыныд азьвыл ик вераз, кызьы Со тынад атайёсыдлы Авраамлы, Исааклы, Иаковлы кыл сётӥз.14-15Тӥледлы, Инмармы Кузё-Инмар азьын али сылӥсьёслы гинэ, та сӥзён-косонэз, кыл сётоно договорез уг сётӥськы, сое сётӥсько соослы но, кинъёс али асьме пӧлын ӧвӧл.
16Тӥ тодӥськоды ук, кызьы ми Египет музъемын улӥмы, кызьы мукет калыкъёс пӧлтӥ потыса кошкимы,17соослэсь юрӟым макеоссэс адӟимы, соос дорын возиськись пулэсь, излэсь, азвесьлэсь, зарнилэсь лэсьтэм сульдэръёссэс-идолъёссэс адӟимы.18Тӥ пӧлын медаз луэ Инмармылэсь Кузё-Инмарлэсь сюлмынызы палэнскемъёс, мурт калыкъёслэн инмаръёссылы йыбыртъяны кутскем пиосмуртъёс, кышномуртъёс, выжыос, улыос-бечеос, тӥляд пӧлады медаз луы ядэн курытпот будэтӥсь будос выжы,19карган кылъёсты кылыса, сюлмыныз ушъяськыса тазьы шуись мурт но медаз луы: ”Мон шудо луо, вог сюлмылэн курем-косэмезъя улӥ ке но”; тазьы луиз ке, соку тыр улӥсь мурт сютэм муртэн ӵош кулоз;20таӵе адямиез Кузё-Инмар простить уз кары, соку ик Кузё-Инмарлэн йыркурез, вожпотонэз таӵе адями вылэ ӝуатске, та [закон] книгаын гожтэм [сӥзён-косонлэн] вань карганэз таӵе адями вылэ усёз, солэсь нимзэ Кузё-Инмар ин улын улӥсь калыкъёс пӧлысь ӵушоз;21вань израиль выжыос пӧлысь Кузё-Инмар та адямиез быдтыны висъялоз, та закон книгаын гожтэм сӥзён-косонлэсь вань карганъёссэ со вылэ лэзёз.
22Вуоно выжы, тӥляд бӧрсяды улоно нылпиосты, кыдёкысь музъемысь вуэм сьӧр мурт Кузё-Инмарлэсь та музъемез куашкатэмзэ, сое курадӟытыны лэзем висёнъёссэ адӟыса, тазьы шуоз:23”Ӵуждари но сылал, быдэс музъем – ӝуам-сутскем бервыл; отчы уг но кизё ни, со вылэ турын-куар но уг ни буды, туж вожзэ поттыса, бадӟым йыркурен Кузё-Инмарлэн Содомез, Гоморраез, Адмаез, Севоимез куашкатэм бервылаз кызьы номыр но уг ни буды, татын но озьы ик луоз”.24Соку вань калыкъёс шуозы: ”Мар понна Кузё-Инмар та музъемез тазьы кариз? Макем бадӟым Солэн вожпотонэзлэн лекез!”25Соку шуозы: ”Атайёссылэн Инмарзылэсь Кузё-Инмарлэсь, Египет музъемысь соосты поттыкуз, соосын сӥзён-косон пыр кылдытэм кусыпсэ кулэтэм каремзы понна,26мукет инмаръёслы ужаны-тыршыны, йыбыртъяны мынэмзы понна, со инмаръёсты соос уг но тодо вал, соослы йыбыртъяса улыны но Кузё-Инмар ӧз косы вал:27со понна та музъемлы Кузё-Инмарлэн йыркурез ӝуатскиз но та [закон] книгаын гожтэм [сӥзён-косонлэсь] вань карганъёссэ Со та музъем вылэ лэзиз,28туж вожез потыса, йыркурен, лекъяськыса, кызьы али асьмеос адӟиськомы, Кузё-Инмар соосты музъем вылысьтызы мурт музъем вылэ улляз”.
29Ватӥськыса улӥсез – Инмармы Кузё-Инмар киын, нош усьтӥськыса улӥсез асьмелы, асьмелэн нылпиосмылы пумтэм вапумъёс ӵожелы сётэмын, та законлэсь вань кылъёссэ быдэсъяса мед уломы шуыса».
Глава 29