Выбрать язык
Книги Ветхого Завета
Книги Нового Завета
с русским текстом1Тыныд верам вань та кылъёсы – бакель карон но, карган но – тон доры вуизы ке, тон соосты сюлмыныд кабыл басьтӥд ке, Инмаредлэн Кузё-Инмарлэн тонэ мурт калыкъёс пӧлы улыны пазьгыса лэзем бераз2Инмаред Кузё-Инмар пала берытскид ке, Солэсь верамзэ, мынэсьтым тыныд али сётэм косонъёсме, кабыл басьтӥд ке, тон но, нылпиосыд но сюлмыныды, лулыныды соосты быдэсъяса улӥды ке,3соку Инмаред Кузё-Инмар пленэ шедемъёстэ берыктоз, тонэ жалялоз но нош ик пазьгыса улыны лэзем вань калыкъёс пӧлысь израиль калыксэ Инмаред Кузё-Инмар Ас бордаз люкалоз.4Инлэн [огпал пумысеныз мукет пал] пумозяз тон пазьгемын ке но луысалыд, отысь но тонэ Инмаред Кузё-Инмар ваёз, отысь но Со тонэ басьтоз,5[отысь] тонэ Инмаред Кузё-Инмар атайёсыдлэн киулазы возем музъемазы ваёз, со музъемез ас киулад басьтод, Кузё-Инмар тыныд ӟечлык сётоз, атайёсыдлэсь но трослыгес тонэ йылэтоз;6Инмаред Кузё-Инмар сюлмыдлэсь вог сямзэ вандыса басьтоз, тон бере вордскем выжыедлэсь но сюлэмзэ тэрытскись-кылзӥськись кароз, тон вань сюлмыныд, вань лулыныд Инмардэ Кузё-Инмарез мед яратод, кема мед улод шуыса;7соку Инмаред Кузё-Инмар вань та карганъёсты тонэ уллясь, тонэ адӟемпотостэм карись тушмонъёсыд вылэ берыктоз,8нош тон [Инмаред] Кузё-Инмар пала берытскод, Солэсь верам кылъёссэ пеляд понод, Солэсь вань курон-косонъёссэ быдэсъяса улод, кудъёссэ мон туннэ тыныд иворто;9Инмаред Кузё-Инмар тыныд ас киыныд быдэсъяно вань ужъёсад, кидыстэ-выжыдэ йылэтыны, пудо вордыны, ю-нянь, емыш будэтыны пачыл азинлык сётоз, уго [Инмаред] Кузё-Инмар тыныд ӟеч карылоз, тон понна нош ик шумпотыса улоз, кызьы Со атайёсыд понна шумпотылӥз,10озьы луоз, Инмаредлэсь Кузё-Инмарлэсь верам кылъёссэ санэ поныса улӥд ке, Солэсь та закон книгае гожтэм [вань] курон-косонъёссэ, пуктон-косонъёссэ, [законъёссэ] утьыса, [быдэсъяса] улӥд ке, Инмаред Кузё-Инмар пала вань сюлмыныд, вань лулыныд берытскид ке.
11Туннэ тыныд быдэсъяса улыны сётэм курон-косон тон понна валантэм луэ уд шуы, тыныд кыдёкын ӧвӧл со;12со Инмын ӧвӧл, соин ик тазьы верамед уз луы: «Ми понна кин меда Инме тубоз но сое милемлы ваёз, милемлы кылыны луонлык сётысал ке, ми сое быдэсъяса улысалмы?»13Со зарезь сьӧрын но ӧвӧл, соин ик тазьы но верамед уз луы: «Ми понна кин меда зарезь сьӧры мыноз но сое милемлы ваёз, милемлы кылыны луонлык сётысал ке, ми сое быдэсъяса улысалмы?»14Тыныд туж матын та кыл: сое быдэсъяса улон понна со тынад кылад-ымад, сюлмад улэ.
15Тани, мон туннэ тыныд ӵектӥсько улон но ӟечлык, кулон но леклык.16Туннэ тыныд [Инмаредлэсь Кузё-Инмарлэсь быдэсъяса улыны сётэм курон-косонъёссэ кабыл басьтӥд ке,] Инмардэ Кузё-Инмарез яратыса улӥд ке, Солэн возьматэм сюресъёсыз кузя ветлыса улӥд ке, Солэсь курон-косонъёссэ, пуктон-косонъёссэ, законъёссэ быдэсъяса улӥд ке, соку кема улод, йылод, Инмаред Кузё-Инмар киулад басьтыны мыноно музъемад тонэ бакель кароз;17нош сюлмыд мыдлане берытскиз ке, Кузё-Инмарлэсь ӧд ни ке кылзӥськы, йыромыса ветлыны кутскид ке, мурт инмаръёслы йыбыртъяны кутскид ке, соослы ужаса-тыршыса улыны кутскид ке,18туннэ мон тӥледлы ялӥсько: тӥ кулоды-быроды, [Инмарлэн Кузё-Инмарлэн тӥледлы сётэм] музъем вылаз кема уд улэ, кудзэ киултыны тӥ Иордан тупала выжиськоды.
19Туннэ мон тӥляд азяды инмез но музъемез адӟисе ӧтисько: мон тыныд бырйыны ӵектӥ улон но кулон, бакель карон но карган. Улонэз бырйы – тон но, вуоно выжыосыд но кема мед улоды,20Инмардэ Кузё-Инмарез мед яратоды, Солэсь верам кылзэ санэ поныса мед улоды, Со борды мед лякиськоды; уго та бордын возиське тынад улонэд, улоно нуналъёсыдлэн кузьдалазы, [Инмарлэн] Кузё-Инмарлэн атайёсыдлы Авраамлы, Исааклы, Иаковлы кыл сётыса сӥзем музъем вылаз кема мед улод шуыса.
Глава 30