Выбрать язык
Книги Ветхого Завета
Книги Нового Завета
с русским текстом1Моисей мынӥз но та кылъёсты вань израиль [пиослы] вераз,2со шуиз: «Табере мыным сю кызь арес тырмиз ини, табере мон пыраны но, потаны но уг ни быгатӥськы; Кузё-Инмар мыным шуиз: ”Тон та Иорданлэн сьӧраз уд поты”;3Инмаред Кузё-Инмар Ачиз тынад азьпалад мыноз; Со та калыкъёсты тынад азьысьтыд быдтоз, соосты тон киулад басьтод; кызьы Кузё-Инмар вераз вал, Иисус тынад азьпалтӥд мыноз;4Кузё-Инмар соослы озьы ик лэсьтоз, мар лэсьтӥз Со [Иорданлэн тапалаз улӥсь] аморрейёслэн Сӥгон но Ог эксэйёсынызы, соосты но, соослэсь музъемзэс но Со быдтӥз;5Кузё-Инмар соосты тӥляд киулады сётоз, соослы тӥ мынам вань верам курон-косонъёсыя лэсьтэ;6кышкасьтэмесь, юн сюлэмоесь луэ, соослэсь эн кышкалэ, эн куалекъялэ, [эн курдалэ], уго Инмаред Кузё-Инмар Ачиз тонэн ӵош мыноз, тон бордысь уз палэнскы, тонэ уз кельты».
7Моисей Иисусэз дораз ӧтиз но вань израиль калыклэн азяз солы шуиз: «Юн лу, кышкасьтэм лу, уго тон Кузё-Инмарлэн атайёссылы кыл сётыса сӥзем музъемаз та калыкен ӵош пырод, сое тон та калыклы люкетъёслы люкылод.8Кузё-Инмар Ачиз тынад азьтӥд мыноз, Ачиз Со тонэн огазьын луоз, тон бордысь уз палэнскы, тонэ огнаддэ уз кельты; эн кышка, эн куалекъя».
9Та законэз Моисей гожтӥз но Кузё-Инмарлэсь сӥзён-косонэн ковчегзэ нуллӥсь Левий пиослы, священникъёслы, сётӥз, израиль [пиослэн] вань тӧрооссылы сётӥз.10Моисей соослы курон-косон сётыса шуиз: «Сизьым арлы одӥг пол, пунэм тыронэз куштон аре, Тылыс Пуктон праздник дыръя,11[Кузё-Инмарлэн] быръем интыяз Инмаредлэн Кузё-Инмарлэн син азяз вань израиль калык люкаськем бере та законэз вань израиль калыклы кылӥськымон шара лыдӟы;12калыкез люка, пиосмуртъёсты но, кышномуртъёсты но, нылпиосты но, сьӧрлось дорад лыктэм калыктэ но, кинъёс тынад улон интыосад луозы, мед кылзӥськозы, мед дышетскозы, Инмардылэсь Кузё-Инмарлэсь мед кышкалозы но та законысь вань кылъёсты быдэсъяны мед дышетскозы;13законэз тодӥсьтэм нылпиоссы но тае кылозы но вань нуналъёссы ӵоже, Иордан тупала выжыса, киулады басьтоно музъем вылын улытозяды Инмардылэсь Кузё-Инмарлэсь кышкаса улыны дышетскозы».
14Соку Кузё-Инмар Моисейлы шуиз: «Тани, улоно нуналъёсыд кулонлы матэ вуо ини; Иисусэз ӧть но вӧсяськон скинияе [пырон] доры султэ, Мон солы визь-кенешъёс сёто». Моисеен Иисус лыктӥзы но вӧсяськон скинияе [пырон] доры султӥзы.15Кузё-Инмар скинияысен, пилем юбо пушкысен, возьматскиз, пилем юбо [вӧсяськон] скинияе пырон дорын сылӥз.
16Соку Кузё-Инмар Моисейлы шуиз: «Тани, тон ӝоген кулыса атайёсыд доры мынод но, та калык со мыноно музъемысьтызы калыкъёслэн инмаръёссы сьӧрын азыса ветлыны кутскоз, Мынэсьтым куштӥськоз, соин ӵош кутэм сӥзён-косонме сӧроз;17со нуналэ Мынам вожпотонэ та калык вылэ ӝуатскоз, соку Мон соос дорысь кошко, ымнырме соослэсь вато, соос быдтэмын луозы, соос доры трос шугадӟонъёс, ӝожлыкъёс вуозы, со нуналэ та калык шуоз: ”Инмаре Кузё-Инмар асьме пӧлын ӧвӧлысь вань та шугадӟонъёс асьме доры ӧз вуэ меда?”18Мурт инмаръёс пала кожыса, законлы пумит лэсьтэм вань ужъёсыз понна со нуналэ Мон [солэсь] ымнырме вато.
19Та кырӟанлэсь [кылъёссэ] асьтэлы гожтэ, израиль пиосты та кырӟанэз кырӟаны дышеты, кылазы-ымазы пон, та кырӟан израиль пиослы пумит верась-тодытӥсь мед луоз;20уго Мон соосты [ӟеч] музъеме пырто, отӥ йӧлын чечы бызе, соослэн атайёссылы Мон тазьы кыл сётыса сӥзи вал, соос сиськозы, кӧтсы тыр луоз, куаёзы но мурт инмаръёс пала берытскозы, соослы йыбыртъяса улозы, нош Монэ кулэтэм карозы, [соослы утьыны-быдэсъяны сётэм] сӥзён-косонме сӧрозы;21соос доры трос шугадӟонъёс, ӝожлыкъёс вуизы ке, соку та кырӟан, адӟись-тодытӥсь луыса, соослы пумит вералоз, со уго [соослэн,] соослэн нылпиоссылэн кылысьтызы-ымысьтызы уз поты, [соослэн атайёссылы] кыл сётыса сӥзем [ӟеч] музъемам соосты вуттэмелэсь азьло ик Мон тодӥсько ини соослэсь мылкыдзэс».
22Со нуналэ Моисей та кырӟанэз гожтӥз но израиль пиосты та кырӟанэз кырӟаны дышетӥз.
23Кузё-Инмар Навинлэн Иисус пиезлы сӥзьыса шуиз: «Юн лу, кышкасьтэм лу, уго тон израиль пиосты Мынам соослы кыл сётыса сӥзем музъемам пыртод, Мон тонэн огазьын луо».
24Та законлэсь вань кылъёссэ пумозяз Моисей книгае гожтэм бере25Моисей Кузё-Инмарлэсь сӥзён-косон ковчегзэ нуллӥсь левитъёслы таӵе косон сётыса шуиз:26«Та закон книгаез басьтэ но Инмардылэн Кузё-Инмарлэн сӥзён-косон ковчегезлэн бурпалаз понэ, отын со тӥледлы пумит адӟись-тодытӥсь луоз.27Уго мон тодӥсько тынэсьтыд вог сямдэ, пумитъяськись сямо луэмдэ: тани, али но, тӥледын огазьын луон дыръям, Кузё-Инмар азьын тӥ вогъяськисесь; нош кулӥ ке, макем вогъяськисесь луоды?28Вань выжыостылэсь тӧрооссэс, [судьяостэс,] эскерись-чакласьёстэс мон котыре люкалэ но, мон соку соослы та кылъёсты шара верало, соослэсь янгышъёссэс усьтон понна инэн музъемез адӟисе ӧтё.29Мон тодӥсько уго, кулӥ ке, тӥ сӧриськоды, сӥзьыса сётэм сюрес вылысьтым кожоды, [Инмар] Кузё-Инмар азьын урод ужъёс лэсьтыса, ас киыныды лэсьтэм ужъёсын Солэсь вожзэ поттыса улэмды понна азьпалан тӥ доры шугадӟонъёс вуозы».
30Вань люкаськем израиль калык азьын Моисей та кырӟанлэсь кылъёссэ кутсконысен пумозяз шара лыдӟиз:
Глава 31