Выбрать язык
Книги Ветхого Завета
Книги Нового Завета
с русским текстом1«Кылзы, инбам, мынэсьтым верам кылъёсме; кылзы, музъем,
мынам ымысьтым потэм кылъёсты.
2Зор ву кадь кисьтӥськоз мынам дышетонэ, лысву кадь,
векчи зор шапыкъёслэн вож турын вылэ виямзы кадь,
кужмо зорлэн возь вылэ кисьтӥськемез кадь мынам вераськонэ.
3Кузё-Инмарлэсь нимзэ данъяло; асьмелэсь Инмармес данъялэ.
4Со пырдылӥсьтэм изгурезь; дун-шектэмесь Солэн ужъёсыз,
Солэн вань сюресъёсыз шонересь; Инмар оскиськымон,
[Со бордын] ӧрекчаськон ӧвӧл; Со – шонерлык но зэмлык;
5нош та калык сьӧриськемын,
соос Инмар азьын ярантэмесь луэмын,
соослэсь шекъёссэс учконо ке, соос Солэн нылпиосыз но ӧвӧл,
номырлы ярасьтэм, азэм выжы.
6Тазьы-а тӥ Кузё-Инмарлы пунэмдэс берыктӥськоды,
укылтэм, номыр валасьтэм калык?
Со тынад Атаед ӧвӧл-а, тынад кылдытӥсед, пӧрмытӥсед,
юнматӥсед Со ӧвӧл-а?
7Вашкала нуналъёсты тодад вай,
валляна выжыослэсь улэмзэс тодад вай;
атаедлэсь юа, со тыныд ивортоз, пересьёслэсь юа,
соос тыныд вералозы.
8Вылысь Инмар калыкъёслы люкет музъем сётъяку,
адями пиосты улыны интыялляку,
Со, израиль пиослэсь лыдзэс санэ поныса,
калыкъёслэсь межаоссэс-йыранъёссэс тупатӥз-пуктӥз;
9Кузё-Инмарлэн люкетэз – Аслаз калыкез;
Иаков – Солэн выжыысь выжые возиськись люкетэз.
10Та калыкез Со луоё кыр дуннеысь, мӧзмыталэс,
кырмем дуннеысь шедьтӥз, Ас котыраз, син азяз сое возиз,
Аслэсьтыз синчеберзэ кадь тыршыса утиз.
11Кызьы ӧрӟи карзэ уте, пиосыз йылтӥ лобаса ветлэ,
бурдъёссэ вайя, соосты кутэ но тылыосыз вылын нуллэ,
12тазьы Кузё-Инмаре сое огназ нуллӥз, Соин ӵош мурт инмар ӧй вал.
13Аслэсьтыз калыксэ Кузё-Инмар музъемлэн вылӥ интыосаз ӝутӥз,
бусыосын будэтэм емышъёсын сюдӥз,
излэн вискысьтыз люкам чечыен сюдӥз,
чурыт изгурезьын будӥсь вӧйпуослэн мульыысьтызы вӧйын сюдӥз,
14скал вӧйын, кеч йӧлын, Васанысь ыжпиослэн, такаослэн
кӧйынызы, кечтакаослэн кӧйынызы, ческыт чабеен сюдӥз,
тон вина юид,
виноград мульыослэсь вирзэс юид.
15[Иаков сииз,] куайиз Израиль, вог сямо луиз;
тазамиз, зӧкомиз, куайиз;
аслаз кылдытӥсь Инмарез дорысь палэнскиз,
аслэсьтыз утиськон, юнматскон интызэ кулэ ӧз кары.
16Мурт инмаръёсын соос Солэсь вожзэ поттӥзы,
юрӟым макеосынызы Солэсь йырзэ кур каризы:
17Инмарлы курбон ӧз сётэ, периослы курбон сётъязы,
бускельёссы дорысь вуэм выль, тодмотэм инмаръёслы
курбон сётъязы,
атайёстылэн таослы курбон сётъяны тодазы но ӧй вал.
18Нош тыныд улон сётӥсь Дурбасьтӥсьтэ вунэтӥд,
тыныд лул сётӥсь Инмарез тодад ӧд ни возьы.
19Кузё-Инмар тае адӟиз но туж-туж вожез потӥз,
вожез потыса, Аслэсьтыз пиоссэ, Аслэсьтыз нылъёссэ
кулэтэм кариз но
20шуиз: Аслэсьтым ымнырме соослэсь вато [но] учко,
кыӵе луоз улонзылэн пумыз,
уго соос азэм выжы, чик оскиськыны луонтэм нылпиос;
21ӧвӧлтэм инмарен Мынэсьтым вожме поттылӥзы,
чик кулэтэм сульдэръёсынызы йырме кур карылӥзы:
соин ик Мон но калык пыр, кудзэ калык но шуыны уг луы,
соослэсь вожзэс потто, укылтэм калык пыр йырзэс кур каро;
22воже потэмен, пушкам тыл ӝуатскиз,
дунне пыдсысь ад дорозь ваньзэ ӵушка,
музъемез но мар со вылын будэ – ваньзэ ньылэ,
гурезьёслэсь выжыоссэс сутэ;
23шугадӟонъёс соос вылэ люкало, пукыӵен ньӧлъёсме соос вылэ лэзё;
24сютэм улыса начармозы,
кезегъятӥсь черен, палась урод висёнэн быдтэмын луозы;
лэчыт пинё пӧйшуръёсты, музъем вылтӥ нюж кыстӥськыса ветлӥсь
ядо макеосты соос вылэ лэзё;
25кыре потӥзы ке, меч соосты погыръялоз,
корка пушказы кылизы ке,
шимес кышкан соосты погыртоз –
егит пиез, егит нылэз, нонӥсь нуныез но, пурысьтам пересез но.
26Мон малпасько вал, соосты пазьго,
адямиос пушкысь соосты тодэ ваёнэз быдто шуыса,
27но тушмонъёсы медаз лекоме шуыса, та малпанме ӧй быдэсты,
солэн тушмонъёсыз йырзэс вылэ урдыса шуоно медаз луэ:
”Милям кимы вормон вайиз, та ужез Кузё-Инмар ӧз лэсьты”.
28Соос визьзэс ыштэм калык ук, номыре но валаны уг быгато.
29Э, соос визьмоесь луысалзы ке, та сярысь малпасалзы ке,
валатскысалзы ке, мар соосты азьпалан возьма!
30Кызьы быгатысал одӥг мурт сюрс мурт сьӧры уйиськыны,
кык мурт дас сюрс муртэз улляны,
Дурбасьтӥсь соосты тушмонъёссылэн киулазы ӧй ке сётысал,
Кузё-Инмар соосты тушмон кие ӧй ке сётысал!
31Уго тушмонъёсмылэн дурбасьтӥсьсы
милям Дурбасьтӥсьмы кадь ӧвӧл;
тушмонъёсмы со ужын асьсэос судьяос.
32Уго соослэн виноградзы
Содомысь виноградпуд бордысь пушъемын,
Гоморраысь бусыосын будэмын;
соослэн мульыоссы ядоесь, пурыоссы курытэсь;
33виназы – лобась кыйлэн ядэз, сьӧд кыйлэн виись ядэз.
34Мон дорын со ватэмын ӧвӧл-а?
Мынам кеносъёсам со, печатен нюртыса, тунгонамын ӧвӧл-а?
35Пыдъёссы куалекъяны кутскизы ке, Мон киын пунэм берыктон,
пунэм тырон, уго матын ини соослэн кулон-бырон нуналзы,
соос понна дасям вӧсь каронъёс матын ини.
36Но Кузё-Инмар Аслэсьтыз калыксэ судить кароз,
Аслэсьтыз ляльчиоссэ Со жалялоз,
соослэн киоссы лябӟемын шуыса адӟиз ке, пытсэтэ сюремъёс но,
сюрымтэос но кылиллямтэ ни шуыса адӟиз ке.
37Соку [Кузё-Инмар] шуоз: ”Кытын соослэн инмаръёссы,
кытын юнматскон интызы, кудӥз вылэ соос оскиськыса уло вал;
38кытын курбон пудозылэсь кӧйзэ сиисьёс,
курбон-салам виназэс юисьёс?
Соос султыса тӥледлы мед юрттозы,
тӥ понна соос утиськон шобрет мед луозы!
39Адӟиськоды туннэ, [адӟиськоды,] та – Мон шуыса,
Мон сяна, мукет Инмар ӧвӧл:
Мон виисько но, улӟытӥсько но, Мон яраё карисько,
Мон ик бурмытӥсько но,
Мынам киулысьтым нокин но мозмытыны уз быгаты.
40Мон киме ин пала ӝутӥсько но [бур киыным кыл сётыса] шуисько:
”Пумтэм вапумъёс Мон улӥсько!
41Пиштӥсь-чилясь мечме йылсо каро, суд лэсьтыны кутско,
киыным тушмонъёсме вӧсь каро,
Монэ синазькыль карисьёслы пунэмзэ берыкто;
42пукыӵ ньӧлъёсме вирен кудӟыто, мече-пуртэ виылэмъёслэн,
пленэ шедемъёслэн мугоръёсынызы, вирынызы кӧтсэ тыроз,
тушмонъёслэн кузёйыръёссылэн йыръёсынызы кӧтсэ тыроз”.
43[Инъёс, Соин ӵош шулдыръяське,
Солы йыбырттэ, Инмарлэн вань Кылчинъёсыз.]
Вань выжыос, Инмарлэн калыкеныз ӵош
шумпотэ-шулдыръяське, [мед юнматскозы вань Инмар пиос]!
Уго Со пунэмзэ берыктоз Аслаз ляльчиосызлэн вирзы понна,
Аслаз тушмонъёсызлы пунэмзэ берыктоз,
[Сое синазькыль карисьёслы пунэмзэ берыктоз,
Кузё-Инмар] чылкытатоз-сузялоз Аслэсьтыз музъемзэ,
Аслэсьтыз калыксэ!»
44[Со нуналэ Моисей та кырӟанэз гожтӥз но израиль пиосты солы дышетӥз.] Моисей Навинлэн Иисус пиеныз ӵош [калык доры] лыктӥз но та кырӟанлэсь вань кылъёссэ калыклы кылӥськымон шара лыдӟиз.
45Вань израиль калыклы вань та кылъёсты верамез бере Моисей46соослы шуиз: «Туннэ тӥледлы верам кылъёсме ваньзэ сюлмады понэ, соосты нылпиостылы быдэстыны сӥзе, соос но та законлэсь вань кылъёссэ быдэстыны мед тыршозы;47уго та юнме гинэ верам кылъёс ӧвӧл, та тӥляд улонды, та кылъёсты быдэсъяды ке, тӥ со музъем вылын кема улоды, кудзэ тӥ али Иордан сьӧры киултыны мынӥськоды».
48Со нуналэ ик Кузё-Инмар Моисеен вераськиз но солы Со тазьы шуиз:49«Моав музъемысь Иерихонлы ваче беринэ интыяськем Аварим гурезе, Нево гурезе, тубыса, Ханаан музъем шоры учкы, сое Мон израиль пиослы асьсэлы карыны сётӥсько;50гурезь йылэ туб но отчы кул, ас калыкед пӧлысь кулэмъёс доры пыр, кызьы Ор гурезь йылэ Аарон агаед кулӥз но ас калыкез пӧлы пыриз,51озьы луоз та понна: тӥ израиль пиос пӧлын, Сӥн луоё кыр дуннеын, Кадесысь Мерива вуос дорын, Мыным пумит сьӧлыкады, Мынэсьтым дун-сьӧлыктэм луэмме израиль пиос пӧлын ӧд возьматэ;52азьпалысьтыд музъемез адӟод, но тон отчы, израиль пиослы сётоно музъемам, уд пыры».
Глава 32