Выбрать язык
Книги Ветхого Завета
Книги Нового Завета
с русским текстом1Тани Инмар адямилэн, Моисейлэн, кулон азяз израиль пиосты бакель каронэз.2Со шуиз:
«Кузё-Инмар Сӥнайысь лыктӥз, Сеирысен соослы возьматскиз,
Фаран гурезьын пиштыны кутскиз,
дасо сюрс святойёсын ӵош лыктӥз;
Солэн бурпалаз законлэн тылыз ӝуаса улӥз.
3[Аслэсьтыз] калыксэ Со юн яратэ;
вань святойёстэ Тон киулад утьыса возиськод,
Тынэсьтыд кылъёстэ валан понна соос Тынад пыд выжыяд лыктӥзы.
4Моисей милемлы, Иаковлэн калыкезлы, люкетлы закон сётӥз.
5Калыклэн йыръёсыз Израильысь выжыосын огазе люкаськылыку,
со Израильлэн эксэез вал.
6Мед улоз Рувим, со медаз кулы, [Симонлэн] но лыдыз медаз кулэсмы!»
7Нош Иуда сярысь тазьы шуиз:
«Кузё-Инмаре, кыл Иудалэсь куаразэ, аслаз калыкез доры сое вай;
аслаз киыныз со ассэ мед утёз, аслаз тушмонъёсыныз
нюръяськыны солы юрттӥськись лу».
8Левий сярысь тазьы шуиз:
«Тынад туммимед, Тынад уримед оскиськымон адямиед киын,
сое Масса дурысен Тон эскерид-чаклад,
соин Тон Мериваысь ву дурын ченгешид,
9со аслаз атаез, аслаз анаез сярысь шуэ:
”Мон соос шоры уг учкиськы”, аслэсьтыз агай-вынъёссэ но
санэ уг поны, аслэсьтыз нылпиоссэ но уг тоды;
соос – левитъёс,
Тынэсьтыд кылдэ утисьёс, сӥзён-косондэ быдэсъясьёс,
10Иаковез Тынад законъёсыдлы дышето,
Израилез Тынад курон-косонъёсыдлы дышето,
Тон азьын ческыт зыно ладан ӵын потто,
курбон сётон ӝӧк вылад тылын сутӥськись курбон тыро;
11Кузё-Инмаре, солэсь кужымзэ бакель кар,
солэн киыныз лэсьтэм ужлы ӟеч эриктэ возьматы,
со вылэ урдскисьёслэсь, сое адӟемпотостэм карисьёслэсь
макесъёссэс сузмыты,
султыны медаз ни быгатэ».
12Вениамин сярысь шуиз:
«Кузё-Инмарлэн яратэм муртэз Со дорын кышкатэк улэ,
Инмар сое нуналлы быдэ утьыса возе,
Солэн пельпумъёсыз вискын каньылэн со улэ».
13Иосиф сярысь шуиз:
«Кузё-Инмар солэсь музъемзэ инмысь туж возьмано саламъёсын,
лысвуэн, улӥысь, пыдэстэм дуннеысь,
саламъёсын бакель мед кароз,
14шундылэн пиштыса кисьматэм туж ӟеч емышъёсыныз,
толэзьлэн туж ӟеч саламъёсыныз,
15вашкала гурезьёслэн устолэсь но усто емышъёсынызы,
пумтэм вапумъёс улӥсь мувыръёслэн туж возьмам саламъёсынызы,
16музъемлэн, солэн тыр луонэзлэн туж кулэ луись саламъёсыныз
бакель мед кароз;
тёрнпу куак пушкысен Возьматскисьлэн бакель каронэз
Иосифлэн йыр вылаз мед вуоз,
агай-вынъёсыз пӧлысь тужгес умоезлэн йыртыш вылаз мед вуоз;
17кужымез солэн нырысь вордскем ошпилэн кадь,
солэн сюръёсыз ву ошлэн кадесь;
Иосиф ас кужыменыз –
Ефрем пиезлэн дасо сюрс муртъёсыныз ӵош,
Манассия пиезлэн сюрс муртъёсыныз ӵош –
со музъемлэн пумозяз мурт калыкъёсты улляса лэзёз».
18Завулон сярысь тазьы шуиз:
«Сюрес вылъёсад шулдыръяськы, Завулон,
балаганъёсад-тылысъёсад шулдыръяськы, тон но, Иссахар;
19соос гурезь йылэ калыкез люкало но отын
законъя кулэ луись курбонъёс сёто,
соос зарезьлэн узырлыкъёсыныз,
луо пушкы ватӥськем байлыкъёсын кӧтсэс тыро».
20Гад сярысь тазьы шуиз:
«Гадлэсь улон интызэ паськытатӥсь бакель каремын;
со сьӧсь пӧйшур кадь шутэтске, суйбыгытэз, йырез куашкатэ;
21со аслыз музъемлэсь ӟеч интызэ нырысь басьтӥз,
та закон сётӥсьлэн висъям люкетэз;
калыклэн кивалтӥсь йыръёсыныз ӵош лыктӥз но
Кузё-Инмарлэсь быдэстыны сётэм шонерлыко ужъёссэ быдэстӥз,
Израилен ӵош судъёсты ортчытӥз».
22Дан сярысь тазьы шуиз:
«Дан – пинал лев, Васанысь тэтчыса потӥсь левпи».
23Неффалим сярысь тазьы шуиз:
«Неффалим Кузё-Инмарлэн бакель каронэныз тыр луэмын,
ӟеч эрикеныз пачылмемын;
зарезь пал но лымшор дунне солэн киулаз».
24Асир сярысь тазьы шуиз:
«Израиль пиос пӧлын Асир бакель каремын,
сое агай-вынъёсыз яратыса улозы, вӧй пӧлы со пыдзэ веттоз;
25кортэн ыргон – тынад тунгонъёсыд;
нуналлы быдэ узырлыкед йылоз».
26«Израильлэн Инмарезлы укшась мукет инмар ӧвӧл,
Со тыныд юрттӥськыны инъёс вылтӥ лыктэ,
пилемъёс вылын Аслаз пиштӥсь данлыкеныз лыктэ;
27[тынад] ватӥськон интыед
пумтэм вапумъёс ӵоже улӥсь Инмар дорын,
Солэн котьку кужмо луись суйбыгыт улаз утиськиськод,
Со тынад азьысьтыд тушмонъёсты уллялоз но шуоз: ”Быдты!”
28Израиль кышкатэк улэ, огназ;
Иаковлэн синмыз ас азьысьтыз нянен, винаен узыр музъемез адӟе,
солэн инъёсыз шапыкен лысву виято.
29Шудо тон, Израиль! Кин тыныд укшасез вань,
Кузё-Инмарлэн утёно калыкез?!
Кузё-Инмар – тынад щитэд, утисед,
Со – тынад данлыкедлэн мечез!
Тушмонъёсыд азяд ляльчи кариськыса пыдесъясько,
соослэн чырты вылазы тон лёгиськиськод».
Глава 33