Выбрать язык
Книги Ветхого Завета
Книги Нового Завета
с русским текстом1Иисус, Навинлэн пиез, Сӥттимысь лушкемен кык чакласькись-утчаськись муртъёсты ыстыса шуиз: «Мынэлэ, учкелэ-эскере музъемез, Иерихонэз но». [Кык егит пиос] мынӥзы но, [Иерихонэ вуыса], калгись кышномуртлэн юртаз пыризы, солэн нимыз Раав, уйзэс потыны солэн корказ кылизы.2Иерихон эксэйлы тазьы верамын вал: «Тани, израиль калык пӧлысь кыӵе ке но пиос татчы та уе музъеммес учкыны-чакланы вуылӥзы».
3Иерихон эксэй Раав доры тазьы вераны ыстӥз: «Мон кие сёт [та уе] тынад коркад, тон доры вуылэм муртъёсты, уго соос быдэс музъемез эскерыны-чакланы вуылӥзы».4Нош кышномурт со кык муртъёсты ватӥз но шуиз: «Зэм ик, мон доры вуылӥзы адямиос, но мон ӧй тоды, кытысь соос;5ӝомал усем бере, капкаосты пытсаллян вакытэ, соос кошкизы; уг тодӥськы, кытчы соос кошкизы; ӝоггес уйиське сьӧразы, тӥ соосты сутоды».
6Нош ачиз та кышномурт таосты липет йылаз тубытӥз но отчы тырем етӥн культоос пӧлы ватӥськытӥз.
7Ыстэм муртъёс соос сьӧры уйиськыса, Иордан дуре нуись сюрес кузя шур вамен выжон дорозь ик мынӥзы; израиль пиос сьӧры уйиськыса мынӥсьёс Иерихонысь потэм бере соку ик кар капкаосты пытсазы.
8Та пиос изьыны выдэмлэсь азьло кышномурт соос доры липет йылэ тубиз но9соослы шуиз: «Мон тодӥсько, та музъемез Кузё-Инмар тӥледлы сётӥз шуыса, уго тӥ милемыз шимес кышкатӥды, та музъемын улӥсьёс ваньзы йырзэс ошизы;10уго ми кылӥмы, кызьы [Инмар] Кузё-Инмар, Египетысь потыкуды, тӥляд азьысьтыды Горд Кам зарезьысь вуэз куасьтӥз, мар кариды тӥ кык аморрей эксэйёслы – Сӥгонэн Оглы – Иордан сьӧрысен, тӥ соосты быдэсак быдтӥды;11ми та сярысь кылӥмы но, лябӟиз милям сюлэммы, [милям] огмылэн но тӥледлы пумит султыны кужыммы ӧз ни кыльы; уго тӥляд Инмарды Кузё-Инмар – инмын вылӥын но, музъем вылын улӥын но – Инмар;12озьыен, тӥ [Инмардылэн] Кузё-Инмарлэн нимыныз мыным кыл сётэ, кызьы мон тӥледыз жаляй, тӥ но мынэсьтым атай выжыме жалялэ, мыным оскиськымон тодмет возьматэ,13мынэсьтым атайме но, анайме но, агай-вынъёсме, сузэр-апайёсме но, кинзы соослэн вань, – ваньзэс улэп кельтоды, милесьтым лулъёсмес кулонлэсь-быронлэсь мозмытоды шуыса».
14Та пиос Раавлы шуизы: «Милям лулмы тӥляд лулды интые кулон киулэ сётэмын мед луоз, [та нуналэ] милесьтым ужмес шарае ӧд ке потты; Кузё-Инмар милемлы та музъемез сётӥз ке, соку ми тонэ гажалом-жалялом, оскиськымон луомы».
15Раав соосты укно пыр гозы кузя васькытӥз, уго солэн коркаез кар борддор пушкын вал, со борддор пушкын улӥз;16пиослы со шуиз: «Гурезьёсы мынэ но отын куинь нунал ватӥськыса улэ, [тӥ сьӧрын] уйиськыса ветлӥсьёс тӥледыз медаз пумиталэ, соос доразы берытскытозь отын улэ; собере мыноно сюрес вылады потэ».
17Та адямиос Раавлы шуизы: «Тазьы ӧд ке лэсьты, соку ми тынад сётытэм кылыдлэсь мозмытскомы:18тани, та музъеме ми лыктӥмы ке, укно бордад, кудӥз пыр тон милемыз улӥе васькытӥд, горд гозы дум, нош атайдэ, анайдэ, агай-вынъёстэ, атаедлэсь вань семьязэ аслад коркад люка;19нош кин ке тынад корка ӧсэд пыр потыса виемын луиз ке, со понна со ачиз янгыш луоз, нош ми [тыныд сётэм кылмылэсь] соку мозмытскомы; нош [тынад] коркад тонэн ӵош луэм мурт борды кудмылэн ке кимы йӧтӥськиз ке, солэн вирыз милям йыр выламы луоз;20нош [кин ке асьмеды вӧсь кариз ке, яке] асьмелэсь та ужмес шарае поттӥд ке, соку но ми тынад милемыз кыл сётытэмед улысь мозмытскиськомы».21Раав шуиз: «Кызьы тӥ вераськоды, озьы мед луоз!» Соосты келяз, соос кошкем бере со укно бордаз горд гозы думиз.
22Отысь кошкыса, соос гурезё интые вуизы, сьӧразы уйиськисьёс соосты шедьтытэк берен гуртазы кошкытозь, соос отын куинь нунал улӥзы.23Табере та кык адямиос бертыны потӥзы; гурезьысь васькыса, [Иордан вамен] выжизы но Навинлэн Иисус пиез доры вуизы, отысен соос веразы ваньзэ, мар соосын луиз.24Иисуслы шуизы: «[Инмармы] Кузё-Инмар быдэс музъемез асьмелэн киуламы сётӥз, со музъемын вань улӥсьёс асьмелэсь туж кышкаса уло».
Глава 2