Выбрать язык
Книги Ветхого Завета
Книги Нового Завета
с русским текстом1Иероваал, со ик Гедеон, со доры люкаськем вань калык но, ӵукна вазь султыса, станзэс Харод ошмес доры пуктӥзы; мадиан ожгарчиослэн станзы соослэн уйпалазы, Море нимо вырйыл дорысь нёжалын сылӥз.
2Кузё-Инмар Гедеонлы шуиз: «Тон котырын укыр трос калык, соослэн киулазы мадиан калыкез Мон сётыны уг быгатӥськы, Израиль выжы Мон азьын вылтӥяськыны медаз кутскы шуыса, медаз шуэ: ”Асьмемыз асьмеос утимы”.3Озьыен, бадӟым куараен калыклы кылӥськымон вера: ”Кин кышкась, дӥсьтӥсьтэм, со мурт мед берыктӥськоз, Галаад гурезьысь берен мед кошкоз”». Соку кызь кык сюрс мурт берытскизы, нош дас сюрсэз интыязы кылизы.
4Кузё-Инмар Гедеонлы шуиз: «Трос на татчы кылем калык; ву дуре соосты ну, отысен Мон тыныд соосты быръё; кин сярысь Мон шуо: ”Тон бӧрсьы мед мыноз”, со мурт тон бӧрсьы мед мыноз; нош кин сярысь тыныд тазьы шуо: ”Тон бӧрсьы мыныны кулэ ӧвӧл”, со мурт медаз мыны».
5Со калыкез ву дуре вайиз. Соку Кузё-Инмар Гедеонлы шуиз: «Кин вуэз кылзэ веттыса, пуны кадь чапкетыса юиз ке, сыӵе муртъёсты нимаз султыты, озьы ик нимаз султыты ваньзэс пыдесъяськыса ву юисьёсты».6Кырыменызы омыръяса ву юисьёс куинь сю мурт вал; нош кылемез вань калык пыдесъяськыса ву юиз.7Кузё-Инмар Гедеонлы шуиз: «Вузэс чапкетыса юись куинь сю муртэн Мон тӥледыз утё, мадиан калыкез тӥляд киулады сёто, нош кылемез вань калык котькудӥз ас интыяз мед мыноз».
8Соос калыклэсь сиён люкетсэс басьтӥзы, соослэсь гумыоссэс басьтӥзы, собере Гедеон ваньзэс израиль пиосты балаганъёсазы бертыны косӥз, ас бордаз куинь сю муртэ кельтӥз; мадиан калыклэн ожгарчиосыз улӥын, нёжалын сылӥзы.
9Со уе Кузё-Инмар солы шуиз: «Султы, мадиан пиослэн станзы доры васькы, сое Мон тон кие сётӥсько.10Одӥгнад мыныны кышкаськод ке, сьӧрад Фура медодэ басьты;11кылод, мар верало, соку тынад киосыд юнмалозы, мадианъёслэн сылон интыязы мынод». Соку со Фура медоеныз ожмаськон тӥрлыкъёсын возьмаськись ожгарчиослэн сылон интызы дурозь васькиз.12Мадиан калык, амалик калык, шундыӝужан палась лыктэмъёс, саранча кадь трос кузя, нёжалын сыло вал; верблюдъёссы лыдъяны луонтэм трос вал, зарезь дурысь луо мында, трос вал соос.13Гедеон лыктӥз. Тани, одӥгез мукетызлы уйвӧт адӟемзэ вера, шуэ: «Уйвӧтам адӟисько: котырес йыды нянь погылляськыса мынӥз мадиан ожгарчиослэн сылон интыетӥзы, балаганзы доры вуиз но сыӵе зол со борды шуккиськиз, – кымалтӥз сое, балаган куашказ».14Мукетыз солы ответ сётыса шуиз: «Мукет номыр ӧвӧл, та – израиль калык пӧлысь Иоаслэн Гедеон пиезлэн мечез; Инмар солэн киулаз мадиан калыкез, вань ожгарчиосты сётӥз».
15Уйвӧт сярысь вераськемзэс, солэсь пуштроссэ валэктэмзэс кылӥз но Гедеон [Кузё-Инмарлы] йыбырттӥз, собере израиль ожгарчиослэн сылон интыязы лыктыса шуиз: «Султэлэ! Мадиан калыклэсь ваньзэ оже султэм калыксэ Кузё-Инмар асьме кие сётэ».16Куинь сю муртэ куинь отрядлы люкиз, котькудзылэн кияз пеллян гумы сётӥз, тырттэм кунганъёс, нош кунган пушкы ӝуась сэрегпумъёс пуктытӥз.17Соослы шуиз: «Мон шоры учкыса улэ – мар лэсьто, тӥ но сое ик лэсьтэ; тани, мон ожгарчиослэн сылон инты доразы лыкто, соку тӥ но, мар мон каро, каре.18Мон, монэн артэ сылӥсьёс гумыоссэс пелляны кутскимы ке, тӥ но, гумыостэс пелляса, мадиан ожгарчиослэн сылон интызы котырын сылэ но кесяськыса вералэ: ”Кузё-Инмарлэн но Гедеонлэн [мечсы]!”»
19Гедеон сю ожгарчиосыныз ӵош мадианъёслэн сылон инты доразы вуизы, соос уйшор уйин возьмаськисьёслэн воштӥськонзы дыръя отчы вуизы, ожгарчиос возьмаськыны сайкатэмын вал ни; соку соос гумыоссэс пелляны кутскизы, киязы кутэм кунганъёссэс сӧрылӥзы.20Куинез ик отрядъёс гумыоссэс пелляны кутскизы, кунганъёссэс сӧризы, ӝуась сэрегпумъёссэс паллян киязы кутыса возизы, нош бур киязы – гумыоссы, пеллязы но бадӟым куараен кесяськизы: «Кузё-Инмарлэн но Гедеонлэн мечсы».
21Котькудӥз стан котырын ас интыяз сылӥз; мадиан ожгарчиос алекъяськыса азьлань-берлань бызьылыны кутскизы, кесяськизы но бызьыса пегӟыны кутскизы.22Куинь сю адями гумыоссэ пелляны кутскем бере тушмон ожгарчиосты Кузё-Инмар огзы вылэ огзэс меченызы урдскытӥз, ожмаськыны люкаськемъёс пегӟыса кошкизы Царера пала Беф-Шиттаозь, Табафа вӧзысь Авел-Мехолалэн пумозяз.
23Ӧтемын вал израиль калыклэн Неффалим, Асир, Манассиялэн быдэс выжыосысьтыз адямиос, соос мадиан ожгарчиос сьӧры уйиськыса мынӥзы.24Гедеон аслэсьтыз адямиоссэ быдэс Ефрем гурезьтӥ вераны ыстӥз: «Мадиан ожгарчиослэн пумитазы потэ но соос азьысь Беф-Вараозь ву вамен выжон интыосты, Иорданлэсь ярдурзэ но киултэ». Ефрем выжыысь вань калык ӝутэмын вал, Беф-Вараозь ву вамен выжон интыосты, Иорданэз но соос киултӥзы;
25мадиан калыклэсь кык кивалтӥсьёссэ-эксэйёссэ, Оривез но Зӥвез, кутӥзы; Оривез Цур-Оривын виизы, нош Зӥвез – Иекев-Зӥвын; мадиан ожгарчиосты уйыса мынӥзы; Оривлэсь но Зӥвлэсь йырзэс Гедеонлы Иордан сьӧры вайизы.
Глава 7