Выбрать язык
Книги Ветхого Завета
Книги Нового Завета
с русским текстом1Израиль пиос Кузё-Инмар азьын нош ик урод ужъёс лэсьтыны кутскизы, соку Кузё-Инмар соосты сизьым ар ӵожелы мадиан калыклэн киулаз сётӥз.2Израиль понна секыт вал мадиан калыклэн киызлэн зӥбетэз; израиль пиос мадиан выжылэсь утиськон понна гурезьёсы ватӥськон гуос гудылӥзы, каланчаос-каръёс ӝутылӥзы.3Израиль пиос бусыоссэс кизем бере мадиан калык, амалик калык, шундыӝужан палан улӥсьёс, лыкто но соослэн музъем вылтӥзы ветло;4балаганъёссэс пуктыса, отын уло, та музъемын будэтэм емышез Газа дорозь ваньзэ быдто, израиль пиослы кӧттыро улыны ыж но, ош но, ишак но уг ни кельто.5Соос уго пудо уллёосынызы, балаганъёсынызы лыкто вал; саранча мында трос вал соос; соос асьсэос но, верблюдъёссы но лыдъяны луонтэм трос вал; ваньзэ быдтон вылысь Израиль музъемез лёгаса ветлылӥзы.6Мадиан калыкен сэрен Израиль туж начар улыны кылиз, соку израиль пиос Кузё-Инмарлы тэльмырыса вазиськизы.
7Мадиан калык вылэ урттылӥськыса, израиль пиос Кузё-Инмарлы тэльмырыса вазиськем бере8Кузё-Инмар израиль пиос доры пророк ыстӥз но со соослы шуиз: «Тазьы шуэ Израильлэн Инмарез Кузё-Инмар: Мон тӥледыз Египетысь поттӥ, ляльчиын улонлэн коркасьтыз поттӥ;9Египет калыклэн киулысьтыз мозмытӥ, вань ултӥясьёслэн киулысьтызы мозмытӥ, тӥ котырысь соосты улляй, соослэсь музъемзэс тӥледлы сётӥ.10Соку тӥледлы шуи: ”Мон тӥляд Инмарды Кузё-Инмар; аморрей музъем вылын улыса, аморрей калыклэн инмаръёсызлы эн йыбыртъялэ”, нош тӥ Мынэсьтым верамме санэ ӧд понэ».
11Кузё-Инмарлэн Кылчинэз лыктӥз но Офраысь тыпы улэ пуксиз, со инты Авиезер выжыысь потэм Иоас пилэн вал; соку солэн Гедеон пиез мадиан выжыослэсь ватскон понна вина поттон гуаз чабейзэ кутсаса улэ вал.12Кузё-Инмарлэн Кылчинэз со доры лыктыса шуиз: «Кузё-Инмар тонэныд, кужмо воргорон!»13Гедеон солы шуиз: «Кузёе! Кузё-Инмар милемын огазьын ке, соку малы бен ми доры таӵе [секыт шугадӟон] вуиз, кытын Солэн вань паймымон ужъёсыз, кудъёсыз сярысь милемлы атайёсмы верало вал, соос шуо вал, милемыз, пе, Египетысь Кузё-Инмар поттӥз? Табере милемыз Кузё-Инмар кулэтэм кариз, мадиан калыклэн киулаз сётӥз».
14Кузё-Инмар со шоры учкыса шуиз: «Та кужыменыд мын но Израилез мадиан калыклэн киулысьтыз уть; Мон тонэ ыстӥсько».15[Гедеон] Солы шуиз: «Кузё-Инмаре! Кызьы мон Израилез утьыны быгато? Тани, мынам выжы-кумыосы но Манассия выжыын тужгес начаръёсыз луо, атаелэн но мон покчиез пиез луисько».16Кузё-Инмар солы шуиз: «Мон тонэн огазьын луо, одӥг адямиез кадь вань мадиан калыкез тон погыртод».17[Гедеон] Солы шуиз: «Тон азьын мон таӵе дэлет басьтӥсько бере, Аслэсьтыд монэн вераськемдэ тодытыса, мыным паймымон тодмет возьматы:18Татчы лыктыса аслэсьтым салам-кузьымъёсме Тыныд сётытозям, эн кошкы татысь». Со шуиз: «Тон лыктытозь, Мон татын луо».
19Гедеон мынӥз но кечпизэ дасяз, одӥг мертэт пызьлэсь чырсатытэк юмал нянь пыжиз; сӥльзэ мушкое*а понӥз, нош шыдзэ горшоке понӥз но, Солы шуыса, тыпы улэ вайыса пуктӥз.20Инмарлэн Кылчинэз солы шуиз: «Сӥльдэ, юмал няньдэ басьты но та из вылэ пон, шыддэ кисьты». Со озьы ик лэсьтӥз.21Кузё-Инмарлэн Кылчинэз кияз кутэм бодызэ ӝутыса, солэн йылыныз сӥль борды, юмал нянь борды йӧтӥськиз; соку из пушкысь тыл потӥз но сӥлез, нянез сииз-ньылӥз. Собере Кузё-Инмарлэн Кылчинэз солэн син азьысьтыз ышиз.
22Гедеон адӟиз, та Кузё-Инмарлэн Кылчинэз вал шуыса, соку со шуиз: «Дунне Кутӥсь Кузё-Инмаре! Кузё-Инмарлэсь Кылчинзэ мон туж матысен ас синмыным адӟи».23Кузё-Инмар солы шуиз: «Каньыллык тыныд, эн кышка, уд кулы».
24Гедеон отчы Кузё-Инмарлы курбон сётон ӝӧк лэсьтӥз но сое «Иегова Шалом»*б шуыса нимаз. Со туннэ нуналозь Авиезер выжылэн Офра караз сылэ.
25Со уе Кузё-Инмар солы шуиз: «Атаедлэн пудо уллёысьтыз ошсэ басьты, мукетсэ сизьым аресъем ошсэ басьты, собере атаедлэсь Вааллы сӥзем курбон тыронзэ куашкаты, со вӧзысь йыбыртъян писпузэ кора;26[тыныд возьматскем] Инмаредлы Кузё-Инмарлы та изгурезьлэн йылӥяз чаклам радызъя курбон сётон ӝӧк пукты; кыкетӥ оштэ вай но, корам пудэ аратыса, со вылын тылын сутыса, сое курбон сёт».
27Гедеон дас ляльчиоссэ басьтӥз но лэсьтӥз озьы, кызьы Кузё-Инмар косӥз; та ужез нуназе лэсьтыны ас семьяосызлэсь, городын улӥсьёслэсь кышкаменыз, уйин лэсьтӥз.28Городын улӥсьёс ӵукна султэм беразы адӟизы: Вааллы сӥзем курбон сётон ӝӧк куашкатэмын, со вӧзысь писпу погыртэмын, кыкетӥез ош, выль пуктэм курбон сётон ӝӧк вылын тылын сутыса, курбонлы сётэмын.29Огзылы огзы шуизы: «Кин тае лэсьтӥз?» Утчазы, юалляськизы но шуизы: «Гедеон, Иоаслэн пиез, тае лэсьтӥз».
30Городын улӥсьёс Иоаслы шуизы: «Потты аслэсьтыд пидэ, Вааллы сӥзем курбон тыронэз куашкатэм но со вӧзысь писпуэз корамез понна сое виыны кулэ».31Иоас вань люкаськем калыклы шуиз: «Тӥ-а кулэ Вааллэн палаз пырыны, солы дурбасьтыны? Кин со пала пыриз, со мурт туннэ ик виемын луоз; со Инмар ке, аслыз ачиз мед дурбасьтоз но курбон тыронзэ куашкатӥсьлы пумит мед султоз».32Со нуналысен Гедеонэз Иероваал*в шуыса ниманы кутскизы, малы ке шуоно Иоас шуиз: Ваал аслыз ачиз мед дурбасьтоз но курбон тыронзэ куашкатӥсьлы пумит мед султоз.
33Со куспын мадиан калык, амалик калык, шундыӝужан палан улӥсьёс, огазе люкаськыса, шур вамен выжизы но Изреель нёжалэ станэн интыяськизы.34Кузё-Инмарлэн Духез Гедеонэз котыртӥз; со гумызэ пелляны кутскиз но, Авиезер выжы со сьӧры мыныны ӝутэмын вал.35Быдэс Манассия выжы пӧлы ӧтисьёсты ыстӥз, сое но Гедеон сьӧры мыныны ӝутказы; озьы ик Асир, Завулон, Неффалим выжыос доры ӧтисьёсты ыстӥз, соосыз таослэн пумитазы лыктӥзы.
36Соку Гедеон Инмарлы шуиз: «Израилез мынам киыным Тон утид ке, кызьы Тон верад,37соку, тани, мон итыме ӵышкем ыжгон вӧлдо: лысву ыжгон вылын гинэ луиз ке, нош быдэс музъем вылын кӧс ке луиз, соку тодо, Тон мынам киыным Израилез утёд шуыса, кызьы Тон мыным верад».38Озьы ик луиз: мукетаз нуналэ, ӵукна вазь султыса, ыжгонзэ пызьыръяны кутскиз, – ыжгонысь быдэс тусьты тыр лысвуэз пызьыртӥз.
39Соку Гедеон Инмарлы шуиз: «Мыным вождэ эн потты, эшшо одӥг пол верай на ке, эшшо одӥг пол ыжгонэз тазьы эскери на ке: ыжгон вылын гинэ кӧс мед луоз, нош быдэс музъем вылын лысву мед луоз».40Инмар со уе озьы ик лэсьтӥз: ыжгон вылын гинэ кӧс вал, нош быдэс музъем вылын лысву вал.
*а 6:19 мушко – корзина, куды (плетёнка)
*б 6:24 Иегова Шалом – «Кузё-Инмар – со каньыллык» шуэм луэ
*в 6:32 Иероваал – «Ваал аслыз ачиз мед дурбасьтоз» шуэм луэ
Глава 6