Выбрать язык
Книги Ветхого Завета
Книги Нового Завета
с русским текстом1Со вакытэ, куке Израильлэн эксэез ӧй на вал, Ефрем гурезь бамалын улӥз одӥг левит. Иудеяысь Вифлеем карысь аслыз ляльчи кышно вайиз.2Ляльчи кышноез соин споре пыриз но Иудеяысь Вифлеем каре атаез доры кошкиз; отын со ньыль толэзь улӥз.3Кузпалыз султӥз но со доры сюлмысьтыз вераськыны шуыса кошкиз, берен дораз ваемез потӥз. Бӧрсяз медозэ но кык ишакъёссэ кутӥз. Ляльчи кышноез сое атаезлэн юртаз пыртӥз.4Та пинал кышномуртлэн атаез сое адӟиз но шумпотыса пумитаз; варматаез, пинал кышномуртлэн атаез, сое кошкыны лэзьытэк гуртаз возиз. Левит отын куинь нунал улӥз; сиизы-юизы, отын ик кӧлӥзы.5Ньылетӥ нуналаз соос вазь ик султӥзы но кошкыны дасяськизы. Егит кышномуртлэн атаез эмеспиезлы шуиз: «Шорем нянен кӧттэ тыр, собере кошкоды».
6Ӧз кошке, кылизы, ӵош сиизы-юизы. Егит кышномуртлэн атаез со муртлы шуиз: «Эшшо одӥг уй кыль, лулыд-сюлмыд шумпотыса мед улоз».7Со адями султэм вал ини кошкыны шуыса, но варматаез туж кыльыны куриз но, со нош ик татын уйзэ потӥз.
8Витетӥ нуналаз кошкыны шуыса, со вазь ик султӥз. Соку егит кышномуртлэн атаез солы шуиз: «Лулдэ-сюлэмдэ [нянен] юнматы, эн дыртэ нуназе вуытозь кошкыны». Кыксы ик сиськизы, [юизы но].9Со адями султӥз кошкыны шуыса, ляльчи кышноез но, медоез но. Егит кышномуртлэн атаез, талэн варматаез, шуиз: «Тани, нунал ӝыт пала вырӟиз ини, кӧлэ, мон тӥледыз курисько; ӝоген шунды пуксёз ини, кӧл татын, лулыд-сюлмыд мед шулдыръяськоз; ӵуказе вазь ик султод но гуртад бертод».
10Но воргорон кӧлыны соглаш ӧз луы, султӥз но кошкиз; Иевус доры вуиз, кудзэ али Иерусалим шуо; соин ӵош тӥрлык вайись кык ишакъёс, ляльчи кышноез но вуизы.
11Иевуслы матэ вуыкузы, ӝыт вуэ вал ини. Медо пи кузёезлы шуиз: «Ойдо, иевусейёслэн городазы пырыса, отын кӧлом».12Кузёез солы шуиз: «Ум, мурт выжылэн, израиль калык пӧлысь луымтэ муртъёслэн, городазы ум пыре, Гивае вуттӥськом».13Аслаз ляльчиезлы левит шуиз: «Вуттӥськом Гивае яке Рамае, кудаз ке но огаз кӧломы».14Кошкизы, мынон сямен, Вениамин выжылэн Гива карез доры вуыкузы, шунды пуксиз.15Уйзэс потыны соос Гивае кожизы. Городэ вуыса, ульчаязы пуксизы; нокин но соосты гуртаз кӧлыны ӧз чорты.
16Но, тани, ӝытозь ужаса, бусыысьтыз бертэ одӥг пересь мурт; со вордскемын вал Ефрем гурезьын, нош ачиз улӥз Гиваын. Та интыын улӥз Вениамин выжыысь калык.17Пересь мурт синъёссэ ӝутӥз но, кар ульчаын пукись сюресчиез адӟыса, солы шуиз: «Кытчы мынӥськод? Кытысь татчы вуид?»18Со солы шуиз: «Иудеяысь Вифлеем карысь ми Ефрем гурезе мынӥськомы, отын мон улӥсько; мон Иудеяысь Вифлеем каре ветлӥ, али Кузё-Инмарлэн корказ мынӥсько, нош нокин но монэ уйме потыны дораз уг ӧтьы.19Ишакъёсмес сюдыны куромы но, сиёнмы но вань; аслым сиыны-юыны няне но, винае но вань, ляльчи кышноелы но, медоелы но тырмыт; ми, тынад ляльчиосыд, номырлы ёрмыса ум улӥське».20Солы пересь мурт шуиз: «Эн сюлмаськы, маид ӧвӧл, сое шедьто, только ульчаын эн кӧлы».
21Сое корказ пыртӥз, ишакъёсызлы сиён сётӥз, асьсэос пыдъёссэс миськизы но сиськизы, юизы.22Шулдыр мылкыдын пукон дыръязы та городын улӥсьёс, азэм муртъёс, коркаез котыртӥзы но, ӧсэ йыгаськыса, коркалэн кузёезлы, пересь пиосмуртлы, шуизы: «Коркад пырем пиосмуртэз татчы потты, милям сое тодэммы потэ».
23Коркалэн кузёез соос доры потыса шуиз: «Уг яра, агай-вынъёсы, урод уж эн лэсьтэ, та адями мынам коркам пыриз, таӵе юрӟым-укылтэм ужез эн лэсьтэ.24Тани, мынам бызьымтэ нылы вань, нош солэн – ляльчи кышноез, соосты потто тӥ доры, мар каремды потэ, каре соосын, сантэма соосты, нош та пиосмуртлы таӵе юрӟым-укылтэм ужез эн лэсьтэ».25Нош соос сое кылэм но уг каро. Соку левит ляльчи кышнозэ кутӥз но соос доры ульчае поттӥз. Соос сое мыскыллязы, быдэс уй, ӵукнаозь сое курадӟытӥзы. Ӵукна ӟардыку гинэ, дораз бертыны лэзизы.26Куазь ӟардыку, пересь муртлэн корка дораз вуыса, кытын вал солэн кузёез, кышномурт ӧс выжые пограз но отын, куазь югыт луытозь, кыллиз.
27Кузёез ӵукна султӥз, сюрес вылэ потыны дасяськыса, корка ӧсэз усьтӥз но, тани, ляльчи кышноез ӧс выжыын кылле, киосыз ӧс янак вылэ понэмын.28Со ляльчи кышноезлы шуиз: «Султы, кошкомы ни». Но вазись ӧйлась: [со кулэмын вал ини]. Ляльчи кышнозэ ишакез вылэ понӥз но султыса ас интыяз кошкиз.29Дораз вуэм бере кияз пурт кутӥз но ляльчи кышнозэ дас кык люкетлы вандылӥз, люкетэн-люкетэн соосты ыстӥз Израильлэн вань палъёсаз.30Ваньзы тае адӟыса шуизы: «Египет музъемысь потэммы дырысен та нуналозь таӵеез адӟеммы но, кылэммы но ӧй вал». [Аслаз ыстэм муртъёсызлы таӵе косон сётӥз: «Вань Израиль выжыослы вералэ: куке но соку та выллем ужъёс вал-а ни?] Учкелэ, куспады кенеше но вералэ».
Глава 19