Выбрать язык
Книги Ветхого Завета
Книги Нового Завета
с русским текстом1Со вапумъёсы Израильлэн эксэез ӧй вал; со вакытэ Дан выжы аслыз улыны инты утчаса ветлӥз, уго солы та дырозь Израиль выжыос пӧлын улон инты ӧз на сюры.2Дан пиос ас выжыысьтызы, Цораысь, Естаолысь, вить кужмоесь воргоронъёсты музъем учкыны, тодыны ыстӥзы; соослы шуизы: «Мынэлэ, музъем учкелэ». Соос Ефрем гурезьысь Михалэн корка дораз вуизы, отын ик кӧлӥзы.3Михалэн корказ пукыкузы, егит левитлэсь куаразэ тодмазы, со доры пырыса юазы: «Кин тонэ татчы вайиз? Мар тон татын кариськод, малы тон татын?»4Со соослы шуиз: «Миха мыным сое но сое лэсьтӥз, со монэ медъяз, мон со дорын священник луисько».
5Соос солы шуизы: «Инмарлэсь юа, милям тодэммы потэ, кулэ интые мынон сюресмылэн азинлыкез луоз-а».6Священник соослы шуиз: «Каньылэн мынэ; кулэ интые мынон сюресты Кузё-Инмар азьын».
7Та вить воргоронъёс сюрес вылэ потӥзы но Лаисэ вуизы, отысь калыкез адӟизы; соос дыртӥсьтэмесь, шыпытэсь, уло каньылак, Сӥдонысь калыклэн сямъёсызъя; со музъемын ӧй вал соосты ултӥясьёс, соосын кузёяськисьёс; Сӥдонлы соос кыдёкын вал, нокинэн но нокыӵе ужъёс ӧз нуэ.
8[Та вить адямиос] асьсэлэн агай-вынъёссы доры Цорае, Естаолэ берытскизы; агай-вынъёссы соослэсь юазы: «Кыӵе иворен тӥ вуиды?»9Соос шуизы: «Ваелэ султоме но соос вылэ мыноме; музъем учкимы, со туж кельшымон; нош тӥ малпаськыса улӥськоды, ӝегатскыса эн улэ со музъемез люкетлы басьтыны.10Отчы вуиды ке, сюлэмшугъяськытэк улӥсь калыкез адӟоды, музъем отын бадӟым; Инмар сое тӥ киулэ сётэ; со сыӵе инты, кытын номырлы но ёрмыса улон ӧвӧл, музъем ваньзэ сётэ».
11Дан выжыысь Цора, Естаол каръёсысь куать сю воргоронъёс, ожмаськон тӥрлыкъёссэс кутыса, оже потӥзы.12Соос мынӥзы но Иудеяысь Кириаф-Иарим кар доры вуыса дугдӥзы. Соин ик со интыез туннэ нуналозь но «Данлэн сылон интыез» шуыса нимало. Со инты Кириаф-Иарим сьӧрын.13Отысен соос Ефрем гурезь пала кошкизы, Михалэн коркаез доры вуизы.14Лаис музъемез учкыны ветлэм вить воргоронъёс агай-вынъёссылы шуизы: «Тодӥськоды-а, татысь одӥгаз коркан вань ефод, терафим, сульдэр но ӵыжатыса лэсьтэм йыбыртъян маке? Озьыен, малпалэ, мар кароно».
15Сюрес вылысь отчы кожизы, Миха дорын улӥсь пинал левитлэн корказ пыризы, солы ӟеч кылъёс веразы.16Нош Дан выжыысь куать сю пиос, ожмаськон тӥрлыкъёссэс кутыса, капка дорын сылӥзы.17Музъем учкыны ветлэм вить пиосмуртъёс, корка пырыса, сульдэрез, ефодэз, терафимез, ӵыжатыса лэсьтэм йыбыртъян макеез кутӥзы. Священник капка дорын ожмаськон тӥрлыкъёсын сылӥсь куать сю воргоронъёс пӧлын сылӥз.18Михалэн корказ пырыса, соос сульдэрез, ефодэз, терафимез, ӵыжатыса лэсьтэм йыбыртъян макеез киязы кутэм бере священник соослы шуиз: «Мар тӥ лэсьтӥськоды?»19Соос солы шуизы: «Шып ул, ымдэ киыныд ворса но ми сьӧры мын, милемлы атай но, священник но лу; тыныд умойгес шат одӥг муртлэн корказ священник луыны, быдэс выжылы, Израильысь улылы-бечелы священник луон сярысь?»
20Священник шумпотӥз, ефодэз, терафимез, сульдэрез, [ӵыжатыса лэсьтэм йыбыртъян макеез] кутӥз но калыкен ӵош кошкиз.21Отысь потыса, соос азьлане кошкизы, азязы нылпиосты, пудоосты но секыт арбериосты лэзизы.
22Михалэн корка дорысьтыз кошкем бере [Миха но] солэн бускель коркаосысьтыз улӥсьёс, огазе люкаськыса, Дан пиос сьӧры уйиськыса мынӥзы.23Дан пиослы кесяськизы. [Дан пиос] берытскыса Михалы шуизы: «Мар тыныд кулэ, малы сокем черекъяськод?»24[Миха] шуиз: «Тӥ мынэсьтым лэсьтэм инмаръёсме басьтӥды, священникез но, асьтэос кошкиды; мар эшшо кулэ на? Малы юаськоды на, мар мыным кулэ шуыса?»
25Дан пиос солы шуизы: «Шып ул, куарадэ но медам кылэ, а то ми пӧлысь куд-огезлэн вожез потоз но тӥ вылэ урдскозы, озьы тон астэ но, семьяостэ но быдтод».26Дан пиос мыноно сюрессы кузя азьлань вамыштӥзы; нош Миха адӟиз, соос солэсь кужмоесьгес шуыса, соку со гуртаз берытскиз.
27Нош [Дан пиос] Михалэсь лэсьтэм макеоссэ, со дорын улӥсь священникез бордазы кутӥзы но Лаисын улӥсь дыртӥсьтэм, шыпыт калык доры мыныса, вылазы урдскизы, мечъёсынызы соосты погыртӥзы, нош городзэс тылын сутӥзы.28Соослы нокин но юрттӥськыны ӧз быгаты, уго соос Сӥдонлы кыдёкын улӥзы, нокинэн но кусып ӧз возе. Лаис кар нёжалын, Беф-Рехов карлы матын сылэ вал. Выльысен город пуктӥзы но отчы улыны интыяськизы.29Городзылы ним сётӥзы: Дан, Израильлэн пиезлэсь, Дан атайзылэсь, нимзэ; азьвыл со город Лаис шуыса нимаськиз.
30Дан пиос асьсэлы сульдэр пуктӥзы; Манассиялэн Гирсон пиезлэн Ионафан пиез, солэн пиосыз, соосты та музъемысь мукет интые улыны интыятозь, Дан выжыын священникъёс вал.31Инмарлэн коркаез Сӥломын луон дыръя Дан пиос пырак ӵоже доразы Михалэсь лэсьтэм сульдэрзэ возизы.
Глава 18