Выбрать язык
Книги Ветхого Завета
Книги Нового Завета
с русским текстом1Ефрем гурезьын улӥз Миха нимо адями.2Со анаезлы шуиз: «Сюрс сю сӥкль азвесьтэ лушкамзы понна соосты каргамдэ мон кылӥ, нош со азвесь мон киын, мон сое басьтӥ». Соку солэн анаез шуиз: «Кузё-Инмар пиме бакель мед кароз».3Сюрс сю сӥкль азвесез со анаезлы берыктӥз. Анаез шуиз: «Та азвесез мон Кузё-Инмарлы сӥзисько пие понна, солэсь сульдэрзэ лэсьтыны, азвесез ӵыжатыса, йыбыртъян сульдэр лэсьтыны; тае тон кие сётӥсько».4Азвесьсэ анаезлы берыктӥз. Анаез кык сю сӥкль азвесьсэ кутӥз но азвесь ӵыжатӥсь кие сётӥз. Солэсь со сульдэр лэсьтӥз, азвесьлэсь ӵыжатэм йыбыртъян сульдэр, со Михалэн корказ сылӥз.5Михалэн вӧсяськон коркаез вал. Ефод*а, терафим*б лэсьтӥз но одӥгзэ пизэ священник луыны сӥзиз.
6Со вапумъёсы Израильлэн эксэез ӧй вал; котькуд адями малпа вал, шонер уж лэсьтӥсько шуыса.7Отын улӥз Иуда выжыысь Иудеяысь Вифлеем карын вордскем пинал пи, левит.8Та адями Иудеяысь Вифлеем карысь потӥз, со малпаз озьы улыны, кызьы кылдоз; сюрес кузя мынон сямен со вуиз Ефрем гурезьысь Михалэн корка дораз.9Миха солы шуиз: «Кытысь тон потӥд?» Со шуиз: «Мон – левит, Иудеяысь Вифлеем карысь; кызьы кылдоз, озьы улыны потӥ».
10Миха солы шуиз: «Кыль мон доры улыны, тон мыным атай но, священник но лу, арлы быдэ мон тыныд дас сӥкль азвесь тыро, улыны тырмымон дӥськут, сиён сёто».11Левит со доры пыриз, со мылкыд кариз та адями доры кыльыны; со Михалы вордэм нылпиез радэ пыриз.12Миха та пинал левитэз священнике пуктӥз, со Миха дорын улӥз.13Соку Миха шуиз: «Табере мон тодӥсько, Кузё-Инмар мыным ӟеч ужъёс лэсьтоз шуыса, уго мон дорын священникын – левит».
*а 17:5 ефод – архиерейлэн выл дӥсянэз;
*б 17:5 терафим – корка пушкын возиськись, мунёлы укшась сульдэр-идол
Глава 17