Выбрать язык
Книги Ветхого Завета
Книги Нового Завета
с русским текстом1Огпол Самсон Газае лыктӥз, отысь азыса-калгыса улӥсь кышномуртэ адӟиз но со доры пыриз.2Газаын улӥсьёслы шуизы: «Самсон татчы лыктӥз». Сое котыртӥзы, кар капка дорын сое быдэс уй возьмаса потӥзы, быдэс уй ватӥськыса улӥзы, куспазы вераськизы: «Ӵук ӟардытозь витём, соку виём сое».
3Нош Самсон уйшорозь изиз, уйшор уе со султыса кар капкаез кутӥз, янакъёсыныз, ӟырыосыныз, тунгонъёсыныз валче сое ӝутӥз но, пельпумаз поныса, Хевронэ мынон сюрес дурысь гурезь йылэ нуиз, [отчы понӥз].4Собере со синмаськиз Сорек нёжалын улӥсь ныллы, солэн нимыз Далида вал.5Нылмурт доры филистим калыклэн кузёйыръёсыз лыктӥзы но солы шуо: «Либаты сое, тод: кытысь потэ солэн бадӟым кужымез, кызьы сое милемлы вормоно но думылыса зӥбыт-востэм кароно, нош со понна ми тыныд котькудмы быдэн сюрс сю сӥкль азвесь сётомы».
6Далида Самсонлы шуиз: «Вера мыным, кытысь потэ тынад та туж бадӟым кужымед, маин тонэ думылоно зӥбломытон понна?»7Самсон солы шуиз: «Монэ сизьым куасьмымтэ вуӝ-гозыен*а думылӥзы ке, соку мон мукет адямиос кадь ик кужымтэм луо».8Филистим калыклэн кузёйыръёсыз сизьым куасьмымтэ вуӝ-гозыосты вайизы, нош Далида соосын Самсонэз думылӥз.9Соос пӧлысь одӥгез ныллэн кӧлан интыяз ватӥськыса пукиз; Далида шуиз: «Самсон! Филистим пиос тон вылэ урдскыны лыкто». Со вуӝ-гозызэ тӥяз, тылын сутскыкуз кужлэсь черсэм сӥньыслэн тӥяськемез кадь. Самсонлэн кытысь потэ кужымез, соос тодыны ӧз быгатэ.
10Соку Далида Самсонлы шуиз: «Тон монэ ӧрекчад, пӧяськыса вераськид; вера мыным табере, маин тонэ думылоно?»11Со солы шуиз: «Кутылымтэ выль гозыосын монэ думылӥзы ке, соку мон мукет адямиос кадь ик кужымтэм луо».12Далида выль гозыос басьтӥз но Самсонэз думылӥз; солы шуиз: «Самсон! Филистим пиос тон вылэ урдскыны лыкто». Нош соос пӧлысь одӥгез ныллэн кӧлан интыяз ватӥськыса пукиз. Киысьтыз гозыоссэ Самсон сӥньысэз кадь чигтылӥз.
13Соку Далида Самсонлы шуиз: «Тон ялан монэ ӧрекчаськод, пӧяськыса вераськиськод; вера мыным, маин тонэ думылоно?» Самсон солы шуиз: «Йырысьтым сизьым йырси пунэтъёсме куоно дэраяд куид [но сое есо*б борды кортӵогад ке, соку мон мукет адямиос кадь ик кужымтэм луо]».14[Ал вылаз пуктыса, Далида сое умме уськытӥз. Со изьыку, Далида солэсь сизьым йырси пунэтсэ кияз кутыса,] соосты есо борды юнматӥз но Самсонлы шуиз: «Самсон! Филистим пиос тон вылэ урдскыны лыкто». Со сайказ но есоез дэраеныз валче ишкалтӥз; [Самсонлэн кытысь потэ кужымез соос тодыны ӧз быгатэ].
15Соку [Далида] Самсонлы шуиз: «Кызьы тон мыным вераны быгатӥськод ”яратӥсько” шуыса, нош сюлмыд мон бордын ӧвӧл? Тани, тон монэ куинь пол алдад ини, таки ӧд вера, кытысь потэ тынад та туж бадӟым кужымед».16Нуналлы быдэ кылыныз ёртыса, курадӟытыса воземезлы чидатэк, Самсонлэн лулыз-сюлмыз кулоно кадь ик секыт луиз.17Соку со, сюлэмзэ быдэсак усьтыса, Далидалы шуиз: «Бритва мынам йыр бордам ӧз на йӧтӥськылы, уго мон анаелэн пушкысьтыз потэме дырысен Инмарлэн назореез луисько; йырсиме ӵышкид ке, кужыме быроз, соку мон мукет адямиос кадь ик кужымтэм луо».
18Со сюлэмзэ быдэсак усьтӥз шуыса, Далида адӟиз но филистим кузёйыръёсты ӧтьыны ыстӥз, соослы шуиз: «Лыктэлэ табере, со мыным сюлэмзэ быдэсак усьтӥз». Далида доры филистим кузёйыръёс лыктӥзы, ки вылазы солы азвесь вайизы.19[Далида] ал вылаз Самсонэз умме уськытӥз, адямиез ӧтиз но Самсонлэсь сизьым йырси пунэтсэ ӵышкыны косӥз. Самсон лябӟыны кутскиз, солэн бордысьтыз кужымез кошкиз.
20Далида шуиз: «Самсон! Филистим пиос тон вылэ урдскыны лыкто». Самсон сайказ, со шуиз: «Мыно но азьло кадь ик мозмытско». Со ӧз тоды, Кузё-Инмар со дорысь палэнскиз шуыса.
21Филистим пиос сое кутӥзы но синъёссэ бышказы, Газае нуизы, отысен сое кык ыргон жильыен дурылӥзы; пытсэтэ сюремъёслэн юртазы со пызь изыса улӥз.
22Со виын ик йырысьтыз, ӵышкем бервылысьтыз, йырсиосыз будыны кутскизы.
23Филистим калыклэн кузёйыръёсыз асьсэлэн инмарзылы, Дагонлы, туж бадӟым курбон сётыны, шулдыръяськыны люкаськизы, соос шуизы: «Милям инмармы милесьтым тушмонмес, Самсонэз, киуламы сётӥз».
24Озьы ик калык но, сое адӟыса, инмарзэс данъяса шуизы: «Милям инмармы милесьтым тушмонмес, музъеммес тырттэм кельтӥсез, трос калыкмес виылӥсез, киуламы сётӥз».
25Сюлэмзы шулдырмем бере соос шуизы: «Татчы Самсонэз ӧте [пытсэт коркась], милемыз мед серекъятоз». Пытсэт коркась Самсонэз ӧтьыса вайизы, соосты со серекъятӥз, [мыскылляса бамаз чабкылӥзы], сое юбоос вискы султытӥзы.26Сое китӥз валтыса нуллӥсь егит пинал пилы Самсон шуиз: «Юртэз вылаз возись юбоос доры монэ ну, киыным йӧтӥськеме потэ, соос борды пыкъяськыса улыны мед быгатом». [Егит пи озьы ик лэсьтӥз].27Коркан тросаз пиосмуртъёс, кышномуртъёс вал; филистим калыклэн вань кузёйыръёсыз отын вал, липет йылын ог куинь сюрс пиосмуртъёс, кышномуртъёс Самсонлэсь калыкез серекъятэмзэ учкыса сылӥзы.
28Соку Самсон Кузё-Инмарлы вазиськыса шуиз: «Инмаре Кузё-Инмаре! Тодад вай вал монэ, кужым сёт вал мыным пичи дырлы ке но, эй, Инмаре! Кык синъёсы понна огкутскемен филистим калыклы пунэмме берыктыны мед быгатысал».29Коркалэн шораз сылӥсь кык юбоосты Самсон интыысьтызы вырӟытӥз, соос вылын юрт возиське вал; соос вылэ пыкиськыса, огзэ бур киыныз ӟыгыртӥз, мукетсэ – паллян киыныз.30Соку Самсон шуиз: «Филистим калыкен ӵош мон но мед кулом!» Вань кужмыныз юбоос борды пыкиськиз но кузёйыръёс вылэ, отчы учырам калык вылэ юрт пограз. Кулыкуз сомында калык быриз – улытозяз вань виылэм муртъёсызлэсь но тросгес.
31Агай-вынъёсыз, атай юртысьтыз вань калык лыктыса солэсь мугорзэ басьтӥзы но Цораен Естаол вискы атаезлэн, Манойлэн, шайгу вӧзаз ватӥзы. Со Израильын кызь ар ӵоже судья вал. [Самсон бере Емегар потӥз, Енанлэн пиез; со куать сю мурт калык пиосты вииз, пудоез лыдъятэк. Со Израилез утиз.]
*а 16:7 вуӝ-гозы – тетива
*б 16:13 есо (ткацк.) – навой; пришвица
Глава 16