Выбрать язык
Книги Ветхого Завета
Книги Нового Завета
с русским текстом1Кӧня ке нунал ортчыса, чабей аран вадесэ, Самсон кышно луонэныз адӟиськыны мынӥз, сьӧраз кечпи вайиз; соку со шуиз: «Пыро кышное доры, пыро солэн кӧлан интыяз», нош вылькенлэн атаез сое пырыны ӧз лэзьы.2Вылькенлэн атаез шуиз: «Мон малпай, тон сое адӟемпотостэм кариськод ни шуыса, соин ик мон сое тынад эшедлы сётӥ; тани солэн покчи сузэрез солэсь чебергес, со тыныд кышно мед луоз».
3Но Самсон соослы шуиз: «Филистим калык азьын мон табере янгыш уг луы, соослы мар ке но уродзэ лэсьтӥ ке».4Самсон потӥз но куинь сю ӟичыосты кутӥз; сэрегпумъёс басьтӥз, быжез быж борды думиз, кык быжъёс вискы сэрегпум думылӥз;5собере сэрегпумъёсты ӝуатӥз но ӟичыосты филистим калыклэн арано бусыосаз лэзиз; ӝуаса быризы ю кабанъёс но, арамтэ ю-нянь но, виноград бакчаос но, вӧйпу садъёс но.
6Филистим калык юалляськиз: «Кин тае лэсьтӥз?» Шуизы: «Фимнафа пилэн эмеспиез, Самсон, уго со кутӥз но Самсонлэсь кышно луонзэ солэн эшезлы сётӥз». Соку филистим калык мынӥз но кышномуртэз сутӥз, атаезлэсь [юртсэ] но.
7Самсон соослы шуиз: «Тае тӥ лэсьтӥды ке но, но мон тӥледлы асьтэлы пунэмзэ берыкто, соку гинэ буйгатско».8Соослэсь пыдъюмылъёссэс, кусъёссэс пыргытӥз, туж трос муртэ вииз, кошкиз но Етам изгурезьысь гуэ-пещерае улыны интыяськиз.
9Филистим пиос ӝутскизы но, Иудеяе мыныса, стан пуктӥзы, балаганъёссы Лехи дорозь кыстӥськизы.10Иудеяын улӥсьёс шуизы: «Мар пумысен тӥ милемлы пумит ӝутскиды?» Соос шуизы: «Ми Самсонэз кутыса думылыны лыктӥмы, лэсьтыны солы озьы, кызьы со милемлы лэсьтӥз».
11Иудеяысь куинь сюрс адями Етам изгурезьысь гу-пещера доры лыктӥз но Самсонлы шуиз: «Тон уд тодӥськы шат, филистим калык асьмемын кузёяськыса улэ шуыса? Мар тон таӵе милемлы дасяд?» Со соослы шуиз: «Мар монэн соос каризы, сое ик мон но соослы лэсьтӥ».
12Солы шуизы: «Ми тонэ думылыса филистим пиос кие сётыны лыктӥмы». Самсон соослы шуиз: «Монэ уд вие шуыса, кыл сётэ».13Солы шуизы: «Ум, ми тонэ думыломы но соослэн киулазы гинэ сётомы, нош виыны тонэ ми ум вие». Кык выль гозыен сое думылӥзы но изгурезьысь сое сьӧразы нуизы.14Лехи доры вуэм беразы филистим калык сое кесяськыса пумитаз. Со вылэ Кузё-Инмарлэн Духез васькиз но, соку кизэ думылэм гозыос ӝуам етӥн кадесь луизы, ки вылысьтыз думетъёсыз усьылӥзы.15Со ишаклэсь анлызэ шедьтӥз, кизэ кузь карыса, сое басьтӥз но со выль лыэн сюрс адямиез вииз.16Соку Самсон шуиз: «Ишаклэн анлыэныз адями уллёез, кык уллёез, ишаклэн анлыэныз сюрс адямиез мон вии».17Та кылъёссэ верам бере киысьтыз анлызэ куштӥз но та интыез Рамаф-Лехи*а шуыса нимаз.
18Ньылоныз пашмиз но, Кузё-Инмарлы вазиськыса, со шуиз: «Аслад ляльчиед пыр та бадӟым вормонэз Тон сётӥд, нош табере сюэ куасьмыса куло но вандӥськымтэослэн киулазы сюро».19Лехиын гу пасез Инмар усьтӥз но, отысь ву бызьыны кутскиз. Сюэз юзматозь юэм бераз солы кужым пыриз, улӟиз. Соин ик та интыез «Вазиськисьлэн ошмесэз» шуыса нимазы. Али но Лехиын та ошмес вань на.
20Филистим пиос кузёяськон вакытэ со кызь ар ӵоже Израильлэн судьяез вал.
*а 15:17 Рамаф-Лехи – «куштэм анлы» шуэм луэ
Глава 15