Выбрать язык
Книги Ветхого Завета
Книги Нового Завета
с русским текстом1Самсон Фимнафае мынӥз, Фимнафаын филистим кышноос пушкысь нылмуртэз адӟиз, [солы синмаськиз].2Со бертӥз но атаезлы, анаезлы тазьы ялӥз: «Фимнафаысь филистим кышноос пӧлысь нылмуртэз синйылтӥ, сое мыным кышно басьтэ».
3Атаеныз анаез солы шуизы: «Быдэс калыкмы пушкын, асьме кышноос пушкын кельшымон нылъёс ӧвӧл шат, малы тон вандӥськымтэ филистим адямиослэсь нылзэс кышно вайыны мынӥськод?» Соку Самсон атаезлы шуиз: «Сое мыным кышно басьты, мон солы синмаськи».
4Атаез но, анаез но ӧз тодэ уго, та Кузё-Инмарлэн эрикез луэ, Со филистим калыклы пунэм берыктыны амал утча шуыса. Нош со вакытэ филистим калык Израилез киултыса, соин кузёяськыса улӥз.5Самсон атаеныз, анаеныз ӵош Фимнафае мыныны потӥз; Фимнафаысь виноград бакчаос доры вуэм беразы, тани, солэн пумитаз пинал лев бурсыса лыктэ.6Соку Самсон вылэ Кузё-Инмарлэн Духез васькиз но со левез, кечпиез кадь, кесяса куштӥз, нош солэн кияз номыриз но ӧй вал. Атаезлы но, анаезлы но ӧз вера, мар со лэсьтӥз.7Мынӥз но нылмуртэн вераськиз, со Самсонлы кельшиз.
8Кӧня ке нунал ортчыса, со нош ик мынӥз, нылэз кышнолы вайыны шуыса; мыныкуз левлэсь шӧйзэ учкыны кожиз, но тани, лев вылын муш палэп пуке, чечыез вань.9Чечызэ кияз понӥз но сюрес кузя сое сиыса мынӥз; атаез, анаез доры вуэм бераз соослы но чечызэ сётӥз, соос сиизы; но соослы со ӧз вера, чечыез левпилэн шӧй вылысьтыз басьтэмын шуыса.
10Атаез курано ныл доры лыктӥз; Самсон отын [сизьым нуналъем] юондыр ортчытӥз, кызьы лэсьто мукет эмеспиос но.11Сое отысь адӟемзы бере солы куамын сюанчи пиосты эшлы бырйизы.
12Самсон соослы шуиз: «Тӥледлы мон мадиськон верало, сое тӥ сизьым юон нунал куспын шонер тодыны быгатӥды ке, соку мон тӥледлы куамын мертчан шортлэсь куэм дуно дэрем но куамын воштос дӥськут кузьмало;13нош мадиськонлэсь пуштроссэ тодыны ӧд ке быгатэ, соку тӥ мертчан шортлэсь куэм куамын дэрем, куамын воштос дӥськут мыным сётэ». Соос шуизы: «Мадиськондэ вера, ми кылзӥськом».
14Самсон соослы шуиз: «Сиись пушкысь сиыны ярамон сиён потӥз, кужмо пушкысь ческыт маке потӥз». Куинь нунал ӵоже мадиськонлэсь пуштроссэ усьтыны ӧз быгатэ.15Сизьыметӥ нуналаз соос Самсонлэн кышноезлы шуизы: «Кузпалдэ либаты, мадиськонлэсь пуштроссэ со милемлы мед вералоз, яке ми тонэ, атаедлэсь юртсэ но тылын сутомы; мар-о тӥ милемыз качаны ӧтиды-а?»16Самсон кышно картэз азьын бӧрдӥз, со шуиз: «Тон синазькыль кариськод, уд яратӥськы монэ; филистим калыкелэн пиосызлы тон мадиськон верад, нош мыным солэсь пуштроссэ уд вераськы». Со шуиз: «Атаелы, анаелы ӧй усьты пуштроссэ, тыныд-а усьтом?»
17Сизьым нунал юондыр мыныку, со ялан Самсон азьын бӧрдыса улӥз. Сизьыметӥ нуналаз мадиськонлэсь пуштроссэ кышно луонэзлы усьтоно луиз, со уго туж ёртыса куриз сое, нош та кышномурт ас филистим калыкезлэн пиосызлы мадиськонлэсь пуштроссэ усьтӥз.
18Сизьыметӥ нуналаз, шунды пуксемлэсь азьло, солы филистим пиос шуизы: «Мар ческытгес чечылэсь, кин кужмогес левлэсь!» Самсон соослы шуиз: «Мынам ветылэным тӥ ӧй ке гырысалды, мадиськонлэсь пуштроссэ усьтыны ӧй быгатысалды».
19Самсон вылэ Кузё-Инмарлэн Духез васькиз но, со Аскалон каре кошкиз, отысь куамын муртэ вииз но соослэсь дӥськутсэс кылиз, воштос дӥськутъёс но мадиськонлэсь пуштроссэ верасьёслы сётӥз. Пушказ йыркурез ӝуатскиз но, со атаез доры кошкиз.20Нош Самсонлэн кышноез сюан юонэ солы эшлы быръемъёс пӧлысь одӥгезлы бызиз.
Глава 14