Выбрать язык
Книги Ветхого Завета
Книги Нового Завета
с русским текстом1Израиль калык Кузё-Инмар азьын лек ужъёс лэсьтыса улӥз, со понна Кузё-Инмар соосты филистим калыклэн киулаз ньыльдон арлы сётӥз.
2Со виын Цора карын Дан выжыысь потэм Маной нимо адями улӥз; кышноез нылпи вайисьтэм вал, нылпи ӧз вайы.3Кузё-Инмарлэн Кылчинэз кышноез доры лыктӥз но солы шуиз: «Тани, тон нылпи вайисьтэм, нылпи вайыны уд быгатӥськы; но секытэн луод, пи нуны ваёд.4Озьыен, утиськы, вина но, сур но эн юы, дун-чылкыт луисьтэм сиёнэз эн сиы.5Тани, тон секытэн луод, пи нуны ваёд, бритва солэн йыр бордаз уз йӧтӥськы, вордӥськем дырысеныз ик со Инмарлэн назореез*а луоз, со Израилез филистим калыклэсь мозмытыны кутскоз».
6Кышноез лыктӥз но кузпалызлы шуиз: «Инмарлэн адямиез мон доры ветлӥз, солэн тусбуез Инмарлэн Кылчинэзлы укша, йӧно адӟиське; мон ӧй юа, кытысь со, со но ӧз вера аслэсьтыз нимзэ.7Со мыным шуиз: ”Тани, тон секытэн луод, пи нуны ваёд. Вина но, сур но эн юы, дун-чылкыт луисьтэм сиёнэз эн сиы, малы ке шуоно нуныед вордскем дырысеныз кулытозяз Инмарлэн назореез луоз”».
8Маной Кузё-Инмарлы вӧсяськыса шуиз: «Кузё-Инмаре! Ми доры нош ик мед лыктоз Инмарлэн адямиез, кудзэ Тон ыстылӥд, со милемыз мед дышетоз, вордӥськоно нуныенымы мар кароно».
9Манойлэсь куаразэ Инмар кылӥз, соку Инмарлэн Кылчинэз нош ик кышномурт доры, бусыын ужан дораз, лыктӥз, нош солэн картэз, Маной, соин ӵош ӧй вал.10Кышномурт соку ик картэз доры бызьыса мынӥз но ивортӥз: «Тани, нош ик азьвыл ветлэм мурт мон доры вуылӥз».11Маной султӥз но кышноеныз ӵош вамыштӥз, со адями доры вуыса, со шуиз: «Та кышномуртэн вераськись мурт тон-а со?» [Кылчин] шуиз: «Мон».12Соку Маной шуиз: «Озьыен, тынад верам кылыд быдэсмиз ке, со нуныен милемлы мар кароно, мар лэсьтоно?»13Кузё-Инмарлэн Кылчинэз Манойлы шуиз: «Кышноедлы малэсь утиськыны косӥ, мед утиськоз:14виноградпуд мар будэтэ, сое медаз сиы; вина но, сур но медаз юы; мар дун-чылкыт ӧвӧл, сое медаз сиы; кыӵе курон-косонъёс солы верай, ваньзэ быдэсъяса мед улоз».
15Маной Кузё-Инмарлэн Кылчинэзлы шуиз: «Яралоз ке, ми тонэ ӧжытак ӝегатысалмы: тыныд кечпи сӥль дасясалмы».16Кузё-Инмарлэн Кылчинэз Манойлы шуиз: «Тон монэ ӝегатыса возид ке но, мон тынэсьтыд няньдэ уг сиы; Кузё-Инмарлы тылын сутӥськись курбон сётэмед ке потэ, сёт сое». Маной ӧз тоды, та Кузё-Инмарлэн Кылчинэз луэ шуыса.17Маной Кузё-Инмарлэн Кылчинэзлы шуиз: «Кызьы тынад нимыд? Верам кылыд быдэсмиз ке, тыныд тау карыны мед быгатысалмы».18Кузё-Инмарлэн Кылчинэз солы шуиз: «Мар тон мынэсьтым нимме юаськод? Со паймымон».
19Маной кечпизэ, няньзэ кутӥз но соосты из вылысен Кузё-Инмарлы курбон сётӥз. Инмар паймымон уж лэсьтӥз, сое Маной кышноеныз ӵош адӟизы.20Курбон сётон интыысен тыл кылъёс ин пала ӝутскыны кутскем бере Кузё-Инмарлэн Кылчинэз курбон сётонысь потӥсь тылын ӝутӥськиз. Тае адӟыса, Маной кышноеныз ӵош ымныр вылазы выдӥзы.21Манойлэн, солэн кышноезлэн син азьысьтызы Кузё-Инмарлэн Кылчинэз ышиз. Соку Маной тодӥз, та Кузё-Инмарлэн Кылчинэз вал шуыса.22Маной кышноезлы шуиз: «Зэм, асьмеос куломы, Инмарез адӟимы ук».23Кышноез солы шуиз: «Кузё-Инмар асьмемыз виыны малпасал ке, асьме киысь тылын сутӥськись курбонэз, нянь курбонэз кабыл ӧй басьтысал, ӧй но возьматысал ваньзэ тае, ӧй но усьтысал ваньзэ тае».
24Кышноез нуны вайиз но солы Самсон ним сётӥз. Нуны будӥз, Кузё-Инмар сое бакель карыса будэтӥз.25Кузё-Инмарлэн Духез со пыр Цораен Естаол вискысь Дан выжылэн сылон интыяз кужымзэ возьматыны кутскиз.
*а 13:5 назорей – Инмарлы сӥзиськем мурт (Лыд. 6:1-5)
Глава 13