Выбрать язык
Книги Ветхого Завета
Книги Нового Завета
с русским текстом1Массифаысен израиль пиос кыл сётӥзы: ми пӧлысь одӥг мурт но нылзэ Вениамин пиослы кышнолы уз сёты.
2Калык Инмар корка лыктӥз но отын ӝытозь Инмар азьын пукиз, куаразэс бадӟым карыса, кужмо бӧрдыны кутскизы,3шуизы: «Кузё-Инмармы, Израильлэн Инмарез! Малы Израильын тазьы луиз – ӧвӧл ни табере Израильлэн одӥгез выжыез».
4Ӵуказеяз ӵукна калык вазь ик султӥз но курбон сётон ӝӧк лэсьтӥз, собере тылын сутӥськись курбонъёс, тупаса улонлы сӥзем курбонъёс сётӥзы.
5Израиль пиос шуизы: «Кузё-Инмар азе Израильлэн вань выжыосыз пӧлысь та люкаськонэ кин ӧз лыкты?» Туж секытэсь карган кылъёс верамын вал Массифае, Кузё-Инмар азе лыктымтэослы, верамын вал, соос виемын луозы шуыса.
6Израиль пиослы Вениамин братсы жаль потӥз, соос шуизы: «Туннэ Израиль бордысь одӥг выжы ӵогыса уськытэмын;7кышноос пумысен, кылем люкетэныз ма кароно асьмелы, Кузё-Инмар азьын кыл сётӥмы уго, нылъёсмес соослы кышнолы ум сётэ шуыса?»8Шуизы: «Массифае, Кузё-Инмар азе Израиль выжыос пӧлысь ваньмыз ветлӥз-а?» Тодмо луиз: Кузё-Инмар азе Галаадысь Иавис карысь та люкаськонэ нокин но ветлымтэ.9Котыр ласянь калыкез эскеризы-чаклазы но тодӥзы: Галаадысь Иавис карысь одӥг адями но ӧй вал.
10Люкаськем калык отчы дас кык сюрс кужмоесь воргоронъёсты ыстӥз но таӵе косон сётӥз: «Мынэлэ, Галаадысь Иавис карын улӥсьёсты – кышномуртъёссэс но, нылпиоссэс но – мечен коралэ.11Тани, тӥ мар каре: вань пиосмуртъёсты, пиосмуртэн кӧлам вань кышномуртъёсты виылэ, [нош пиосмуртэз тодымтэ нылъёсты улэп кельтэ». Озьы ик каризы].
12Галаадысь Иавис карысь соос пиосмуртэн кӧламтэ ньыль сю егит нылъёсты шедьтӥзы, соосты сылон интыязы, Ханаан музъемысь Сӥлом каре, вайизы.13Вань люкаськем калык Риммонысь изгурезе пегӟем Вениамин пиосын вераськыны ас адямиоссэ ыстӥз, соослы тупаса улон ялӥз.14Соку Вениамин пиос [израиль пиос доры] берытскизы, нош [израиль пиос] соослы Галаадысь Иавис карысь улэп кылем нылкышноосты сётӥзы; но соос ваньмызлы ӧз сюре.
15Калыклэн Вениамин выжы пумысен сюлмыз вӧсь луиз, Кузё-Инмар Израиль выжыосты ваньзэс быдэс ӧз возьы шуыса.16Люкаськонысь тӧроос шуизы: «Мар кароно кышнотэк кылем воргоронъёсын, Вениамин выжыысь нылкышноос быдтэмын уго?»17Соку шуизы: «Люкет музъем улэп кылем Вениамин пиос кие мед кылёз, Израильлэн выжыез медаз быры;18нош ми нылъёсмес соослы кышнолы сётыны ум быгатӥське, уго израиль пиос кыл сётыса шуизы: ”Вениамин выжые кин нылзэ кышнолы сётоз, со мурт каргамын мед луоз”».
19Соку шуизы: «Арлы быдэ Сӥломын Кузё-Инмарлэн праздникез луэ; Сӥлом интыяськемын Вефильлэн уйпалаз, Вефильысь Сӥхеме нуись сюреслэн шундыӝужан палаз, Левоналэн лымшораз».
20Вениамин пиослы таӵе косон сётӥзы: «Мынэлэ виноград бакчае но отчы ватӥське.21Чаклаське, Сӥломысь нылъёс шудон пӧлы эктыны люкаськизы ке, соку тӥ виноградпуд улъёсысь потэлэ но ваньды асьтэлы Сӥлом нылэз кышнолы кутэ, собере Вениамин музъемады мынэ.22Со нылъёслэн атайёссы, агай-вынъёссы ми доры урттылӥськыны лыктӥзы ке, ми соослы шуомы: ”Соос понна милемыз простить каре, уго ожмаськон дыръя котькудзылы соослы ми кышно ӧм басьтэ, тӥ но соослы ӧд сётэ; табере тӥ янгыш луиськоды”».
23Вениамин пиос озьы ик каризы: ваньзы соос эктӥсьёс пӧлысь асьсэлы кышно лушказы, собере ас музъемазы берытскизы, городъёс пуктылӥзы, отын улыны кутскизы.
24Со виын ик израиль пиос ваньзы асьсэлэн выжыоссы, улыоссы доры берытскизы, асьсэлэн вордскем музъемазы берытскизы.
25Со вапумъёсы Израильлэн эксэез ӧй вал; ваньзэ ас тодэмзыя лэсьтылӥзы, мае соос та шонер уж луэ шуыса лыдъяло вал.
Глава 21