Выбрать язык
Книги Ветхого Завета
Книги Нового Завета
с русским текстом1Судьяос кивалтон аръёсы музъем вылэ сютэм ар вуиз. Соку Иудеяысь Вифлеем карысь одӥг адями аслаз кышноеныз но кык пиосыныз ӵош Моав музъеме улыны кошкиз.2Со муртлэн нимыз вал Елимелех, кышноезлэн нимыз Ноеминь, нош кык пиосызлэн нимъёссы – Махлон но Хилеон; соос вал Иудеяысь Вифлеем карысь Ефрафа выжыысь. Соос Моав музъеме лыктӥзы но отчы улыны кылизы.
3Ноеминьлэн кузпалыз Елимелех кулӥз, кык пиосыныз со улыны кылиз.4Моав нылъёсты соос кышно басьтӥзы, огезлэн нимыз Орфа, нош мукетызлэн – Руфь; отын соос ог дас ар пала улӥзы.5Бӧрысьгес [солэн] кыкез ик [пиосыз], Махлон но Хилеон, кулӥзы; та кышномурт пиосыз бере, картэз бере но улыны кылиз на.
6Кенъёсыныз ӵош со Моав музъемысь берен кошкиз, уго Моав шаерын со кылӥз, Инмар Аслаз калыкез доры вуылӥз но соослы нянь сётӥз шуыса.7Азьвыл улэм интыысьтыз со кошкиз, кыкез ик кенъёсыз но со сьӧры мынӥзы. Иудей музъеме берытскон дыръязы, сюрес кузя мыныкузы,8Ноеминь кык кенъёсызлы шуиз: «Мынэлэ, анайёстылэн юртазы берытске; Кузё-Инмар тӥледлы гажан-жалянзэ мед возьматоз, кызьы тӥ гажан-жаляндэс возьматӥды кулэмъёслы но, мыным но.9Кузё-Инмар тӥледлы кыкнадылы ик кузпал дорын каньылэн, кышкатэк улон инты мед сётоз!» Кыксэс ик чупаз, нош соос куараен бӧрдыны кутскизы.10Соос шуизы: «Ум берытске, ми тонэн ӵош тынад калыкед доры мыномы».
11Нош Ноеминь шуиз: «Берытске, нылъёсы. Малы кулэ тӥледлы мон сьӧры мыныны? Тӥледлы кузпал луон понна мынам пушкам пи нуныосы вань шат?12Берытске, нылъёсы, берытске, мон уго пересь ини бызьыны; мон шуысал ке но, мынам вань али оскиськонэ, та уез кузпалэн ке но кӧлысал, собере пи нуныос вайысал ке, –13соос быдэ вуытозь, возьмаса улысалды-а? Ӝегатӥськыса, бызьытэк улыны тӥледлы яра шат? Ӧвӧл, нылъёсы, тӥ понна мон туж чигиськисько, уго Кузё-Инмарлэн киыз мон доры вӧсь карыны вуиз».
14Соос нош ик куараен бӧрдыны кутскизы. Соку Орфа картэзлэн анаеныз люкиськиз, [со ас калыкез доры берытскиз], нош Руфь анайзы борды кылиз.15[Ноеминь Руфьлы] шуиз: «Тани, кенакед ас калыкез доры, аслаз инмаръёсыз доры берытскиз, тон но кенакед бӧрсьы ас калыкед доры берытскы».16Нош Руфь шуиз: «Эн ёрты монэ, дорысьтыд кошкыны косыса, гуртам бертыны косыса; кытчы тон мынод, мон но отчы ик мыно, кытын тон улод, мон но отын ик уло; тынад калыкед – мынам калыке луоз, тынад Инмаред – мынам Инмаре луоз;17кытчы тон кулод, мон но отчы ик мед кулом, отчы ик монэ но мед ватозы; Кузё-Инмар мыным сое но, тае но лэсьтӥз ке, эшшо но тросгес лэсьтоно луиз ке; кулон гинэ монэ тынэсьтыд мед люкоз».18[Ноеминь] солэсь бӧрсяз мыныны юн мылкыдзэ адӟиз но сое либатэмысь дугдӥз.
19Кыкназы ик ӵош вамыштӥзы, Вифлееме вуизы. Вифлееме вуэм беразы быдэс город бугырскиз, ог-огзылэсь юазы: «Та Ноеминь-а?»20Ноеминь соослы шуиз: «Эн нималэ монэ Ноеминь*а шуыса, нималэ монэ Мара*б шуыса, уго Дунне Кутӥсь Инмар мон доры туж бадӟым куректон-кайгу лэзиз;21татысь мон ваньбурен потӥ вал, нош берыктӥз монэ Кузё-Инмар буш киын; малы монэ Ноеминь шуыса ниманы кулэ, куке мыным Кузё-Инмар курадӟон сётӥз, Дунне Кутӥсь Инмар шудтэм улон лэзиз?»
22Ноеминь дораз бертӥз, солэн сьӧраз кенэз – моав ныл, Руфь – лыктӥз, Моав музъемысь со лыктӥз; Вифлееме соос йыды аран кутскон вакытэ вуизы.
*а 1:20 Ноеминь – «синмаськымон» шуэм луэ;
*б 1:20 Мара – «курыт» шуэм луэ
Глава 1