Выбрать язык
Книги Ветхого Завета
Книги Нового Завета
с русским текстом1Ноеминьлэн картэзъя туж сӥё-дано, Елимелех выжыысь ӵыжы-выжыез вал, солэн нимыз Вооз.2Моав ныл Руфь Ноеминьлы шуиз: «Бусые мыныса утчало ай, кин мыным ӟеч мылкыдзэ возьматӥз, солэн пытьы кузяз шеп бичаса мыно». Ноеминь солы шуиз: «Мын, нылы».3Бусые вуиз но арасьёслэн бервылысьтызы шеп бичаны кутскиз. Озьы кемдӥз: та бусылэн люкетэз Елимелех выжыысь Воозлэн вал.4Тани, Вооз Вифлеемысь вуиз но арасьёслы шуиз: «Кузё-Инмар тӥледын!» Соос шуизы: «Кузё-Инмар тонэ бакель мед кароз!»
5Арасьёсын кивалтыны пуктэм медоезлэсь Вооз юаз: «Кинлэн та нылмуртэз?»6Арасьёсын кивалтӥсь медо шуиз: «Та – моав ныл, со Ноеминь сьӧры Моав музъемысь татчы лыктӥз;7со мыным шуиз: ”Арасьёслэн культо октэм бервылысьтызы мыныса шеп бичало ай”; лыктӥз но вазь ӵукнаысен ик ини со татын; дораз ӧжыт гинэ улэ».
8Вооз Руфьлы шуиз: «Кылзы, нылы, мукет бусыосы бичаськыны эн ветлы, татысь эн кошкылы, мынам медо нылъёсыным огазьын ужа.9Соослэсь арано бусызэс син азяд возь, соос сьӧрын ветлы; медоосылы верай, соос тонэ медаз йӧтылэ шуыса; сюэд куасьмиз ке, ву возён сосудъёс доры мын но ю, кытысь омыръяло мынам медоосы».10Руфь ымныр вылаз выдӥз, музъемозь йыбырттӥз но солы шуиз: «Мар понна тон та быдӟа гажан-жаляндэ мыным возьматӥськод, монэ санэ понӥськод, мон мурт калык пӧлысь потэмын ук?»11Вооз, ответ сётыса, солы шуиз: «Мыным ваньзэ веразы, кызьы тон кузпалыд кулэм бере анаеныды улӥд, кызьы тон вордэм атайдэ, анайдэ, вордскем шаердэ кельтӥд но мурт калык доры лыктӥд, кудзэ тон толон но, толон валлян но уд тодӥськы вал;12та ужед понна Кузё-Инмар тыныд тыр берекетсэ мед сётоз, Израильлэн Инмарез Кузё-Инмар, Кин доры тон лыктӥд Солэн бурд улаз буйгатскон шедьтон понна, бадӟым медзэ-кузьымзэ тыныд мед сётоз!»13Руфь Воозлы шуиз: «Тынад гажась-жалясь син азьысьтыд медам усьы, кузёе! Тон монэ буйгатӥд, ляльчиедлэн сюлмызлы кельшымон кылъёс верад, одӥг ляльчиеныд но оградэ султыны мон уг сылӥськы ке но».
14Солы Вооз шуиз: «Нуназе карон дыр вуиз, лыкты татчы, уксусэ веттылыса, няньдэ си». Руфь арасьёс вӧзы пуксиз. Вооз солы нянь сётӥз; сииз, кӧтыз тыриз, эшшо кылиз на.15Руфь бичаськыны султӥз. Аслаз медоосызлы Вооз таӵе косон сётӥз: «Культоос вискысь но мед бичалоз, сое унь-мань эн каре,16культо пушкысь но шепез ишкалтыса солы кельтылэ, мед бичалоз [но мед сиёз], эн тышкаське сое».
17Озьы со ӝытозь бусыын бичаськиз, бичамзэ кутсаз, одӥг ефа мында йыды тысь люкаськиз.18Тысьсэ ӝутыса, город пала вамыштӥз, анайзы солэсь бичам ю тысьсэ адӟиз. Кӧтыз тырем бере кылем люкетсэ [Руфь гадьысьтыз] поттӥз но солы сиыны сётӥз.19Анайзы солы шуиз: «Кытын тон туннэ бичаськид, кытын ужад? Бакельлыко мед луоз тонэ кабыл басьтӥсь мурт!» [Руфь] анайзылы вераз кин дорын ужамзэ, со шуиз: «Кин дорын мон туннэ ужай, солэн нимыз Вооз».20Ноеминь кенэзлы шуиз: «Кузё-Инмар сое бакель мед кароз улэпъёсты но, кулэмъёсты но гажам-жалямез понна!» Ноеминь шуиз: «Со – асьмелэн матысь муртмы; ӵыжы-выжыосмы пӧлысь одӥгез».21Моав ныл Руфь [анайзылы] шуиз: «Со эшшо тазьы но шуиз на: ”Аранме быдтытозязы, медо кышномуртъёсыным огазьын лу”».22Руфь кенэзлы Ноеминь шуиз: «Туж умой луоз, нылы, солэн медо кышноосыныз огазьын ветлӥд ке, мукет бусыосын соку тонэ уз ни ултӥялэ».23Озьы со, йыды аран бырытозь, чабей аран бырытозь, Воозлэн медоосыныз валче ужаз, [ю шеп] бичаз; картэзлэн анаез дорын улӥз.
Глава 2