Выбрать язык
Книги Ветхого Завета
Книги Нового Завета
с русским текстом1Ноеминь, картэзлэн анаез, солы шуиз: «Нылы, тыныд умой мед луоз шуыса, тыныд каньылэн, кышкатэк улон инты ум утча-а?2Тани, Вооз, асьмелэн ӵыжы-выжымы, кинлэн медоосыныз огазьын тон ужад, та уй итымаз йыдызэ тӧлэ.3Мисьтӥськы, ческыт зыно вӧен зыраськы, [чебер] дӥськуттэ дӥся, итыме мын, со сиыса, юыса дугдытозяз, солы эн возьматскы;4изьыны выдӥз ке, тод выдон интызэ; соку мын но пыд дорысьтыз шобретсэ ӝут, пыд выжыяз выд; со вералоз, мар тыныд карыны кулэ».5[Руфь] шуиз: «Мар тон мыным верад, ваньзэ быдэсто».
6Итыме мынӥз но лэсьтӥз ваньзэ озьы, кызьы косӥз анайзы.7Вооз кӧтсэ тыриз, сюзэ юзматӥз но мылкыдыз капчи луиз, мыныса кабан выжые изьыны выдӥз. Руфь шыпытэн лыктӥз, пыд выжыысьтыз шобретсэ ӝутӥз но шыпытак отчы выдӥз.8Уйшоре Вооз куалектыса сайказ, ӝутскиз но адӟиз: солэн пыд выжыяз кышномурт кылле.9[Вооз солэсь] юаз: «Кин тон?» Со шуиз: «Мон – Руфь, тынад ляльчиед, бурдыныд ляльчидэ шобырты, тон милям ӵыжы-выжымы ук».10[Вооз] шуиз: «Нылы, тонэ [Инмар] Кузё-Инмар бакель мед кароз! Та берпуметӥзэ ӟеч уждэ, азьвылэз сярысь но ӟечгес лэсьтӥд – егит пиосты утчаны ӧд мыны – начаръёссэ но, узыръёссэ но.11Нылы, эн кышка, мае тон курид, ваньзэ быдэсто, уго мынам калыкелэн вань капка выжыосаз, тон ӟеч сямо кышномурт луиськод шуыса, ваньмыз тонэ тодо.12Зэм, мон тӥляд ӵыжы-выжыды луисько, но вань на мынэсьтым но матысез ӵыжы-выжыды.13Та уйдэ татын ик ортчыты, нош ӵуказе со тонэ кутӥз ке, умой луоз, ас бордаз мед кутоз; со тонэ кулэ ӧз ке кары, мон тонэ ас бордам куто. Улэп Кузё-Инмар! Ӵукнаозь кӧл».
14Руфь солэн пыд выжыяз ӵукнаозь кӧлӥз, ог-огзэс тодмамлэсь азьло Руфь пыд йылаз султӥз. Соку Вооз шуиз: «Нокин но медаз тоды, кышномурт итымам вуылӥз шуыса».15Вооз солы шуиз: «Вылысь дӥсяндэ вай татчы, кутыса возь». Руфь кутыса возиз. Вооз [солы] куать мертэт йыды сётӥз, Руфь вылэ ошиз но городэ кошкиз.
16Нош [Руфь] анайзы доры берытскиз. Анайзы [солы] шуиз: «Мар ни, нылы?» Руфь ваньзэ вераз, ма кариз Вооз.17Руфь [анайзылы] шуиз: «Со мыным та куать мертэт йыды сётӥз но шуиз: ”Анайды доры буш киын эн мыны”».18Ноеминь солы шуиз: «Ужъюгдурлэсь йылпумъяськемзэ тодытозяд, возьма, нылы, уго та адями туннэ ужзэ йылаз-пумаз вуттытозь, тэк уз пукы».
Глава 3