Выбрать язык
Книги Ветхого Завета
Книги Нового Завета
с русским текстом1Вооз кар капка доры потӥз но отчы пуксиз. Тани, вӧзтӥз ортче ӵыжы-выжыез, со сярысь вераз вал Вооз. Со муртлы [Вооз] вазиськиз: «Пыр татчы, пуксьы». Со пыриз но пуксиз.2Кар тӧроос пӧлысь [Вооз] дас муртэ люказ но соослы шуиз: «Татчы пукселэ». Соос пуксизы.3[Вооз] ӵыжы-выжы пиезлы шуиз: «Моав бусыысь берытскем бераз Ноеминь Елимелех агаймылэсь бусы люкетсэ вуза;4тынад пеляд пырымон вераськоно кариськи: татын пукисьёслэн син азязы, калыкелэн тӧроосызлэн син азязы басьты; басьтэмед ке потэ, басьты, нош уг ке поты басьтэмед, мыным вера, мон соку тодо; уго тон сяна, нокинлы сое басьтыны, нош тон бере – мон». Соиз шуиз: «Мон басьтӥсько».
5Вооз шуиз: «Ноеминьлэсь бусызэ басьтӥд ке, Руфьлэсь но, моав ныллэсь, люкетсэ басьтыны кулэ луод, со (Ноеминьлэн) кулэм пиезлэн кышноез, сое тон кышно басьтыны кулэ кулэм муртлэсь нимзэ ас люкет музъемаз улӟытон понна».6Ӵыжы-выжы луись пи шуиз: «Аслэсьтым люкет музъемме куашкатонтэм понна сое кышно басьтыны уг быгатӥськы; тон сое ас бордад кут, мон сое ас бордам кутыны уг быгатӥськы».
7Вазен Израильын басьяськыкузы, вошъяськыкузы, ужлэсь ортчемзэ возьматон понна таӵе сям вал: одӥг мурт пыдкутчанзэ кыле но мукетызлы сётэ вал [ӵыжы-выжы луон правозэ уже кутӥсь муртлы], Израильын ужъёсты тазьы юнматылӥзы.8Ӵыжы-выжы луись пи Воозлы шуиз: «Аслыд басьты». Пыдкутчанзэ кылиз [но Воозлы сётӥз].
9Соку Вооз тӧроослы, вань люкаськем калыклы шуиз: «Табере тӥ адӟисьёс луиськоды, кызьы мон Ноеминьлэсь быдэссэ Елимелех киулэ шедем музъемзэ басьтӥсько, Хилеонлэсьсэ но, Махлонлэсьсэ но басьтӥсько;10Махлонлэсь кышнозэ моав нылэз Руфез аслым кышнолы басьтӥсько, кулэм картэзлэсь нимзэ солэн люкет музъемаз кельтон понна, солэн нимыз агай-вынъёсыз пӧлысь, улон интыезлэн капка дорысьтыз медаз ышы-быры; туннэ тӥ тае адӟисьёс луиськоды».
11Капка дорын сылӥсь вань калык, тӧроос шуизы: «Ми – адӟисьёс луиськомы; тынад коркад пырись кышномуртэз Кузё-Инмар Рахилен Лияез кадь мед кароз, соос Израиль выжыез юнматӥзы; Ефрафаысь узырлыкед мед потоз, Вифлеемын нимыд дано мед луоз;12тынад выжыед Фамарьлэн Иудалы вордскытэм Фареслэн выжыез кадь мед луоз, Кузё-Инмарлэн ӟечлыкеныз та егит кышномуртлэсь тыныд кужмо выжы мед потоз».
13Вооз Руфез кутӥз, со солы кышно луиз. Вооз со доры пыриз, Кузё-Инмарлэн ӟеченыз со секытэн луиз, пи нуны вайиз.14Кышномуртъёс Ноеминьлы шуизы: «Данлыко Кузё-Инмар, Со тонэ юрт утисьтэк ӧз кельты! Солэн нимыз Израильын дано мед луоз!15Со тынад шумпотон вайисед, пересьмон даурад сюдӥсед луоз, уго со нуныез тонэ яратӥсь кенэд вайиз, сизьым пиослэсь но со тон понна умойгес».16Та нуныез Ноеминь кияз кутӥз но гадь бордаз ӝиптыса нуллӥз, нуны утись луиз.17Бускель кышномуртъёс нунылы ним сётыса шуизы: «Ноеминьлэн пи нуныез вордскиз», солы Овид ним сётӥзы. Со Давидлэн атаезлэн Иессейлэн атаез луэ.
18Тани, Фареслэн выжыез: Фареслэсь Есром вордскиз;19Есромлэсь Арам вордскиз; Арамлэсь Аминадав вордскиз;20Аминадавлэсь Наассон вордскиз; Наассонлэсь Салмон вордскиз;21Салмонлэсь Вооз вордскиз; Воозлэсь Овид вордскиз;22Овидлэсь Иессей вордскиз; Иессейлэсь Давид вордскиз.
Глава 4