Выбрать язык
Книги Ветхого Завета
Книги Нового Завета
с русским текстом1Ефрем гурезьысь Рамафаим-Цофимын улӥз адями, солэн нимыз Елкана, со вал Цуфлэн Тоху пиезлэн Илий пиезлэн Иерохам пиезлэн пиез – Ефрафа карын вордскем мурт.2Солэн кык кышноез вал: огезлэн нимыз Анна, мукетызлэн – Феннана. Феннаналэн нылпиосыз вал, нош Анналэн – ӧй вал.3Кулэ нуналъёсы та адями Саваоф Кузё-Инмарлы йыбыртъяны, курбон сётъяны ас городысьтыз Сӥлом каре ветлылӥз. Отын вал [Илий] кык пиосыныз ӵош – Офниен но Финеесэн, соос Кузё-Инмарлэн священникъёсыз вал.
4Елкана курбон сётон дыръяз Феннана кышноезлы, вань пиосызлы, нылъёсызлы люкет сётылӥз.5Нош Анналы со нимысьтыз люкет сётылӥз, уго Аннаез со юнгес яратэ вал [Феннанаез сярысь, солэн нылпиосыз ӧй ке но вал], Кузё-Инмар солы нылпи вайыны быгатонлык ӧз сёты.6Феннана Аннаез туж ӝоже уськытылӥз, Анна ӝожъяськыны мед кутскоз шуыса, Кузё-Инмар солы нуны вайыны луонлык ӧз сёты шуыса.7Тазьы луэ вал арлы быдэ Кузё-Инмарлэн корказ ветлон дыръя: Феннана Аннаез ӝоже уськытылӥз, соин ик бӧрдэ, [ӝожъяське], уг но сиськы вал.8Соку солэн кузпалыз, Елкана, шуылӥз: «Анна!» [Анна шуэ вал: «Мон кылзӥсько». Елкана солы шуэ:] «Малы тон бӧрдӥськод, малы уд сиськиськы? Мар пумысен тынад сюлмыд куректэ? Тон понна мон дас пиослэсь умойгес ӧвӧл шат?»
9Сӥломын сиемзы, юэмзы бере Анна [Кузё-Инмар азе вӧсяськыны] султӥз. Со вакытэ Илий священник Кузё-Инмарлэн храмаз пырон дорысь пукон вылын пуке вал.10Лулыныз-сюлмыныз ӝожомыса, Анна Кузё-Инмар азьын вӧсяськиз, туж бӧрдӥз;11соку со тазьы кыл сётӥз: «[Ваньмызлэсь Кужмо Инмаре,] Саваоф Кузё-Инмаре! Ляльчиедлэн ӝожомыса улэмез шоры учкид ке, монэ тодад вайид ке, Ас ляльчидэ ӧд ке вунэты, ляльчи кышномуртэдлы пи нуны сётӥд ке, соку мон сое вань улон даурез ӵожелы Кузё-Инмарлы сёто; [вина но, сур но со уз юы], йырси бордаз качы но уз йӧтӥськы».
12Кузё-Инмар азьын кема вӧсяськыса улон дыръяз Илий солэн ым шораз учкыса улӥз.13Анна сюлмыныз куриськиз, ымзэ ӧжыт гинэ выретӥз, солэн куараез ӧз кылӥськы, соин ик Илий малпаз, та кышномурт кудӟемын, дыр, шуыса.14Соку Илий солы шуиз: «Кудӟем куеныд кема-а татын улод на? [Кузё-Инмарлэн син азьысьтыз кошкы.] Мын сазьтӥськы».15Анна ответ сётыса шуиз: «Ӧвӧл, кузёе, мон кудӟемын ӧвӧл, вина но, сур но мон ӧй юы, мон лулыным-сюлмыным куректыса улӥсь кышномурт; Кузё-Инмар азьын лулме-сюлэмме усьтӥсько.16Монэ, ляльчидэ, окты-калты кышномурт шуыса эн лыдъя, туж бадӟым куректонэ, ӝожен-курен улонэ сярысь татын мон вераса улӥ».17Илий солы ответ сётыса шуиз: «Каньылэн мын, Израильлэн Инмарез курондэ быдэстоз, мар тон Солэсь курид».18Анна шуиз: «Тон ляльчидэ гажаса-жаляса возь!» Собере со отысь кошкиз; сиськиз, азьло кадь ымнырыз ӝож тусъем ӧй ни вал.
19Ӵукна вазь ик султӥзы, Кузё-Инмарлы йыбырттӥзы но гуртазы, Рамае, берытскизы. Елкана Анна кышноеныз кӧлӥз, Аннаез Кузё-Инмар тодаз вайиз.20Кӧня ке дыр ортчыса, Анна секытэн луиз, пи нуны вайиз, солы Самуил ним сётӥз, уго со шуэ вал, Кузё-Инмарлэсь [Саваоф Инмарлэсь] мон сое курыса басьтӥ.21Солэн картэз, Елкана, быдэс семьяеныз ӵош мынӥз [Сӥломе], арлы быдэ сётоно курбонзэ, сӥзиськемъёссэ, [музъемысьтызы поттэм узырлыксылэсь дасэтӥ люкетсэ] нуыса.22Анна картэныз ӵош ӧз мыны, солы со шуиз: «Нуные нонэмысь дугдӥз ке, ӧжытак будӥз ке, мон сое нуо, со Кузё-Инмар азе султоз но пырак ӵожелы отчы кылёз».23Картэз, Елкана, солы шуиз: «Кызьы тыныд кулэ, озьы лэсьты; нонтыса будэтытозяд ул татын, [ымысьтыд потэм] кылъёстэ Кузё-Инмар кабыл мед басьтоз». Солэн кышноез гуртаз кылиз, нунызэ нонтыса пыд йылаз султытозязлы.
24Нуныез пыд йылаз султэм бере Анна Елканаен ӵош Сӥломе мынӥз, куинь ошпи, [няньёс], одӥг ефа пызь, одӥг сепыс вина сьӧраз нуиз. Сӥломе, Кузё-Инмарлэн корказ, вуиз, [пиез соин ӵош вал]; со пичи на вал.25[Пизэс Кузё-Инмар азе султытӥзы; Кузё-Инмарлы кыӵе кулэ со дыре ялан сётӥськись курбон, сыӵезэ атаез али но сётӥз. Пичи пиез татчы вайизы,] ошпиез вандӥзы; [Анна] пизэ Илий азе вайыса26шуиз: «Э, кузёе! Кема аръёс тон мед улод, кузёе! Мон – самой со кышномурт, кин тон вӧзын сылӥз но Кузё-Инмарлы вӧсяськиз;27та пие пумысен мон вӧсяськи, Кузё-Инмар мынэсьтым куронме быдэстӥз, мар мон Солэсь кури вал.28Мон сое вань улон даурез ӵожелы Кузё-Инмар кие сётӥсько, Кузё-Инмарлы ужаса-тыршыса мед улоз». Отысен со Кузё-Инмарлы йыбырттӥз.
Глава 1