Выбрать язык
Книги Ветхого Завета
Книги Нового Завета
с русским текстом1Анна вӧсяськиз, со шуиз:
«Кузё-Инмар бордын сюлмы шумпотэ;
Инмаре бордын кужыме юнма;
тушмонъёсылы пумит ымы паськыт усьтӥськиз,
уго мон Тынад утиськон сётонэдлы шумпотӥсько.
2Кузё-Инмар кадь дун-сьӧлыктэмез нокин но ӧвӧл;
уго Тон сяна, мукет Инмар ӧвӧл;
Инмармы кадь юнматскон инты ӧвӧл.
3Вылтӥяськыса трос эн вераське;
лекесь кылъёс ымысьтыды медаз потэ;
уго Кузё-Инмар ваньзэ тодӥсь Инмар,
вань ужъёс Со дорын мертасько.
4Кужмоослэн пукыӵсы чигиське,
нош кужымтэмъёс кужымен думисько.
5Кӧтсы тыремъёс нянь понна ужано луозы,
нош сютэмъёс – шутэтскозы;
нуны вайисьтэм сизьым пол нуны ваёз,
нош трос нылпиё мурт – шудэз уз адӟы.
6Кузё-Инмар вие, Со ик улӟытэ но,
адэ куштэ, Со ик отысь ӝутэ но.
7Кузё-Инмар кураськисе кельтэ, Со ик узырмытэ но,
покчи каре, Со ик ӝутэ но.
8Сюй пӧлысь Со куанерез ӝутэ, дэриысь кураськисез поттэ,
кузёйыръёсын соосты артэ пуктэ,
данлыклэсь престолзэ соослы люкетлы сётэ;
уго Кузё-Инмар киын музъемлэн инъетэз,
со вылэ Со быдэс дуннеез юнматӥз.
9Дун-чылкыт муртъёсызлэсь вамышъёссэс Со чакла-уте,
нош сьӧлыклэсь кышкасьтэмъёс пеймыт азе ышо-быро:
уго адями ас кужыменыз гинэ кужмо ӧвӧл.
10Кузё-Инмар Соин ченгешисьёсты ӵушыса куштоз;
инмысен соос вылэ гудыртоз.
[Кузё-Инмар дун-сьӧлыктэм.
Визьнодо аслаз визьмыныз медаз ушъяськы,
кужмо мурт но аслаз кужмыныз медаз ушъяськы,
узыр мурт но ас узырлыкеныз медаз ушъяськы;
ушъяськемез потӥсь мурт мед ушъяськоз Кузё-Инмарез тодэменыз, валаменыз.]
Кузё-Инмар быдэс дуннеез судить кароз,
Аслаз эксэезлы юнлык сётоз,
вӧйын зырӟыса пуктэмезлэсь кужымзэ вылэ ӝутоз».
11[Самуилэз отчы Кузё-Инмар азе кельтӥзы.] Соку Елкана ас дораз Рамае кошкиз, нош солэн пиез Илий священник вӧзы Кузё-Инмарлы ужаны-тыршыны кылиз.
12Нош аслаз Илийлэн пиосыз йӧнтэм адямиос вал; соос Кузё-Инмарез ӧз тодэ,13священникъёслэсь калык азьын лэсьтоно ужзэс но ӧз тодэ. Кин ке курбон вае ке, священник дорысь пинал пи, сӥль пӧзьыку, кияз вилка кутыса лыктэ но14сое пуртые, я кастрюляе, я табае, я горшоке донге, – мар сюре вилкае, сое священник аслыз басьтэ. Сӥломе лыктӥсь вань израиль калыклы тазьы лэсьтылӥзы.15Кӧй-вӧйзэ тылын сутэмлэсь азьло священник дорысь пинал пи лыктэ но курбон вайисьёслы шуэ: «Священниклы тыл вылын сӥльдэ пыжыны вай; пӧзьтэм сӥльдэ со уз басьты, ыльзэ вай».16Нош кин ке солы шуиз ке: «Нырысь ик, кызьы кулэ, озьы кӧй-вӧез мед сутозы, нош собере, кӧня тыныд кулэ, сомында ик басьты», соку со шуэ: «Ӧвӧл, али ик вай, ӧд ке сёты, кужмысь талало».17Та егит пиослэн Кузё-Инмар азьын сьӧлыксы туж бадӟым вал, уго соос Кузё-Инмарлы курбон сётонъёсты санэ ӧз понылэ.
18Самуил, егит пи, етӥнлэсь куэм ефод дӥсяса, Кузё-Инмар азьын служить кариз.19Вылысьтыз пичизэ дӥсянзэ солы анаез дасяз, арлы быдэ со выльзэ вайылӥз – сётоно курбонзэс вайыса картэныз лыктылыкуз.20Елканаез но солэсь кышнозэ Илий бакель карыса шуиз: «Кузё-Инмарлы пидэ сётэмед понна та кышномурт пыр Кузё-Инмар тыныд нылпиос мед сётоз!» Собере соос доразы бертӥзы.21Кузё-Инмар Анналы ӟечлыксэ возьматӥз но, та кышномуртлэн эшшо куинь пиез, кык нылыз вордскиз; нош Самуил, пинал пи, Кузё-Инмар азьын будӥз.
22Нош Илий туж пересь вал ини. Со кылӥз, кызьы солэн пиосыз израиль калыкен асьсэзыз возё, кызьы вӧсяськон скинияе пырон доры люкаськем нылкышноосын кӧлало.23Соку со соослы шуиз: «Малы тӥ таӵе ужъёсты лэсьтӥськоды? [Кузё-Инмарлэн] вань калыкезлэсь тӥ сярысь урод верамъёссэ мон кылӥсько?24Эй, нылпиосы, умойтэм ивор кылӥсько [тӥ сярысь, озьы эн ни лэсьтэ, умойтэм мынам кылэм иворе]; Кузё-Инмарлэсь калыксэ тӥ сьӧлыке пыртӥськоды.25Адями адямилы пумит сьӧлыказ ке, со адями понна Кузё-Инмар азьын вӧсяськозы; нош адями Кузё-Инмарлы пумит луись сьӧлык лэсьтӥз ке, со мурт понна кин дурбасьтоз?» Нош соос атайзылэсь верам кылзэ пелязы ӧз понэ, уго Кузё-Инмар малпаз ни соосты быдтыны.26Нош Самуил, егит пи, арескын бадӟымгес но бадӟымгес луиз, Кузё-Инмарлы но, адямиослы но ярамон будӥз.
27Инмар адями Илий доры лыктыса шуиз: «Тазьы шуэ Кузё-Инмар: атаедлэн выжыезлы Мон ӧй усьтӥськы-а, соос Египетын, фараон дорын улон дыръя?28Вань Израиль выжыос пӧлысь Мон сое Аслым священнике ӧй бырйы-а, курбон сётон интыям мед тубалоз, фимиамен мед ӵындытоз, Мон азьын ефод дӥсь мед нуллоз шуыса? Израиль пиослэн тылын сутэм вань курбонъёссы пӧлысь атаедлэн выжыезлы люкет ӧй сётылы-а?29Малы тӥ Мынэсьтым курбонъёсме, улон интыелы сӥзем салам няньёсме пыдыныды лёгаськоды, малы тон аслэсьтыд пиостэ Мынэсьтым вылӥе пуктӥськод, израиль калыкелэсь ваем курбонъёсызлэсь самой ческыт люкетъёссэ сиыса астэ куайытӥськод?30Соин ик Кузё-Инмар Израильлэн Инмарез тазьы шуэ: Мон соку шуи: тынад выжыед, атаедлэн выжыез пумтэм вапумъёс ӵоже Мынам азьтӥм ветлозы; нош али Кузё-Инмар шуэ: озьы медаз луы, уго Мон Монэ данъясьёсты данэ потто, нош Монэ сантэмасьёс возьытэ вуттэмын луозы.31Тани, тынэсьтыд выжыдэ, атаедлэсь выжызэ Мынам быдтон нуналъёсы вуо. Озьы луоз: тынад выжыяд [ноку но] пересь мурт уз ни луы;32Мынам улон юртэлэсь шугадӟонзэ тон адӟод, Кузё-Инмар Израильлы ӟечлык лэсьтыса улэ ке но, тынад выжыяд ноку но пересь мурт уз луы.33Аслам курбон тыронэ дорысь тынэсьтыдъёссэ ваньзэ уг быдты, тынэсьтыд синъёстэ уг жадьыты, лулдэ уг курадӟыты; тынад юртысьтыд вань выжы-кумыосыд шоро-куспо арлыдэ вуыса кулылозы.
34Тани, Офни но Финеес пиосыд вылын возьматсконо тодмет: кыксы но соос одӥг нуналэ кулозы.35Аслым оскиськымон священник пукто; со Мынам сюлмылы, лулылы ярамон ужъёс лэсьтыса улоз; солэсь выжызэ юнмато; вань нуналъёс ӵоже Мынам вӧйын зырӟыса пуктэме азьтӥ ветлоз.36Ваньзы тынад выжыысьтыд улэп кылемъёс, азвесь пыры понна, шорем нянь понна лыктыса, солы йыбыртъяса шуозы: ”Сиён-юон басьтыны мед быгатом шуыса, левийёслэсь ужзэс быдэсъясьёс пӧлысь кудзы ке но пӧлы монэ гожты”».
Глава 2