Выбрать язык
Книги Ветхого Завета
Книги Нового Завета
с русским текстом1Озьы Кузё-Инмарлэн ковчегез Филистим ёросын сизьым толэзь ӵоже улӥз, [соку со музъем вылэ пачылаз шыръёс вӧлмизы].2Соку филистим калык вӧсясьёсты, тунаськисьёсты, пелляськисьёсты ӧтьыса вайиз но соослы шуиз: «Кузё-Инмарлэн ковчегеныз милемлы мар кароно? Дышетэ милемыз, кызьы сое ас интыяз берыктыны».3Соосыз шуизы: «Израиль Инмарлэсь [Кузё-Инмарлэн сӥзён-косонэныз] ковчегзэ тӥляд лэземды потэ ке, сое номыртэк эн келялэ, Солы янгыш ужды понна курбон сётэ; соку бурмоды но тододы, мар понна Солэн киыз тӥ вылысь уг басьтӥськы».4Соос шуизы: «Янгыш уж понна кыӵе курбон сётоно Солы?» Соосыз шуизы: «Филистим кивалтӥсьёслэн лыдзыя, – вить зарни пыктосъёс, вить зарни шыръёс курбонлы сётоно; уго ваньды вылын, кивалтӥсьёсты вылын одӥг кадь вӧсь карон.5Озьыен, пыктосъёстэс, музъемез тырттэм кельтӥсь шыръёслэсь тусбуйзэс ӵыжатыса лэсьтэ но Израиль Инмарлы данъян кылъёстэс вералэ; оло нош Со Аслэсьтыз тӥ вылын, инмаръёсты вылын, музъемды вылын улӥсь кизэ капчигес кароз.6Кулэ-а тӥледлы египет калык музэн, фараон музэн сюлэмдэс лекомытыны? Кузё-Инмар Аслэсьтыз кужымзэ соос азьын возьматэм бере соку соос соосты кошкыны лэзизы, соос кошкизы.7Одӥг выль уробо лэсьтэ, али гинэ кунян ваем, сиес тырылымтэ кык скалъёсты уробое кытке, нош кунянъёссэс, бордысьтызы басьтыса, гуртэ нуэ.8Кузё-Инмарлэсь ковчегзэ басьтыса, уробо вылэ пуктэ, нош янгыш уж понна курбонлы дасям зарни арбериосты уроболэн урдэскысьтыз ящике понэ; лэзе сое, мед мыноз.9Учкелэ, со ас ёросаз, Вефсамисэ, мынӥз ке, соку со асьмелы та туж урод ужез лэсьтӥз шуыса тодомы; нош ӧз ке мыны, соку асьмеос тодомы, Солэн киыз асьмеды вӧсь ӧз кары, со так гинэ тупам учыр вал шуыса тодомы».
10Соос тазьы каризы: али гинэ кунян ваем кык скалъёсты кутӥзы но уробое кыткизы, нош кунянъёссэс ас доразы кельтӥзы.11Кузё-Инмарлэсь ковчегзэ уробое пуктӥзы, отчы ик пуктӥзы пыктослэн, шыръёслэн тусбуйёссылы укшатыса ӵыжатэм зарни арбериосты.12Скалъёс Вефсамисэ мынӥсь сюрес вылэ меӵак потӥзы: одӥг сюрес кузя мынӥзы но мынӥзы, бурсӥзы, бурпала но, паллян пала но чик но ӧз кожылэ; филистим кивалтӥсьёс, Вефсамис ёросэ вуытозь, ялан соослэн бӧрсязы мынӥзы.
13Соку Вефсамисын улӥсьёс улыг интыын чабейзэс арало вал. Йырзэс ӝутыса учкизы но Кузё-Инмарлэсь ковчегзэ адӟизы, сое адӟыса шумпотӥзы.14Кыткем уробо, Вефсамисын улӥсь Иисуслэн бусыяз вуыса, отчы дугдӥз. Отын бадӟым из кылле вал, уробоез пулы коразы, нош скалъёсты Кузё-Инмарлы, тылын сутыса, курбон сётӥзы.15Кузё-Инмарлэсь ковчегзэ, зарни арбериосын ящикез левийёс басьтӥзы но сое бадӟым из вылэ пуктӥзы. Вефсамисын улӥсьёс со нуналэ тылын сутӥськись курбонъёс сётӥзы, Кузё-Инмарлы, пудо вандыса, курбонъёс сётӥзы.16Филистим калыклэн вить кивалтӥсьёсыз тае адӟизы но та нуналэ Аккаронэ берытскизы.
17Янгыш уж понна Кузё-Инмарлы пыктослы укшатыса лэсьтэм зарни арбериосты вайизы: одӥгез Азот понна, одӥгез Газа понна, одӥгез Аскалон понна, одӥгез Геф понна, одӥгез Аккарон понна сётэмын вал.18Нош зарни шыръёс вить филистим кивалтӥсьёслэн городъёссылэн лыдзы мында дасямын вал – юнматэм каръёслэн но, юнматымтэ гуртъёслэн но лыдзы мында. Бадӟым из но, кудӥз вылэ Кузё-Инмарлэсь ковчегзэ пуктӥзы, та дырозь со Вефсамисысь Иисуслэн музъем вылаз сылэ.
19[Вефсамис воргоронъёсын ӵош Иехониялэн пиосыз, Кузё-Инмарлэсь ковчегзэ адӟиськомы шуыса, шум ӧз потэ.] Соку Со Вефсамисын улӥсьёсты Кузё-Инмарлэн ковчегез пушкы утчаськемзы понна погыртӥз, та калык пӧлысь витьтон сюрс сизьымдон муртэ вииз. Калык зар бӧрдӥз, уго Кузё-Инмар калыкез туж вӧсь кариз.20Соку Вефсамисын улӥсьёс шуизы: «Кузё-Инмар азьын, Та Дун-Сьӧлыктэм Инмар азьын, сылыны кин чидалоз? Асьме дорысь кин доры Со мыноз».21Соку Кириаф-Иарим карын улӥсьёс доры ас адямиоссэ тазьы вераны ыстӥзы: «Филистим калык Кузё-Инмарлэсь ковчегзэ берыктӥз; лыктэлэ ми доры, басьтэ сое асьтэ доры».
Глава 6