Выбрать язык
Книги Ветхого Завета
Книги Нового Завета
с русским текстом1Сауллэн эксэе пуксемез дырысен ар ортчиз, вуоно араз но со Израилен кивалтӥз, соку со израиль пиос пӧлысь куинь сюрс муртэ бырйиз:2кык сюрсэз Саулэн ӵош Михмасын но Вефиль гурезьын вал, сюрсэз Ионафанэн ӵош Вениамин музъемысь Гива карын вал; мукетсэ калыкез Саул гуртаз бертыны лэзиз.
3Гиваын сылӥсь филистим пиослэсь возьмаськись отрядзэс Ионафан пазьгиз; та сярысь филистим калык кылӥз, нош Саул быдэс кунэ гумыен пелляз, бадӟымен черекъяса: мед кылозы еврейёс!4Филистим пиослэсь возьмаськись отрядзэс Саул пазьгем бере филистим калык израиль калыкез адӟемпотостэм карыны кутскиз, вань израиль калык та сярысь кылӥз но Галгалэ Саул доры люкаськиз.
5Соку филистим калык Израильлы пумит ожен лыктыны дасяськиз: куамын сюрс ожмаськон уробоосын, куать сюрсэз вал вылын, – туж трос калык люкаськиз – зарезь дурысь луо мында; Беф-Авенлэн шундыӝужан палысьтыз Михмасэ вуыса, асьсэлы инты дасязы.6Кышкытлыке сюремзэс шӧдыса, израиль пиос уго котыртэмын вал, кин пещераосы, кин изгурезьёс вискы, каланчаос йылэ, гопъёсы пегӟылӥзы.7Еврейёс пӧлысь куд-огез, Иордан вамен потыса, Гад, Галаад шаеръёсы кошкизы; нош Саул соку Галгалын вал на, со котыре люкаськем вань калык туж кышкаса улӥз.8Самуиллэн пуктэм нуналозяз – сизьым нунал ӵоже – Саул сое витиз, нош Самуил Галгалэ ӧз вуы. Соку калык Саул дорысь пегӟыса кошкыны кутскиз.9Саул шуиз: «Тылын сутоно курбонэз, тупаса улон понна дасям курбонэз мон доры вае». Тылын сутӥськись курбонэз сётӥз.10Тылын сутӥськись курбонэз сётыса гинэ вуиз, тани, Самуил лыктэ. Сое ӟечкыланы шуыса, солэн пумитаз Саул потӥз.11Но Самуил шуиз: «Мар тон лэсьтӥд?» Саул тазьы ответ сётӥз: «Мон адӟи, кызьы мон дорысь калык пегӟе, нош тон верам дырад ӧд лыкты, филистим пиос нош Михмасэ люкаськизы.12Соку мон ас поннам малпай: ”Тани табере Галгалысен мон вылэ филистим пиос урдскозы, нош мон Кузё-Инмарлэсь ӧй куриськы на”, соин ик малпай тылын сутӥськись курбон сётыны».
13Самуил Сауллы шуиз: «Инмаредлэсь Кузё-Инмарлэсь тыныд сётэм косонзэ быдэстымтэеныд, урод лэсьтӥд. Соку Кузё-Инмар Израильын эксэй луыса пукондэ пырак ӵожелы юнматысал.14Нош табере эксэй луондэ утемед уз ни луы: Кузё-Инмар Ас сюлэмызлы кельшись пиосмуртэ шедьтоз, Ас калыкезлы кивалтӥсь луыны косоз, малы ке шуоно Кузё-Инмарлэсь косонзэ ӧд быдэсты».15Самуил султӥз но Галгалысь Вениамин музъеме, Гива каре, кошкиз; [кылемез калык Саул бӧрсьы соос вылэ урдскем тушмонлэн пумитаз Галгалысен Вениамин музъеме интыяськем Гива каре мыно вал]. Саул асэныз ӵош мынӥсьёсты лыдъяз: ог куать сю мурт вал.
16Саул Ионафан пиеныз, калыкен ӵош Вениамин музъемысь Гива каре дугдӥзы [но бӧрдӥзы]; филистим ожгарчиос Михмасын сылӥзы.17Филистим ожгарчиос пӧлысь музъемез тырттэм кельтыны куинь отряд потӥз: одӥгез Суаль ёросэ, Офрае нуись сюрес кузя мынӥз,18мукетыз отряд Веф-Орон сюрес кузя мынӥз, нош куинетӥез луоё кыр дунне пала, Цевоим нёжаллэн межа палаз нуись сюрес кузя мынӥз.
19Быдэс Израиль музъеме дурисьёс ӧз кыле, уго еврейёслэсь меч, шибоды лэсьтэмзылэсь филистим калык кышказ.20Израиль калык амезьёссэ, тӥръёссэ, вӧлӥськон-кораськон арбериоссэ, кукчооссэ шерыны филистим калык доры ветлыны кулэ вал,21куке амезьёссы, вӧлӥськон-кораськон арбериоссы, саникъёссы, тӥръёссы ныжомо яке йылсо корт бодыез тупатыны кулэ вал.22Соин ик [Михмасын] жугиськон дыръя Саулэн Ионафанэн огазе люкаськем калыклэн мечез но, шибодыез но ӧй вал, Сауллэн но солэн Ионафан пиезлэн гинэ вал;23филистим ожгарчиослэн азьпалаз мынӥсь отрядзы Михмасэ выжон доры вуиз.
Глава 13