Выбрать язык
Книги Ветхого Завета
Книги Нового Завета
с русским текстом1Быдэс Израильлы Самуил шуиз: «Тани, мар тӥ мыным верады, ваньзэ мон санэ понӥ но тӥледлы эксэй пуктӥ.2Тани, табере тӥляд азьпалтӥды эксэй ветлэ, нош мон пересьми ни, пурысьтай; пиосы тӥледын огазьын; нош мон пинал дырысеным та нуналозь тӥляд азьтӥды ветлӥ.3Тани мон; мон сярысь Кузё-Инмар но Солэн вӧйын зырӟемез азьын вералэ: кинлэсь мон ошсэ басьтӥ, кинлэсь ишаксэ басьтӥ, кинэ ӝоже уськытӥ, кинэ ӝикатыса-ёртыса вози, кинлэсь саламзэ-кузьымзэ басьтӥ но солэн ужез шоры ӧй учкы, синме кыни, – сое мон тӥледлы берыкто».
4Солы ответ сётыса шуизы: «Тон милемыз вӧсь ӧд карылы, ӝикатыса-ёртыса ӧд возьы, нокинлэсь но номырзэ ӧд басьты».5Со соослы шуиз: «Туннэ Кузё-Инмар адӟись луэ, Солэн вӧйын зырӟемез но адӟись луэ: мынэсьтым нокыӵе шекме ӧд шедьтэ». Соос шуизы: «Адӟись».
6Соку Самуил калыклы шуиз: «Моисеен Ааронэз пуктӥсь, атайёстэс Египет музъемысь поттӥсь Кузё-Инмар – адӟись.7Нош али султэ: Кузё-Инмар азьын мон тӥледын судэ пыро тӥледлы но, тӥляд атайёстылы но вань ӟечсэ лэсьтэмез понна.8Иаков Египетэ лыктэм бере, атайёсты сюлворыса Кузё-Инмарлы вазиськем бере, Кузё-Инмар Моисеен Ааронэз ыстӥз но соос, атайёстэс Египетысь поттыса, та интые улыны интыязы.9Нош соос асьсэлэсь Инмарзэс Кузё-Инмарез вунэтӥзы. Со понна Со соосты Асорысь ожен кивалтӥсь Сӥсаралэн киулаз сётӥз, филистим калыклэн киулаз, Моав эксэйлэн киулаз сётӥз, кудъёсыз соослы пумит ожмаськизы.10Соос Кузё-Инмарлы сюлворыса тазьы вазиськизы: ”Кузё-Инмар бордысь палэнскыса, ми сьӧлыкамы – ваалъёслы, астартаослы йыбыртъяса улӥмы, нош али милемды тушмонлэн киулысьтыз мозмыты, соку ми Тыныд ужаса-тыршыса уломы”.11Соку Кузё-Инмар Иероваалэз, Варакез, Иеффаез, Самуилэз ыстӥз но тӥледыз котыртӥсь тушмонъёстылэсь мозмытӥз, тӥ кышкатэк улӥды.12Эксэйды Кузё-Инмар, тӥляд Инмарды, вал ке но, тӥ Аммон эксэйлэсь, Нааслэсь, тӥледлы пумит лыктэмзэ адӟыса, мыным шуиды: ”Ӧвӧл, эксэй милемын мед кивалтоз”.13Озьыен, тани тӥляд быръем эксэйды, курем эксэйды; тани, Кузё-Инмар тӥледлы эксэй пуктӥз.14Кузё-Инмарлэсь кышкаса, Солы ужаса-тыршыса улӥды ке, Солэсь верамзэ кабыл басьтӥды ке, Кузё-Инмарлэн косонъёсызлы пумитъяськыса ӧд ке улэ, соку тӥ но, тӥляд пуктэм эксэйды но Инмардылэн Кузё-Инмарлэн сюрес кузяз ветлоды, [соку Кузё-Инмарлэн киыз тӥледлы пумит уз ӝутскы].15Нош Кузё-Инмарлэсь верамзэ санэ ӧд ке понэ, Кузё-Инмарлэн косонъёсызлы пумитъяськыса улӥды ке, соку Кузё-Инмарлэн киыз тӥледлы пумит ӝутскоз атайёстылы пумит ӝутскем кадь ик.16Нош али султэ но Кузё-Инмарлэн син азяды лэсьтоно быдӟым ужез шоры учке.17Али чабей аран ӧвӧл-а? Мон Кузё-Инмарлы вазисько но, Со гудыриен зор лэзёз, соку тӥ тододы, адӟоды, асьтэлы эксэй курыса, Кузё-Инмар азьын макем бадӟым сьӧлык лэсьтӥды».
18Самуил Кузё-Инмарлы вазиськиз но, со нуналэ Кузё-Инмар гудыриен зор лэзиз. Вань калык Кузё-Инмарлэсь туж кышказ, Самуиллэсь но.
19Вань калык Самуиллы шуиз: «Инмаред Кузё-Инмар азьын ас ляльчиосыд понна вӧсяськы, ми медам кулэ-быре; асьмелы эксэй курыса, вань сьӧлыкъёсмы борды эшшо сьӧлык ватсамы на».20Калыклы ответ сётыса, Самуил шуиз: «Эн кышкалэ, та сьӧлыкез тӥ лэсьтӥды, но тӥ Кузё-Инмарлэсь эн гинэ куштӥське, вань лулыныды-сюлмыныды Кузё-Инмарлы ужаса-тыршыса улэ.21Ӧвӧлтэм инмаръёс пала эн берытске, соос пайда уз вае, уз но мозмытэ, уго соос ӧвӧлтэм макеос.22Аслаз быдӟым нимыз понна Кузё-Инмар Ас калыксэ уз кушты, уго Кузё-Инмар тӥледыз Аслыз калык карыны бырйиз.23Тӥ понна вӧсяськемысь дугдыса, Кузё-Инмар азьын аслым сьӧлык лэсьтэме уг поты; ӟечлыко, шонер сюрес вылэ султыны мон тӥледыз дышето.24Но Кузё-Инмарлэсь кышканэн улэ, чылкыт сюлмын, пӧяськытэк Солы ужалэ-тырше, уго тӥ асьтэос адӟиды: тӥ азьын Со макем быдӟымесь ужъёс лэсьтӥз.25Урод-лек уж лэсьтыса улӥды ке, тӥ но, тӥляд эксэйды но кулоды-быроды».
Глава 12