Выбрать язык
Книги Ветхого Завета
Книги Нового Завета
с русским текстом1Самуил Сауллы шуиз: «Кузё-Инмар Ас калыкезлы, Израильлы, тонэ эксэе пуктон понна вӧйын зырӟыны монэ лэзиз; табере Кузё-Инмарлэсь верамзэ кылзӥськы.2Тазьы шуэ Саваоф Кузё-Инмар: ”Тодам вайи амалик калыклэсь Израильлы мар лэсьтэмзэ, кызьы со, израиль калык Египетысь бертыку, солэн пумитаз султӥз.3Табере мын Амаликез, [Иеримез но] погырты, маиз солэн вань, ваньзэ быдты; [соослэсь номырзэс но эн басьты, маиз вань быдты, карган улэ сёт], сое чик эн жаля, виылы пиосмуртсэ но, кышнозэ но, егит муртсэ но, нонӥсь нуныоссэ но, ошъёссэ но, ыжъёссэ но, верблюдъёссэ но, ишакъёссэ но”».
4Саул калыкез люказ, Телаимысен лыдъяз кык сю сюрс пыдын мынӥсь израиль ожгарчиосты, дас сюрсэз Иуда выжыысь вал.5Саул Амаликлэн городэз доры вуиз но нёжалэ ватӥськон инты дасяз.6Киней выжылы Саул шуиз: «Амалик калык пӧлысь люкиське, потыса кошке, со калыкен ӵош тӥледыз но виёно медам луы, уго тӥ вань израиль калыклы, соос Египетысь бертыку, ӟечлыктэс возьматӥды». Киней выжы амалик калык пӧлысь висъяськиз.
7Хавилаысен Египет вӧзысь Сурозь Амаликез Саул погыртӥз.8Нош Амаликлэсь Агаг эксэйзэ улэпкын киултӥз, вань калыксэ мечен быдтӥз, [Иеримез но быдтӥз].9Нош Саул, калыкен огкылысь луыса, Агагез, озьы ик устооссэ ыжъёсты, ошъёсты, куайытэм ыжпиосты – мар вал умоез, быдэс кельтӥзы, нош туж ик кулэ луисьтэмзэ, аламазэ, быдтӥзы.
10Самуиллы Кузё-Инмар дорысь тазьы верамын вал:11«Саулэз эксэе пуктӥ шуыса жалясько, уго со Мон бордысь палэнскиз, Мынэсьтым кылме ӧз быдэсты». Самуил ӝоже усиз, уйбыт Кузё-Инмарлы тэльмырыса вӧсяськиз.12Ӵукна вазь ик султӥз но Самуил Сауллэн пумитаз мыныны потӥз. Самуиллы ивортӥзы, Саул Кармилэ, пе, ветлӥз, отын со аслыз памятник пуктӥз, [ожмаськон уробоосты отысь берыктӥз], отысен Галгалэ васькиз шуыса веразы.
13Саул доры Самуил вуэм бере Саул шуиз: «Кузё-Инмар тонэ бакель мед кароз. Кузё-Инмарлэсь верам кылзэ мон быдэстӥ».14Соку Самуил шуиз: «Мар таӵе та ыжъёслэсь бӧксэмзэс, ошъёслэсь бурсэмзэс мынам пельёсы кыло?»15Саул шуиз: «Соосты Амалик дорысь вайизы, ӟечъёссэ ыжъёсты, ошъёсты Кузё-Инмарлы Инмаредлы курбон сётыны кельтӥзы; мукетъёссэ ми быдтӥмы».16Самуил Сауллы шуиз: «Вить ай, мон тыныд верало, мар мыным уйин Кузё-Инмар вераз». Саул солы шуиз: «Вера».17Соку Самуил Сауллы шуиз: «Кузё-Инмар тонэ Израильлы эксэе вӧйын зырӟыку, Израиль выжыослы йыр луэм берад, аслад син азяд тон покчи уд адӟиськиськы вал-а?18Кузё-Инмар тонэ, тазьы шуыса, сюрес вылэ лэзиз: ”Мын но сьӧлыклэсь кышкасьтэм амалик калыкез карган улэ сёт, быдтытозяд соосын ожмаськы”.19Малы бен тон Кузё-Инмарлэсь верамзэ санэ ӧд поны, ваньбур борды басьтӥськид но Кузё-Инмар азьын лек уж лэсьтӥд?»20Соку Саул Самуиллы шуиз: «Мон Кузё-Инмарлэсь верамзэ кылзӥськи но Кузё-Инмарлэн косэм интыяз мыныны сюрес вылэ потӥ, Амаликлэсь Агаг эксэйзэ кутыса вайи, нош ассэ Амаликез быдтӥ.21Нош быдтыны дасям ваньбур – ыжъёс, ошъёс пӧлысь Галгалын тынад Инмаредлы Кузё-Инмарлы курбон сётон понна калык вань умойзэ гинэ бырйиз».
22Самуил тазьы ответ сётӥз: «Кузё-Инмарлэсь верамзэ кылзӥськон кадь, тылын сутӥськись курбонъёс, мукет курбонъёс Кузё-Инмарлы сыӵе ик ярамонэсь-а? Кылзӥськон – курбонлэсь ӟечгес, тэрытскон – ыжъёслэн кӧйзылэсь ӟечгес.23Уго тэрытскытэк улон – со веднаськон кадь ик сьӧлык; пумитъяськон – сульдэръёслы-идолъёслы йыбыртъянэн одӥг кадь сьӧлык; Кузё-Инмарлэсь кылзэ кулэтэм каремед понна Со тонэ кулэтэм кариз, [Израильлы] эксэй луонлэсь тонэ палэнтӥз».
24Соку Саул Самуиллы шуиз: «Сьӧлыкай мон, Кузё-Инмарлэн косон сьӧраз потӥ, тынэсьтыд верамдэ но санэ ӧй поны; мон калыклэсь кышкай, соослэсь верамзэс кылзӥ.25Нош али мон вылысь сьӧлыкез кушты, монэн ӵош берытскы, Кузё-Инмарлы [тынад Инмаредлы] мон йыбырттыны мед быгатом».26Сауллы Самуил таӵе ответ сётӥз: «Тонэн ӵош мон уг берытскы, уго тон Кузё-Инмарлэсь кылзэ кулэтэм карид, со понна Кузё-Инмар тонэ, Израильлы эксэй медад ни луы шуыса, кулэтэм кариз».
27Самуил кошкыны вырӟиз. Нош [Саул] солэн дӥськут сӧзы бордаз кырмиськиз но кесиз сое.28Соку Самуил шуиз: «Туннэ Кузё-Инмар Израиль эксэйлыкез тон киысь басьтӥз но тынад матыседлы, тынэсьтыд умойгес муртлы сётӥз.29Ӧрекчаськон кыл уз вера, уз но ӧкыны Израильлэн Оскымонэз, уго Со адями ӧвӧл ӧкынон понна».30[Саул] шуиз: «Мон сьӧлыкай, но монэ ас калыкелэн тӧроосыз азьын, Израиль азьын санэ пон, монэн ӵош мын, мон Кузё-Инмарлы тынад Инмаредлы йыбыртто».31Соку Самуил Саул сьӧры берытскиз, Саул Кузё-Инмарлы йыбырттӥз.
32Собере Самуил шуиз: «Мон доры Амалик эксэез, Агагез, вае». Со доры куалекъясь Агаг лыктыса шуиз: «Кулонлэн курытэз палэнэ кошкиз-а?»33Но Самуил шуиз: «Кызьы тынад мечед кышномуртъёсты нылпиостэк кельтылӥз, озьы ик тынад анаед кышномуртъёс пӧлын питэк кылемын мед луоз». Галгалын Кузё-Инмар азьын Самуил Агагез ӵогыса куштӥз.
34Самуил Рамае кошкиз, нош Саул дораз бертӥз, Сауллэн Гиваяз.35Та бере Самуил Саулэн кулытозяз ӧз ни адӟиськы; но Самуил Саул пумысен ӝожомыса улӥз, малы ке шуоно Кузё-Инмар ӧкынӥз Саулэз Израильлы эксэе пуктэмез понна.
Глава 15