Выбрать язык
Книги Ветхого Завета
Книги Нового Завета
с русским текстом1Кузё-Инмар Самуиллы шуиз: «Саул пумысен кема на-а ӝожомыса улод, кинэ Мон кулэтэм кари Израильлы эксэй луыны? Сюрдэ вӧйын тырмыты но мын. Мон тонэ ысто Вифлеемын улӥсь Иессей доры, уго солэн пиосыз пӧлысь Мон эксэй луоноез синйылтӥ».2Самуил шуиз: «Кызьы мон мыном: Саул кылӥз ке, виёз монэ». Кузё-Инмар шуиз: «Пудо уллёысь ветылэз басьты но шу: ”Кузё-Инмарлы курбон сётыны мон лыктӥ”.3Иессеез но, [солэсь пиоссэ но] курбон сётон доры ӧть. Мон тыныд возьмато, мар тон лэсьтыны кулэ, тон Мыным вӧйын зырӟод сое, кудӥз сярысь Мон тыныд верало».
4Кызьы солы Кузё-Инмар вераз, озьы ик Самуил лэсьтӥз. Со Вифлееме вуэм бере карлэн тӧроосыз куалектыса солэн пумитаз потӥзы но шуизы: «Ӟеч малпанэн-а тон ми доры вуид?»5Со тазьы ответ сётӥз: «Ӟеч малпанэн, Кузё-Инмарлы курбон сётыны мон лыктӥ; дун-чылкыт кариське но монэн ӵош курбон сётон доры мынэ». Иессеез но, солэсь пиоссэ чылкытатӥз но соосты курбон сётон доры ӧтиз.6Соос вуэм бере, Елиавез адӟыса, малпаз: «Зэм, та Кузё-Инмар азьын вӧйын зырӟоно мурт!»7Но Кузё-Инмар Самуиллы шуиз: «Солэн тусбуез шоры, ӝуждалаез шоры эн учкы; Мон сое кулэ ӧй кары; Мон уг учкиськы адями кадь, уго адями ымныр шоры учке, нош Кузё-Инмар сюлэм шоры учке».8Иессей Аминадавез ӧтиз но сое Самуил доры вайиз, нош Самуил шуиз: «Тазэ но Кузё-Инмар ӧз бырйы».9Иессей Саммаез вайиз, но Самуил солы шуиз: «Тазэ но Кузё-Инмар ӧз бырйы».10Тазьы Иессей Самуил доры сизьым пиоссэ вайылӥз, но Самуил Иессейлы шуиз: «Таос пӧлысь огзэс но Кузё-Инмар ӧз бырйы».
11Соку Самуил Иессейлы шуиз: «Ваньмыз-а пиосыд татын?» Иессей ответ сётӥз: «Эшшо вань на пичиез, со ыж возьма». Самуил Иессейлы шуиз: «Мын, вай сое татчы, со татчы вуытэк, сиськыны ум пуксе».12Иессей сое вайыны ыстӥз; сое татчы вуттӥзы. Со ӵыжыт бамо, чебер синмо, чебер ымныро вал. Кузё-Инмар шуиз: «Султы, сое вӧйын зырӟы, со – со ик вань».13Вӧен сюрез Самуил кутӥз но сое агайёсыз азьын вӧйын зырӟиз. Со нуналысен, берло но Давид вылын Кузё-Инмарлэн Духез улӥз. Нош Самуил султӥз но Рама каре кошкиз.
14Нош Саул бордысь Кузё-Инмарлэн Духез кошкиз, сое лек дух Кузё-Инмарлэн эрикезъя бугыръяны кутскиз.15Соку Сауллэн медоосыз солы шуизы: «Тани, Инмарлэн эрикезъя лэзем лек дух тонэ бугыръя.16Милям кузёмы ас азьысьтыз медооссэ крезен усто шудӥсь муртэ утчаны мед косоз; тон доры Инмарлэн эрикезъя лек дух лыктӥз ке, со мурт ас киыныз шудыса тонэ буйгатоз».17Медоосызлы Саул шуиз: «Усто шудӥсь муртэ шедьтэ но сое мон доры вае».18Соку медоосыз пӧлысь одӥгез солы шуиз: «Тани, Вифлеемысь Иессейлэсь пизэ адӟи, со шудыны быгатэ, кышкасьтэм, ожмаськыны быгатӥсь пи, кыллы усто, чебер тусбуё, Кузё-Инмар со бордын улэ».
19Саул иворчиосты Иессей доры ыстӥз но шуиз: «Пудо возьмась пидэ, Давидэз, ысты мон доры».20Ишаклэн тыбыр вылаз ю-няньзэ, винаен сепыссэ, одӥг кечпизэ Иессей понӥз но Давид пиез бӧрсьы Саул доры ыстӥз.21Давид Саул доры вуиз но солы ужаса-тыршыса улыны кутскиз, солы со туж кельшиз, солы ожмаськон арберизэ нуллӥсь луиз.22Саул Иессей доры тазьы вераны ыстӥз: «Давид мон бордын ужаса-тыршыса мед улоз, со мыным сюлмыя луиз».23Инмарлэн эрикезъя лэзем дух Саул вылэ вуыку, Давид крезьзэ кияз кутыса шудэ ке, Сауллы капчигес, умойгес луэ, лек дух со бордысь соку палэнскылэ.
Глава 16