Выбрать язык
Книги Ветхого Завета
Книги Нового Завета
с русским текстом1Филистим калык ожгарчиоссэ ожен мыныны люказ, соос Иудеяысь Сокхоф каре люкаськизы, Сокхофен Азек вискысь Ефес-Даммиме интыяськизы.2Нош Саул но израиль ожгарчиос, огазе люкаськыса, Тыпы нёжалэ интыяськизы но филистим калыкен ожмаськыны дасяськизы.3Филистим ожгарчиос одӥгаз гурезе интыяськизы, израиль ожгарчиос мукетаз гурезе интыяськизы, нош висказы нёжал вал.
4Филистим ожгарчиос пӧлысь азьпалаз нюръяськыны потӥз Геф карысь Голиаф нимо адями; солэн ӝуждалаез куать гырпум но одӥг кикур кузьда вал.5Йыраз ыргон изьы понэмын, чорыг сьӧм кадь адӟиськись корт дӥсь вылаз дӥсямын; дӥсезлэн секталаез – вить сюрс ыргон сӥкль.6Пыдесъёссэ утись ыргон шобрет понэмын, пельпум сьӧраз ыргон щит ошемын.7Шибодыезлэн ныдыз куиськисьёслэн есозы кадь; нош ачиз шибодыез куать сю корт сӥкль тыр. Солэн азьпалаз ожмаськон арбери нуллӥсез мынӥз.8Со султӥз но израиль ожгарчиос шоры тазьы кесяськыны кутскиз: «Малы тӥ ожмаськыны потӥды? Мон филистим пи ӧвӧл-а, нош тӥ Сауллэн ляльчиосыз ӧвӧл-а? Асьтэ пӧлысь адямиез быръе, со мон азе мед лыктоз.9Со монэн ожмаськыны быгатӥз ке, монэ вииз ке, соку ми тӥледлы ляльчиос луомы; нош мон сое ворми ке, вии ке, соку тӥ милям ляльчиосмы луоды, милемлы ужаса-тыршыса улоды».
10Филистим пи шуиз: «Туннэ мон израиль ожгарчиосты возьытэ вутто; вае мон доры адямидэс, ми ӵошеннамы ожмаськомы».11Саул но, вань израиль пиос но филистим пилэсь та верам кылъёссэ кылӥзы, туж кышказы, куалектӥзы.
12Давид вал Иуда музъемысь Вифлеем карысь Ефрафа выжысь Иессейлэн пиез; Иессейлэн тямыс пиез вал. Саул улон нуналъёсы Иессей пересьмемын, воргоронъёс пӧлын со самой мӧйыез вал ини.13Иессейлэн куинез бадӟымъёсыз пиосыз Саулэн ӵош оже мынӥзы; оже мынэм куинь пиосызлэн таӵеесь нимъёссы: бадӟымезлэн – Елиав, кыкетӥезлэн – Аминадав, куинетӥезлэн – Самма.14Давид ваньзылэсь покчиез вал. Куинез, бадӟымъёсыз, Саул бӧрсьы мынӥзы,15нош Давид Саул дорысь дораз бертылӥз, Вифлеемын атаезлэсь ыжъёссэ возьман понна.
16Со филистим пи ӵукна но, ӝыт но калык азе потылӥз, ньыльдон нунал ӵоже ассэ возьматылӥз.
17Соку Иессей Давид пиезлы шуиз: «Агайёсыдлы одӥг ефа куасьтэм ю ну, та дас сукыри нянез кут но ӝоггес ожгарчиослэн сылон интыязы агайёсыдлы ну;18нош тазэ дассэ сырез сюрс муртэн кивалтӥсьлы ну; агайёсыдлэсь тазалыксы сярысь юалляськы; тод, малы ке но ёрмыса уг уло-а».19Саул но, соос но, вань израиль ожгарчиос Тыпы нёжалын сылӥзы, соос филистим калыкен ожмаськыны дасясько вал.
20Давид ӵукна вазь ик султӥз, ыжъёссэ возьмаськись кие кельтӥз но, ныпъетсэ кутыса, Иессейлэсь косонзэ быдэстыны кошкиз. Ожгарчиос строе султыса, кесяськыса ожмаськыны дасяськыку, со тыриськем уробоос доры вуиз.21Израиль но, филистим ожгарчиос но огзылы огзы ваче пумитэ радэн султӥзы.22Давид ныпъетсэ уробо возьмасьлы кельтӥз но ожгарчиос пӧлы бызьыса мынӥз, вуэм бераз агайёсызлэн тазалыксы сярысь юаз.23Тани, со агайёсыныз вераськыку, Голиаф нимо нюръяськись, Геф карысь филистим пи, филистим ожгарчиос пӧлысь потэ но со кылъёссэ ик вера. Давид соосты кылӥз.
24Вань израиль пиос, та адямиез адӟыса, со дорысь пегӟыса кошкылӥзы, солэсь туж кышкало вал.25Израиль пиос шуылӥзы: «Адӟиськоды-а калык азе потэм та адямиез? Со потэ Израилез сантэман вылысь. Кин ке та адямиез виысал ке, со муртлы эксэй туж трос узырлык сётысал, нылзэ солы кышнолы сётысал, атаезлэсь выжызэ Израильын эрико карысал».
26Давид асэныз артэ сылӥсь муртъёслы шуиз: «Мар карозы та филистим пиез виисен, кин Израилез сантэманэз палэнтоз? Кин со сыӵе вандӥськымтэ филистим пи – сокем со сантэма улэп Инмарлэсь ожгарчиоссэ?»27Со кылъёсты ик калык солы вераз: «Тани мар сётэмын луоз сое виись муртлы».
28Давидлэн бадӟымез агаез, Елиав, кылӥз солэсь калыкен вераськемзэ, Елиав Давидлы вожзэ поттыса шуиз: «Малы тон татчы лыктӥд? Кыр дуннее кин кие кельтӥд со ӧжыт ыжъёсмес? Мон тодӥсько тынэсьтыд вылтӥяськон сямдэ, урод сюлэмдэ, тон лыктӥд ожмаськон шоры учкыны».29Давид шуиз: «Мар мон лэсьтӥ? Юаны но уг яра-а, мар-а?»30Со палась мукет пала берытскиз но со кылъёсты ик вераз, азьло сямен ик калык солы ответ сётылӥз.31Давидлэсь верам кылъёссэ кылӥзы но Сауллы веразы, соиз ас дораз ӧтиз.
32Давид Сауллы шуиз: «Соин сэрен нокинлэн но мылкыдыз медаз куашка; тынад ляльчиед мыноз но со филистим пиен ожмаськоз».33Соку Саул Давидлы шуиз: «Та филистим пиен ожмаськыны мыныны тон уд быгатӥськы, тон уго укыр егит на, нош со пинал дырысеныз ини ожгарчи».
34Давид Сауллы шуиз: «Тынад ляльчиед ас атаез дорын ыж возьмаса улӥз, лев яке гондыр лыктыса уллёысь ыжез нуэ ке,35мон со сьӧры уйиськыса мынӥсько но, со вылэ урдскыса, ымысьтыз ыжме таласько; нош со мон вылэ урдске ке, соку мон сое гонтӥз кутӥсько но виыса куштӥсько.36Левез но, гондырез но ляльчиед виылӥз, соосын кадь ик та вандӥськымтэ филистим пиен но луоз, малы ке шуоно со сокем сантэма улэп Инмарлэсь ожгарчиоссэ. [Мыныса быдтоно ӧвӧл-а сое Израиль вылысь сантэманэз палэнтон понна? Уго кин со сыӵе вандӥськымтэ пи?]»
37Давид шуиз: «Левлэсь, гондырлэсь монэ мозмытӥсь Кузё-Инмар та филистим пилэн но киулысьтыз мозмытоз». Саул Давидлы шуиз: «Мын, Кузё-Инмар тонэ мед утёз».
38Саул Давидэз ас дӥськутэныз дӥсяз: йыраз ыргон изьы изьыяз, вылаз корт дӥсь дӥсяз.39Давид Сауллэсь мечсэ кутӥз но азьлань-берлань ветлыны кутскиз, уго со таӵе ожмаськон арбериослы дышемын ӧй вал. Соин ик Давид Сауллы шуиз: «Тазьы дӥсяськыса ветлыны уг быгатӥськы, дышемын ӧвӧл». Давид ваньзэ тае вылысьтыз куштӥз.40Бодызэ кияз кутӥз но шурысь вить тэгызэсь изъёс бырйиз, бордаз нуллон пастукан сумкаяз соосты тыриз: сумкаеныз, из зӥръян арбериеныз филистим пилэн пумитаз потӥз.
41Филистим пи но султӥз, Давидлэн матаз лыктыны кутскиз, ожмаськон арберизэ нуллӥсез азьпалаз мынӥз.42Филистим пи учкиз но, Давидэз адӟыса, унь-мань карыса, со шоры учкиз, уго со егит вал, ӵыжыт бамо, чебер ымныро.43Филистим пи Давидлы шуиз: «Малы тон мон вылэ бодыен, [изъёсын] лыктӥськод? Мон пуны шат?» [Давид солы шуиз: «Ӧвӧл, тон пунылэсь но аламагес».] Аслаз инмаръёсызлэн нимынызы филистим пи Давидэз каргаз.44Филистим пи Давидлы шуиз: «Матам лыкты, тынэсьтыд мугордэ мон ик инмысь тылобурдоослы, бусыысь пӧйшуръёслы сиыны сёто».
45Нош Давид филистим пилы тазьы шуиз: «Тон мыным пумит мечен, шибодыен, щитэн мынӥськод, нош мон тыныд пумит Саваоф Кузё-Инмарлэн нимыз понна, израиль ожгарчиослэн Инмарзы понна мынӥсько, Со вылэ тон сантэман кылъёс вералляд.46Кузё-Инмар туннэ тонэ мынам киулам сётоз, мон тонэ виё, бордысьтыд йырдэ басьто но [шӧйдэ], филистим ожгарчиослэсь шӧйёссэс ин тылобурдоослы, музъем пӧйшуръёслы кесяны сёто, соку быдэс музъем выл тодоз, Израильлэн Инмарез вань шуыса.47Вань та люкаськемъёс тодозы, мечен но шибодыен Кузё-Инмар уг утьы шуыса, уго та Кузё-Инмарлэн ожмаськонэз, Со тӥледыз милям киуламы сётоз».
48Филистим пи султыса Давидлэн матаз вуыны кутскем бере Давид дыртыса бызиз ожгарчиос пала, филистим пилэн пумитаз.49Давид, кизэ сумкаяз лэзьыса, отысь изэз басьтӥз но из лэзьянысеныз зӥртӥз, филистим пилэсь кымессэ пась кариз – из кымес пушказ пыриз но, со ымнырыныз музъем вылэ усиз.50Тазьы Давид филистим пиез вормиз из зӥръянэн но изэн, вииз сое; Давидлэн кияз мечез ӧй вал.51Соку Давид бызьыса лыктӥз, филистим пи вылэ пыдыныз лёгиськиз, мечсэ басьтӥз, сое меч тырон сепысысьтыз поттӥз, соин шуккиз но йырзэ уретӥз. Батырзылэсь кулэмзэ адӟыса, филистим ожгарчиос бызьыса кошкыны кутскизы.
52Израиль воргоронъёс, иудей воргоронъёс ӝутскыса черектӥськизы но филистим ожгарчиосты нёжалэ пырон дорозь, Аккарон капка дорозь улляса мынӥзы. Шаарим сюрес кузя, Гефозь, Аккаронозь филистим ожгарчиос кулыса усьылӥзы.53Филистим ожгарчиосты улляса лэзем беразы израиль пиос ас доразы берытскизы, соослэсь станзэс тарказы.54Давид филистим пилэсь йырзэ басьтыса Иерусалиме нуиз, нош ожмаськон арберизэ аслаз балаганаз понӥз.
55Филистим пилэн пумитаз Давидлэсь потэмзэ Саул адӟиз но ожгарчиосын кивалтӥсезлы, Авенирлы, шуиз: «Кинлэн пиез та егит мурт луэ?» Авенир шуиз: «Мон уг тодӥськы. Кема ул, эксэй».56Эксэй шуиз: «Юа ук, та егит пи кинлэн пиез луэ».
57Филистим пиез погыртыса Давид берытскем бере Авенир сое кутӥз но Саул доры вуттӥз. Филистим пилэн йырыз солэн кияз вал.58Саул солэсь юаз: «Пияш, кинлэн тон пиез луиськод?» Давид шуиз: «Вифлеемысь Иессей ляльчиедлэн пиез».
Глава 17