Выбрать язык
Книги Ветхого Завета
Книги Нового Завета
с русским текстом1Кузё-Инмарлэн нимыз понна Соломонлэн данлыкез сярысь Саваысь эксэй кышномурт кылӥз но мадиськонъёс пыр сое эскерыны-чакланы лыктӥз.2Эксэй кышномурт Иерусалиме бадӟым узырлык вайыса лыктӥз: верблюдъёс вылэ тыремын вал ческыт зыно арбериос, туж трос зарни, дуно изъёс; Соломон доры лыктӥз но, мар солэн сюлмаз вал, ваньмыз сярысь Соломонэн вераськыса улӥз.3Солэн вань кылъёсызлы Соломон валэктон сётӥз, эксэй понна тодмотэмез, валэктыны луонтэмез номыр но ӧй вал.4Саваысь эксэй кышномурт адӟиз Соломонлэсь вань визьлыксэ, солэсь пуктэм корказэ но,5ӝӧк вылысьтыз сиёнзэ но, ляльчиосызлэсь улон интызэс но, медоосызлэсь улэмзэс, дӥськутсэс но, вина омыръясьёссэ но, Кузё-Инмарлэн храмаз сётӥськись тылын сутӥськись курбонъёссэ но. Таос бере возиськыны ӧз ни быгаты,6со эксэйлы шуиз: «Зэм ик вылэм ас музъемам тынад ужъёсыд сярысь, тынад визьлыкед сярысь кылэмъёсы;7лыктыса ас синмыным адӟытозям, со кылъёслы мон ӧй оскы: но тани, мыным ӝыныез но верамын ӧвӧл; визьлыкед но, узырлыкед но кылэме сярысь тросгес вылэм.8Шудоесь тынад адямиосыд, шудоесь тынад азяд ялан сылӥсь но визьлыко веранъёстэ кылӥсь медоосыд.9Израильлэн эксэй пукон вылаз тонэ пуктыны ӟеч эриксэ сётӥсь Инмаред Кузё-Инмар данлыко мед луоз! Кузё-Инмар, Израилез пумтэм яратэменыз, тонэ эксэе пуктӥз – суд ортчытыны, шонерлыко ужъёс лэсьтыны».10Эксэй кышномурт сю кызь талант зарнизэ эксэйлы кузьмаз, туж трос ческыт зыно макеосты, дуно изъёс кузьмаз; Саваысь эксэй кышномуртлэн Соломон эксэйлы кузьмам ческыт зыно арбериосыз мында соослэн татчы вуылэмзы ӧй вал.
11Хирамлэн Офирысь зарни нуллӥсь пыжез Офирысь туж трос горд писпу, дуно изъёс вайиз.12Та горд писпулэсь эксэй Кузё-Инмарлэн храмезлы, эксэй коркалы сюрыос, кырӟасьёслы крезь но псалтирь лэсьтӥз. Сомында горд писпу ноку но уг вуы вал, та дырозь но сомындаез адӟылэмын но ӧй вал.13Соломон эксэй ас киыныз сётэм сяна, Саваысь эксэй кышномуртлы ваньзэ сётӥз, мар солы кулэ вал, мае со куриз. Собере со берен ас музъемаз вырӟиз, со ачиз но, вань медоосыз но.
14Арлы быдэ Соломонлы лыктӥсь зарни куать сю куатьтон куать зарни талант люкаське вал.15Вуз нуллӥсьёслэсь, вузчиослэсь, Аравияысь эксэйёслэсь, улосвылъёсын кивалтӥсьёслэсь люкам вытэз вератэк, сомында люкаське.16Соломон дурем зарнилэсь кык сю бадӟымесь щитъёс лэсьтӥз, котькудаз щитэ куать сю сӥкль мынӥз;17дурем зарнилэсь ик куинь сю пичиесь щитъёс лэсьтӥз, котькудаз щитэ быдэн куинь мина зарни мынӥз; эксэй соосты Ливанысь ваем пу корка интыяз.18Эксэй слон лылэсь бадӟым эксэй пукон лэсьтӥз но сое котыр чылкыт зарниен шобыртӥз.19Эксэй пукон бордын куать тубатэз вал; эксэй пуконлэн берласянь йылыз котырес, пукон интылэн мыд-мыд палтӥз пыкъяськон интыез вал, пыкъяськон дорын кык левъёс сылӥзы.20Эшшо куать тубат вылын мыд-мыд палаз дас кык левъёс сылӥзы. Та выллемез одӥг эксэйлыкын но ӧй вал.21Соломон эксэйлэн вань юон сосудъёсыз зарнилэсь вал, Ливанысь ваем пулэсь пуктэм коркан вань сосудъёс чылкыт зарнилэсь вал; азвесьлэсь номыр но лэсьтэмын ӧй вал, малы ке шуоно Соломон улон вакытэ азвесь номыр ӵотэ но ӧз лыдӟиськылы.22Эксэйлэн зарезь вылын Фарсис кораблез вал, Хирамлэн корабленыз ӵош; куинь армысь одӥг пол зарни, азвесь, слон лы, маймылъёс-обезьянъёс, тутыгышъёс*а Фарсисысь корабльёс вайылӥзы.
23Соломон эксэй дунне вылысь вань эксэйёсты узырлыкеныз но визьлыкеныз ортчылӥз.24Музъем вылысь вань [эксэйёс] Соломонэз адӟемзы потыса утчаса ветлӥзы, Инмарлэсь солэн сюлмаз понэм визьлыксэ кылзӥськемзы потӥз.25Котькудӥз солы кузьым вайылӥз: азвесь сосудъёс, зарни сосудъёс, дӥськут, ожмаськон тӥрлык, ческыт зыно арбериос, валъёс, мулъёс арлы быдэ вайылӥз.
26Ожмаськон уробоос, борӟемен мынӥсь ожгарчиосты Соломон люказ; солэн сюрс ньыль сю ожмаськон уробоез, дас кык сюрс мурт борӟемен мыныса ожмаськисьёсыз вал; соосты со ожмаськон уробоос возён городъёсы, Иерусалиме ас бордаз эксэй интыяз. [Евфрат дурысен Филистим музъемозь, Египет дорозь – вань зарезьёсын со кузёяськыса улӥз.]27Иерусалимын азвесез эксэй огшоры изэн огкадь кариз, нош кедырпу сокем трос вал, сое улыг интыосын будӥсь сикоморпуэн огдунъем кариз.28Нош валъёсты Соломонлы Египетысь, Куваысь вайылӥзы; эксэй вузчиос соосты Куваысь коньдонэн басьтылӥзы.29Египетысь ожмаськон уробоез куать сю сӥкль азвесь тырыса вайылӥзы, нош валэз – сю витьтон сӥклен. Таӵе амалэн ик соос ас киынызы ваньзэ тае хеттей эксэйёслы, арамей эксэйёслы вуттылӥзы.
*а 10:22 тутыгыш – павлин
Глава 10