Выбрать язык
Книги Ветхого Завета
Книги Нового Завета
с русским текстом1Фараонлэсь нылзэ сяна, Соломон мурт кунъёсысь трос кышномуртъёсты яратӥз – моав, аммон, идумей, сӥдон, хеттей нылъёсты –2со калыкъёс пӧлысь, кудъёсыз сярысь Кузё-Инмар израиль пиослы шуиз вал: «Соос пӧлы эн ветлэ, соос но тӥ пӧлы медаз пыре, тӥлесьтыд сюлэмъёстэс асьсэлэн инмаръёссы пала медаз берыктэ шуыса». Яратон пыр Соломон соос борды лякиськиз.3Солэн сизьым сю кышноез, куинь сю ляльчи кышноосыз вал; солэсь сюлэмзэ кышноосыз сӧризы.4Пересьмон даураз Соломонлэсь сюлэмзэ кышноосыз мурт инмаръёс пала берыктӥзы, солэн сюлмыз Давидлэн, атаезлэн, сюлмыз кадь быдэсак Инмарезлы Кузё-Инмарлы сётэмын ӧй вал.5Соломон кутскиз сӥдон калыклэн Астарта инмарезлы, аммон калыклэн юрӟым Милхомезлы ужаса-йыбыртъяса улыны.6Кузё-Инмарлэн син азяз Соломон ярантэм ужъёс лэсьтыса улӥз, Давид атаез кадь солэн Кузё-Инмар сьӧры туж ик мынэмез ӧз поты.7Соку Соломон Иерусалим азьысь гурезь йылэ моав калыклэн юрӟым Хамосэзлы куала пуктӥз, аммон калыклэн юрӟым Молохезлы но.8Озьы со мурт кунъёсысь ваем вань кышноосызлы лэсьтӥз, соос асьсэ инмаръёссы азьын ческыт зын поттыса, курбонъёс сётылыса улӥзы.
9Соку Кузё-Инмар Соломонлы туж вожзэ поттӥз аслэсьтыз сюлэмзэ кык пол солы возьматскылэм Израильлэн Инмарезлэсь Кузё-Инмарлэсь палэнтэмез понна,10солы курон-косон сётӥз вал, мурт инмаръёслэн сюрес кузязы медаз ветлы шуыса, нош со [Инмарлэсь] Кузё-Инмарлэсь курон-косонзэ ӧз быдэсты.11Соку Кузё-Инмар Соломонлы шуиз: «Таӵе ужъёс тон дорын лэсьтӥськем понна, сӥзён-косонме утьымтэед понна, тыныд сӥзьыса сётэм пуктон-косонъёсме утьымтэед понна, тон дорысь эксэйлыкез талало но тынад ляльчиедлы сёто.12Но тынад атаедлы, Давидлы, луыса, тае тон улэп дыръя уг лэсьты: тынад пиедлэн киулысьтыз сое ишкалто.13Быдэссэ эксэйлыкез уг тала: одӥгзэ выжыез Аслам Давид ляльчиелы луыса, Аслам быръем Иерусалим городлы луыса тынад пиедлэн киулаз сёто».
14Кузё-Инмар Соломонлы пумит идумей пиез, Адерез, ӝутӥз, со идумей эксэйёслэн выжыысьтызы вал.15Давид Идумеяын дыръя ожгарчиослэн кивалтӥсьсы Иоав, виылэмъёсты ватыны лыктыса, Идумеяысь вань пиосмурт выжыез вииз, –16Идумеяысь вань пиосмурт выжыез быдтытозязы, Иоавен израиль пиос отын куать толэзь ӵоже улӥзы, –17соку Адер атаез бордын ужаса-тыршыса улэм идумей пиосын ӵош Египетэ пегӟиз; Адер соку пичи нуны вал.18Мадианысь потыса, соос Фаранэ вуизы, Фаранысь адямиосты бордазы кутыса, Египетэ фараон доры, Египетлэн эксэез доры, лыктӥзы. [Адер фараон доры пыриз], соиз солы корка сётӥз, сюдон-вордон сярысь косон сётӥз, солы музъем сётӥз.19Адер фараонлы туж яраны быгатӥз – кышноезлэсь, Тахпенесалэсь, эксэй кышнолэсь, сузэрзэ солы кышнолы сётӥз.20Тахпенесалэн сузэрез солы пи вайиз, Генуват ним сётӥзы. Тахпенеса сое фараон юртын вордӥз; фараонлэн юртаз Генуват фараонлэн пиосыныз огазьын будӥз.21Давид кулӥз но, атайёсыныз огазе ватӥзы, ожгарчиослэн кивалтӥсьсы Иоав кулэм ни шуыса кылэм бераз Адер фараонлы шуиз: «Лэзь монэ, ас музъемам мон берто».22Фараон солы шуиз: «Малы ас музъемад бертэмед потэ, оло, мон дорын малы ке ёрмыса улӥськод-а?» Со шуиз: «Уг, но озьы ке но лэзь монэ». [Адер ас музъемаз берытскиз.]
23Эшшо одӥгзэ Соломонлы пумит мынӥсез Инмар ӝутӥз – Елиадалэсь Разон пизэ, со аслаз кузёезлэсь, Сувалэн Адраазар эксэезлэсь, пегӟиз,24Давид Адраазарез пазьгем бере, Разон ас котыраз адямиосты люкаса, шпанаослэн кивалтӥсьсы луиз. Дамаске мынӥзы но отчы улыны каръяськизы, Дамаскын кузёяськыса улӥзы.25Соломонлэн вань кивалтон аръёсаз Разон Израилен тушмонъяськыса улӥз. Адерлэн урод уж лэсьтэмез сяна, со Израильлы ялан урод уж лэсьтыса улӥз, Сириялэн эксэез луиз.
26Царедаысь, Ефрем выжыысь Наватлэн Иеровоам пиез, – анаезлэн, палкышнолэн, нимыз Церуа, – Соломонлэн ляльчиез, эксэйлы пумит кизэ ӝутӥз.27Эксэй вылэ кизэ ӝутонэзлэн тани мугез: Соломон Милло лэсьтӥз, атаезлэн, Давидлэн, городаз сӧриськем интыоссэ тупатъяз.28Иеровоам кышкасьтэм адями вал. Та егит адями ужез быдэсъяны быгатэ шуыса, Соломон адӟиз но Иосиф юртысь ас вылаз ужасьёслэсь ужзэс чаклась карыса пуктӥз.29Со виын Иеровоам Иерусалимысь потыны учыраз; сюрес вылысен сое Сӥломысь Ахия пророк пумитаз, Иеровоам выль дӥськутэн дӥсяськемын вал. Бусыын соос кыкназы гинэ вал.30Ахия солэн вылысьтыз выль дӥськутсэ басьтӥз но дас кык люкетлы кесяз,31Иеровоамлы со шуиз: «Аслыд дас люкетсэ басьты, уго тазьы шуэ Израильлэн Инмарез Кузё-Инмар: ”Тани, Соломонлэн киулысьтыз эксэйлыкез пазьгисько но дас выжыез тон киулэ сётӥсько,32нош одӥгез выжы Давид ляльчиелы луыса, Иерусалим городлы луыса, кудзэ мон Израильлэн вань выжыосыз пӧлысь бырйи, со кие кылёз.33Тазьы луоз Монэ кельтэмзы понна, сӥдон калыклэн Астарта инмарезлы, моав калыклэн Хамос инмарезлы, аммон калыклэн Милхом инмарезлы йыбыртъямзы понна, Давид атаезлэсь адӟем карыса, Мынам азям ярамон уж лэсьтыса, пуктон-косонъёсме, курон-косонъёсме быдэсъяса, сюресъёсы кузя мынымтэзы понна.34Солэн киысьтыз быдэссэ эксэйлыкез уг басьтӥськы, Аслам быръем, курон-косонъёсме, пуктон-косонъёсме быдэсъяса улэм Давид ляльчиелы луыса вань улон нуналъёсыз ӵожелы Мон сое кивалтӥсь карыса кельтӥсько.35Но солэн пиезлэн киулысьтыз эксэйлыкез басьто но солэсь дассэ выжызэ тыныд сёто.36Нош солэн пиезлы одӥгзэ выжыез сёто, Давид ляльчиелэн югдыса улӥсез Мынам азям, Иерусалим городын, кудзэ Мон Аслам нимы отын мед улоз шуыса бырйи, пумтэм вапумъёс мед улоз.37Тонэ Мон бырйисько, мае лулыд-сюлмыд куре, ваньмыныз соин тон кузёяськыса улод, Израильлы эксэй луод.38Тыныд сётэм вань курон-косонъёсме быдэсъяса улӥд ке, сюресъёсы кузя ветлӥд ке, Мыным ярамон ужъёс лэсьтыса улӥд ке, пуктон-косонъёсме, курон-косонъёсме быдэсъяса улӥд ке, кызьы улӥз Мынам Давид ляльчие, соку Мон тонэн огазьын луо, Давидлы кадь Тынэсьтыд эксэй выжыдэ юнмато, Израилез тон кие сёто.39Давидлэсь выжызэ та понна зӥбломыто, но вань нуналъёс ӵожелы уг”».40Нош Соломонлэн Иеровоамез виемез потэ вал; соку Иеровоам кутӥз но Египетэ пегӟиз, Египетлэн Сусаким эксэез доры, Соломон кулытозь отын улӥз.
41Соломонлэн вань мукет лэсьтэм ужъёсыз, визьлыкез сярысь Соломонлэн ужъёсыз книгаын гожъямын.42Соломон быдэс Израильлы эксэй луыса Иерусалимын ньыльдон ар пукиз.43Соломон кулӥз но, сое атайёсыныз огазе Давидлэн, атаезлэн, городаз ватӥзы; солэн интыяз эксэе Ровоам пиез пуксиз.
Глава 11