Выбрать язык
Книги Ветхого Завета
Книги Нового Завета
с русским текстом1Ровоам Сӥхеме лыктӥз, уго вань израиль калык сое эксэе пуктон понна Сӥхеме лыктӥз.2Соломон эксэйлэсь пегӟыса Египетын улӥсь Наватлэн Иеровоам пиез кылӥз та сярысь но Египетысь дораз берытскиз.3Сое ӧтьыса вайизы. Соку Иеровоам но вань люкаськем израиль калык лыктыса Ровоам [эксэйлы] шуизы:4«Атаед ми вылэ секыт зӥбет ошиз, нош тон атаедлэсь милемлы сётэм секыт ужзэ капчияты, ми вылэ ошем секыт зӥбетсэ но, соку ми тыныд ужаса-тыршыса уломы».5Со соослы шуиз: «Мынэлэ, нош куинь нунал ортчыса, берен лыктэ». Калык кошкиз.
6Ровоам эксэй Соломон атаезлэн улэп дыръяз солэн азяз сылэм пересь визьнодчиосын кенешыса шуиз: «Та калыклы мыным ответ сётон понна кыӵе визь-кенеш сётоды?»7Соос солы шуизы: «Та нуналлы тон та калыклы медо луид ке, ярамон уж лэсьтӥд ке, соослы ярад ке, соосын лякытэн вераськид ке, соку вань улон нуналъёсыд ӵожелы тынад ляльчиосыд луозы».8Нош со пересь визьнодчиослэсь солы сётэм визь-кенешсэс санэ ӧз поны, солэн азяз сылӥсь, ӵош будэм егит муртъёсын кенешиз,9соослы шуиз: «Мар тӥ шуоды, кыӵе кенеш сётоды, та калыклы кыӵе ответ сётом, кудӥз шуэ: ”Атаедлэсь ми вылэ ошем секыт зӥбетсэ капчияты”?»10Соин ӵош будэм егит пиос солы шуизы: «”Атаед ми вылэ секыт зӥбет ошиз, нош тон сое капчияты” шуись калыклы тазьы шу: ”Мынам чӧльые атаелэн кускызлэсь зӧкгес;11атае тӥледыз секыт зӥбетэн курадӟытӥз ке, мон сое эшшо но бадӟымато; атае тӥледыз сюлоен вӧсь карылӥз ке, мон тӥледыз скорпионъёсын вӧсь каро”».
12Эксэйлэн косэмезъя, куинетӥ нуналаз Иеровоам вань калыкен ӵош Ровоам доры лыктӥзы, со шуиз вал: «Куинетӥ нуналэ берен мон доры лыктэ».13Эксэй калыкен чурыт вераськиз, пересь визьнодчиослэсь визь-кенешсэс санэ ӧз поны.14Егит пиослэсь верам визь-кенешсэс кылзӥськыса, со шуиз: «Атае тӥ вылэ секыт зӥбет ошиз, нош мон тӥлесьтыд зӥбеттэс эшшо будэто; атае тӥледыз сюлоен вӧсь карылӥз, нош мон тӥледыз скорпионъёсын вӧсь каро».15Эксэй калыклэсь верамзэ ӧз кылзы, уго Кузё-Инмар тазьы малпаз, Сӥломысь Ахия пыр Наватлэн Иеровоам пиезлы Кузё-Инмарлэн верам кылыз мед быдэсмоз.16Вань израиль калык адӟиз, эксэй соослэсь верамзэс ӧз кылзы шуыса. Эксэйлы ответ сётыса, калык шуиз: «Давид бордын кыӵе милям люкетмы? Иессей пи бордын милемлы люкет ӧвӧл; израиль пиос, ваньды асьтэлэн балаганъёсады бертэ! Табере тод, аслад выжыед сярысь сюлмаськы, Давид!» Израиль калык аслаз балаганъёсаз кошкиз.17Иудалэн городъёсаз улӥсь израиль пиосын гинэ кузёяськыса улӥз Ровоам.
18Ровоам эксэй выт бичасьёслэсь кивалтӥсьсэс Адонирамез ыстӥз, нош израиль калык со вылэ изъёс зӥръяз но, со кулӥз; ачиз Ровоам ӝогак ожмаськон уробо вылэ султӥз но Иерусалиме пегӟиз.19Та нуналэ но Израиль Давид выжы бордысь куштӥськыса улэ.
20Израильысь вань калык Иеровоам [Египетысь] берытскиз шуыса кылэм бераз сое асьсэлэн ӧтчамазы ӧтьыса вайизы но быдэс Израильлы сое эксэй каризы. Давидлэн эксэй юртэз борды Иуда [но Вениамин] выжы сяна, нокин ӧз кыльы.
21Ровоам Иерусалиме лыктӥз но Иудалэн быдэс выжыысьтыз, Вениамин выжыысь сю тямыстон сюрс ожгарчиосты бырйыса люказ израиль калыкен ожмаськыны но эксэйлыкез Соломонлэн Ровоам пиезлы берыктон вылысь.22Инмарлэн адямиезлы, Самейлы, Инмар дорысь верамын вал:23«Иудей эксэйлы, Соломонлэн Ровоам пиезлы, Иудаен Вениамин выжыослы, мукет адямиослы но тазьы вера:24”Тазьы шуэ Кузё-Инмар: Эн ветлэ, агай-вынъёсыныды, израиль пиосын, ожмаськыны эн кутске; ваньды дорады бертэ, уго та Мон дорысь вал”». Соос кылзӥськизы но Кузё-Инмарлэн верам кылъёсызъя котькудӥз аслаз дораз кошкиз.
25Ефрем гурезьысь Сӥхем карез Иеровоам выльдӥз но отчы улыны интыяськиз; отысен мыныса Пенуэл карез юнматӥз.26Иеровоам ас сюлмаз малпалляз: «Эксэйлык нош ик Давид выжылэн киулаз потыны быгатоз;27та калык курбон сётылыны Кузё-Инмарлэн корказ Иерусалиме ветлыса улӥз ке, соку та калыклэн сюлмыз ас кузёез пала, Иудей эксэй Ровоам пала, берытскоз, но соос монэ виёзы, Иудей эксэй Ровоам пала берытскозы».28Кенешем бераз эксэй кык зарни кунянъёс лэсьтӥз но [калыклы] шуиз: «Тӥледлы Иерусалиме ветлыны кулэ ӧвӧл ни; Израиль, тани тынад инмаръёсыд, соос тонэ Египет музъемысь поттӥзы».29Одӥгзэ Вефиле пуктӥз, мукетсэ – Данэ.30Та уж калыкез сьӧлыке пыртӥз, уго калык пӧлысь одӥгъёсыз Вефиле ветлыны кутскизы, мукетъёсыз – Данэ; [Кузё-Инмарлэн храмаз ветлэмысь дугдӥзы].31Гурезь йылэ куала пуктӥз, калык пӧлысь священникъёсты пуктӥз, соос Левий выжыысь ӧй вал.32Праздник ортчытыны нунал тупатӥз: тямысэтӥ толэзе, толэзьлэн дас витетӥ нуналаз, Иудеяын ортчылӥсь праздниклы укшатыса; курбон сётон ӝӧк вылын курбон сётылӥз; тазьы ик со Вефильын но лэсьтӥз киын лэсьтэм кунянъёслы курбон сётылон вылысь. Вефильын гурезь йылъёсы лэсьтэм куалаосы священникъёсты пуктӥз.33Вефильын аслаз лэсьтэм курбон сётон интыяз курбонъёс сётӥз – тямысэтӥ толэзьлэн дас витетӥ нуналаз, ас тодэмъяз быръем толэзе; израиль пиослы праздник тупатӥз, ӵындытон понна курбон сётон инты доры лыктӥз.
Глава 12