Выбрать язык
Книги Ветхого Завета
Книги Нового Завета
с русским текстом1Иеровоам курбон сётон интыын ӵындытон ортчытыны дасяськыса сылыкуз, Кузё-Инмарлэн верам кылызъя, Иудеяысь потыса, Вефиле Инмарлэн адямиез лыктӥз.2Курбон сётон интылэн азяз со Кузё-Инмарлэсь кылзэ вераса шуиз: «Курбон сётон инты, курбон сётон инты! Тазьы шуэ Кузё-Инмар: ”Тани, Давид юртлы пи вордӥськоз, солэн нимыз Иосия луоз, со гурезь йылъёсысь священникъёсты, тон вылын али ӵындытъян ортчытъясьёсты, тон вылын ик курбонлы сётоз, тон вылын адями лыосты сутоз”».3Со нуналэ, тазьы вераса, паймымон тодмет возьматӥз: «Тае Кузё-Инмар вераз шуыса, тани солэн паймымон тодметэз таӵе луоз: тани та курбон-сётон инты куашкалоз, со вылысь пень кисьтӥськоз».
4Инмарлэн адямиезлэсь Вефильын, курбон сётон интылэн азяз, верамзэ кылэм бераз Иеровоам эксэй курбон сётон инты дорысен кизэ ӝутыса шуиз: «Кутэ сое». Со вылэ урдскем киыз пумиз, ас бордаз берыктэмез ӧз луы ни.5Кузё-Инмарлэн кылызъя, Инмарлэн адямиезлэн сётэм паймымон тодметэзъя курбон сётон инты куашказ, курбон сётон инты вылысь пень кисьтӥськиз.6[Иеровоам] эксэй Инмарлэн быръем адямиезлы шуиз: «Инмаредлэсь Кузё-Инмарлэсь вӧсяськыса мылкыдзэ небӟыты, мон понна вӧсяськы, киме ас бордам берыктэме мед луысал». Инмарлэн адямиез Кузё-Инмарлэсь вӧсяськыса мылкыдзэ небӟытӥз но соку эксэй кизэ ас бордаз берыктӥз, киыз азьвыл кадь ик луиз.7Инмарлэн адямиезлы эксэй шуиз: «Монэн ӵош корка пыр, сиыса-юыса мугордэ юнматы, мон тыныд кузьым сёто».8Нош Инмарлэн адямиез эксэйлы шуиз: «Тон мыным ӝыны юрттэ сётысалыд ке но, тонэн ӵош уг мыны, та интыын нянь уг сиы, ву уг юы.9Кузё-Инмар дорысь вуэм иворын мыным таӵе косон сётэмын вал: ”Отын эн сиськы, ву эн юы, мынэм сюрес вылтӥд эн берты”».10Мукет сюрес вылтӥ со кошкиз, Вефиле лыктэм сюрес вылтӥз берен ӧз ни мыны.
11Вефильын улӥз одӥг пересь визьнодчи-пророк. Солэн пиез бертӥз но ваньзэ вераз, туннэ Вефильын мар лэсьтӥз Инмарлэн адямиез, солэсь эксэйлы верам кылъёссэ но пиосыз атайзылы веразы.12Атайзы соослэсь юаз: «Кыӵе сюрес вылтӥ со кошкиз?» Пиосыз возьматӥзы, кыӵе сюрес вылтӥ кошкиз Иудеяысь вуылэм Инмарлэн адямиез.13Аслаз пиосызлы шуиз: «Мыным ишакез кытке». Ишак вылэ энер понӥзы но, со ишак вылэ пуксиз.14Инмарлэн адямиез бӧрсьы мынӥз, тыпы улын пукыкуз, солэн матаз лыктыса, шуиз: «Тон-а со Иудеяысь вуэм Инмарлэн адямиез?» Соиз шуиз: «Мон со».15Солы шуиз: «Коркам пырыса сиськы».16Соиз шуиз: «Мон уг быгатӥськы, выльысен берытскыса, тон доры мыныны; та интыын, тон дорын уг сиськы, ву но уг юы,17уго Кузё-Инмар дорысь вуэм кылын мыным верамын вал: ”Отын эн сиськы, ву эн юы, мынэм сюрестӥд берен эн берытскы”».18Со солы шуиз: «Мон но тон кадь ик пророк, Кузё-Инмарлэн кылыныз Кылчин мыным шуиз: ”Берыкты сое аслад коркад; мед сиськоз, ву мед юоз”». – Со ӧрекчаз сое.19Со соин ӵош берытскиз но солэн корказ сиськиз, вуэн сюзэ юзматӥз.20Соос эшшо ӝӧк сьӧрын пукон дыръя сое берыктӥсь пророклы Кузё-Инмар дорысь верамын вал.21Инмарлэн адямиезлы, Иудеяысь лыктэм муртлы, со кыл вераз: «Тазьы шуэ Кузё-Инмар: Кузё-Инмарлэн кылызлы тэрытскымтэед понна, Инмаредлэсь Кузё-Инмарлэсь сётэм куронъёссэ быдэстымтэед понна,22берытскемед бере Солэн татын ”эн сиськы, ву эн юы” шуэм интыяз сиськемед, юэмед понна тынад мугорыд атайёсыдлэн шай вылазы уз пыры».
23Со сиськем бере, сюзэ юзматэм бере дораз ваем пророкез нуыны со ишаксэ кыткиз.24Со кошкиз. Сюрес вылысен сое лев пумитаз но вииз сое. Сюрес вылын мугорыз куштӥськыса кыллиз; ишак со вӧзын сылӥз, лев но со вӧзын ик сылӥз.25Тани, сюрес вылтӥ мынӥсьёс адӟизы сюрес вылэ куштэм мугорез, со вӧзын сылӥсь левез, соку соос пересь визьнодчилэн-пророклэн городаз мыныса веразы.26Сое сюрес вылысь берыктӥсь пророк та сярысь кылыса шуиз: «Та Кузё-Инмарлэн верам кылызлы тэрытскисьтэм Инмарлэн адямиез; Кузё-Инмар кызьы солы вераз вал, Кузё-Инмар сое лев киулэ сётӥз, лев сое сыскиз, вииз».27Ас пиосызлы шуиз: «Мыным ишакез кытке». Соос кыткизы.28Со мынӥз но сюрес вылэ куштэм мугорез шедьтӥз; нош ишак но, лев но солэн мугор дораз сыло; лев солэсь мугорзэ ӧз сиы, ишакез но ӧз йырйы.29Инмарлэн адямиезлэсь мугорзэ пророк ӝутӥз но, ишак вылэ поныса, берен нуиз. Пересь визьнодчи-пророк ас городаз со понна бӧрдыны, сое ватыны мынӥз.30Кулэм мурт ватон интыяз солэсь мугорзэ понӥз, со понна бӧрдӥз: «Эй, братэ мынам!»31Сое ватэм бераз со пиосызлы шуиз: «Мон кулэм бере Инмарлэсь адямизэ ватэм интые мугорме понэ, солэн лыосыныз артэ мынэсьтым лыосме понэ;32соку быдэсмоз Кузё-Инмарлэн косэмезъя Вефильысь курбон сётон инты сярысь, Самариялэн городъёсысьтыз гурезь йылъёсысь куалаос сярысь солэн верам кылыз».33Та ужъюгдур бере но Иеровоам кырыж сюрес вылысьтыз ӧз кожы, гурезь йылъёсысь куалаосы калык пӧлысь священникъёсты пуктылӥз; кинлэн потэ вал, ялан соосты пуктылӥз, со мурт гурезь йылысь куалаын священник луылӥз.34Таӵе улон Иеровоамлэсь выжызэ сьӧлыке пыртӥз, быронэ, музъем вылысь быдтонэ нуиз.
Глава 13