Выбрать язык
Книги Ветхого Завета
Книги Нового Завета
с русским текстом1Со виын Иеровоамлэн Авия пиез висьыны кутскиз.2Иеровоам аслаз кышноезлы шуиз: «Султы но Иеровоамлэн кышноез луэмдэ медаз тодмалэ шуыса, тодмантэм дӥсяськыса, Сӥломе мын. Отын Ахия пророк вань; со азьпалзэ тодытыса вераз, мон та калыклэн эксэез луо шуыса.3[Инмарлэн адямиезлы] сьӧрад дас нянь, уднянь, кувшин чечы басьтыса мын со доры; со вералоз, мар луоз пинал пиен».
4Иеровоамлэн кышноез озьы ик лэсьтӥз: султӥз но Сӥломе, Ахия пророклэн корказ вуиз. Ахия адӟыны ӧз ни быгаты, пересьмыса синъёсыз выремысь дугдӥзы.5Кузё-Инмар Ахиялы шуиз: «Тани, Иеровоамлэн кышноез лыктэ пиез сярысь юаны, со висе; тазьы но тазьы шу солы, со тодмантэм вылысь дӥсяськыса лыктоз».6Кышномуртлэсь ӧстӥ пырыкуз пыд куаразэ кылыса, Ахия шуиз: «Иеровоамлэн кышноез, пыр; малы тыныд кулэ луиз тодмантэм луон вылысь дӥсяськыны? Мон, шурдыт мурт, тон доры ыстэмын.7Мын, Иеровоамлы тазьы шу: ”Тазьы шуэ Израильлэн Инмарез Кузё-Инмар: Мон тонэ огшоры калык пӧлысь ӝутӥ, Аслам израиль калыкелы азьветлӥсь кари.8Давид выжылэн киулысьтыз эксэйлыкез ишкалтӥ но тон кие сётӥ; нош тон Давид ляльчие кадь ӧвӧл, со Мынэсьтым курон-косонъёсме чакласа улӥз, вань сюлмыныз со Мон сьӧры мынӥз, Мынам син азям ярамон ужъёс лэсьтыса улӥз;9тынэсьтыд азьвыл кинъёс вал, соослэсь ваньзылэсь но тон уродгес лэсьтылӥд, мынӥд но аслыд мукет инмаръёс, сульдэръёс лэсьтӥд – Мынэсьтым вожме поттон понна, Монэ сьӧрпалад карон понна.10Со понна Иеровоамлэн выжыез вылэ шугадӟонъёс лэзё, Иеровоамез но борддор борды педло потасьёссэ – пытсэтын пукисьёссэ но, Израиле кылемъёссэ но – ваньзэс быдто. Иеровоамлэсь юртсэ ӵужо, кызьы жуг-жагез чылк-чылк ӵужо.11Иеровоамлэн выжыысьтыз городын кулӥсьёсты айы пуныос сиёзы, нош кин ке бусые кулӥз, сое ин тылобурдоос кокчалозы; тазьы шуиз Кузё-Инмар”.12Мын, аслад дорад берт; городэ вамыштыса гинэ вуод, пичи пиед кулоз;13вань израиль калык со понна бӧрдоз, сое ватозы. Иеровоамлэн семьяысьтыз со огназ шайвылэ пыроз, малы ке шуоно Израильлэн Инмарез Кузё-Инмар азьын Иеровоамлэн семьяез пӧлысь со пилэн маке но ӟечез адӟиськиз.14Кузё-Инмар Аслыз Израилен кивалтыны эксэез ӝутоз, со нуналэ со Иеровоамлэсь выжызэ быдтоз; мар-о? Али ик.15Кузё-Инмар Израилез погыртоз, вуын сэзъяськыса сылӥсь камыш боды кадь со луоз, атайёссылы сётэм ӟеч музъемысь израиль калыкез сэрпалтоз, сульдэръёс-идолъёс лэсьтылыса Кузё-Инмарлэсь вожзэ поттыса улэмзы понна шур сьӧры пазьгыса лэзёз;16Иеровоамлэн аслаз лэсьтэм сьӧлыкъёсыз понна, соос пыр Израилез сьӧлыке пыртэмез понна, соос понна [Кузё-Инмар] Израилез мурт киулэ сётоз».
17Иеровоамлэн кышноез султыса кошкиз но Фирца каре вуиз; ӧс выжые вамыштыса гинэ вуиз, пичи пиналзы кулӥз.18Ватӥзы сое, вань израиль калык бӧрдӥз со понна, кызьы Кузё-Инмар Аслаз ляльчиез, Ахия пророк, пыр вераз вал.
19Иеровоамлэн мукет ужъёсыз – кызьы со ожмаськиз, кызьы эксэйын пукиз – ваньмыз гожтэмын Израиль эксэйёслэн книгаязы.20Иеровоам кызь кык ар ӵоже эксэйын пукиз; кулӥз но, атайёсыныз огазе ватӥзы. Солэн интыяз эксэе пуксиз солэн Нават пиез.
21Ровоам, Соломонлэн пиез, Иудеялы эксэй луиз. Эксэе пуксьыкуз, Ровоамлы ньыльдон одӥг арес вал, дас сизьым ар ӵоже со Иерусалимын эксэй луыса пукиз, со городын, кудзэ Кузё-Инмар вань Израиль выжыос пӧлысь бырйиз, отын Солэн нимыз мед улоз шуыса. Ровоамлэн анаез аммон выжыысь Наама нимо вал.22Кузё-Инмарлэн син азяз Иуда выжы ярантэм ужъёс лэсьтыса улӥз, атайёссылэн лэсьтылэм сьӧлыкъёссылэсь но тросгес сьӧлыкаса, соос сярысь но Солэсь золгес вожзэ поттылӥзы.23Асьсэ дорын вань ӝужыт гурезь йылъёсы, вань вужер сётӥсь писпуос улэ вӧсяськон-куяськон интыос лэсьтылӥзы, сульдэръёс пуктылӥзы.24Та музъем вылын азыса-калгыса улӥсьёс но вал, израиль пиослэн син азьысьтызы Кузё-Инмарлэн улляса лэзем калыкъёсызлэсь юрӟым сьӧлыкъёссэс лэсьтылыса улӥзы.
25Ровоам витетӥ арзэ эксэйын пукыку, Египетлэн Сусаким эксэез Иерусалимлы пумит урдскиз.26Кузё-Инмарлэн коркасьтыз, эксэй юртысь ваньбурез киултӥз, [Давидлэсь Сува кунысь Адраазар эксэйлэн ляльчиосызлэсь басьтэм но Иерусалиме пыртэм зарни щитъёссэс]. Ваньзэ киултӥз; Соломонлэсь лэсьтэм вань зарни щитъёссэ но.27Ровоам эксэй соос интые ыргон щитъёс лэсьтӥз но эксэй корка пыронэз возьмась, мугор возьмасьёслэн кузёйыръёссылэн киулазы сётӥз.28Эксэй Кузё-Инмарлэн корказ пырыку, мугор возьмасьёс соосты нуллӥзы, нош бӧрысь соосты нош ик мугор возьмасьёслэн корказы вайылӥзы.
29Ровоам сярысь, ваньзэ, мар со лэсьтылӥз, Иудей эксэйёслэн книгаязы гожтэмын.30Ровоамен Иеровоам вань улон нуналъёссы ӵоже ожмаськыса улӥзы.31Ровоам кулӥз но, атайёсыныз огазе Давидлэн городаз сое ватӥзы. Анаез аммон ныл Наама нимо вал. Авия нимо пиез солэн интыяз эксэе пуксиз.
Глава 14