Выбрать язык
Книги Ветхого Завета
Книги Нового Завета
с русским текстом1Ахав кулэм бере Моав Израиль бордысь куштӥськиз.2Нош Охозия Самарияысен бадӟым комнатаысьтыз решётка пыр усиз но, тазалыкез лябӟиз. Тазьы вераса, адямиоссэ юалляськыны ыстӥз: «Мынэлэ, Веельзевуллэсь, аккарон калыклэн инмарезлэсь, юалэ: ”Та висёнэлэсь мон бурмо на-а?”» [Юалляськыны мынӥзы.]
3Соку Кузё-Инмарлэн Кылчинэз Фесваысь Илиялы шуиз: «Султы но, Самарияысь эксэйлэн ыстэм муртъёсызлэн пумитазы мыныса, соослы шу: ”Израильын Инмар ӧвӧл-а, малы аккарон калыклэн Веельзевул инмарезлэсь юалляськыны мынӥськоды?4Со понна Кузё-Инмар тазьы шуэ: выдэм валес вылысьтыд уд ни султы, кулод”». Илия мыныса соослы вераз.5Ыстэм муртъёс Охозия доры берытскизы. Со соослы шуиз: «Малы бен нош тӥ берытскиды?»6Солы соос шуизы: «Милям пумитамы адями потӥз но шуиз: ”Мынэлэ, ыстэм эксэйды доры берытске но солы шуэ: ”Тазьы шуэ Кузё-Инмар: Израильын Инмар ӧвӧл шат; малы аккарон калыклэн Веельзевул инмарезлэсь юалляськыны ыстӥськод? Со понна выдэм валес вылысьтыд тон уд ни султы, кулод!”»7Со соослы шуиз: «Тӥляд пумитады потыса та кылъёсты верась муртлэн кыӵе тусбуйыз?»8Соос солы шуизы: «Быдэсак со тушо-гоно, кускыз ку еэн думемын». Соку со шуиз: «Со Фесваысь Илия».9Со Илия доры витьтон муртэн кивалтӥсез витьтон ожгарчиосын ӵош келяз. Илия гурезь йылын пукыку, со доры пырыса шуиз: «Инмарлэн адямиез! Эксэй шуиз: васькы».10Витьтон муртэн кивалтӥсьлы ответ сётыса, Илия шуиз: «Мон Инмарлэн адямиез ке, соку инмысь тыл мед васькоз но тонэ но, тынэсьтыд витьтон ожгарчиостэ но тыл мед сутоз». Соку инмысь тыл васькиз но сое но, солэсь витьтон ожгарчиоссэ но ӵушказ.11Та бере мукетсэ витьтон муртэн кивалтӥсез витьтон ожгарчиосыныз ӵош Илия доры ыстӥз. Со Илиялы вераны кутскиз: «Инмарлэн адямиез! Эксэй тазьы шуиз: ”Ӝоггес васькы”».12Солы ответ сётыса, Илия шуиз: «Мон Инмарлэн адямиез ке, соку инмысь тыл мед васькоз но тонэ но, тынэсьтыд витьтон ожгарчиостэ но тыл мед ӵушкалоз». Соку Инмар тыл инмысь васькиз но сое но, солэсь витьтон ожгарчиоссэ но тыл ӵушказ.
13Та бере эксэй эшшо куинетӥ ползэ витьтон муртэн кивалтӥсез витьтон ожгарчиосын ӵош Илия доры ыстӥз. Куинетӥез витьтон муртэн кивалтӥсь Илия доры тубиз но, Илиялэн азяз пыдесъяськыса, сюлворыса-тэльмырыса вераны кутскиз: «Инмарлэн адямиез! Мынэсьтым лулме, ляльчиосыдлэсь та витьтон муртлэсь лулзэс адӟемпотостэм эн кары;14тани, инмысь тыл васькыса, кыксэ витьтон муртэн кивалтӥсьёсты, соосын ӵош лыктэм быдэн витьтон ожгарчиосты ӵушказ; нош тон али мынэсьтым лулме адӟемпотостэм эн кары!»15Соку Кузё-Инмарлэн Кылчинэз Илиялы шуиз: «Мын соин ӵош, эн кышка солэсь». Илия султӥз но соин ӵош эксэй доры васькиз.16Со солы шуиз: «Тазьы шуэ Кузё-Инмар: Израильын Инмар ӧвӧл шат, малы тон аккарон калыклэн Веельзевул инмарез доры адямиосты юалляськыны ыстӥд, со понна выдэм валес вылысьтыд уд ни султы, кулод».17Илия пыр Кузё-Инмарлэн верам кылызъя со кулӥз. Охозиялэн интыяз Иорам братэз эксэе пуксиз, уго солэн аслаз пиез ӧй вал; со вал Иосафатлэн Иорам пиез Иудеяын кыкетӥ арзэ эксэйын пукыку.18Охозия сярысь, мар со лэсьтӥз, Израиль эксэйёслэн книгаязы гожтэмын.
Глава 1