Выбрать язык
Книги Ветхого Завета
Книги Нового Завета
с русским текстом1Куинь ар улӥзы, нош Сирияен Израиль куспын ожмаськон ӧй вал.2Куинетӥ араз Иудеялэн Иосафат эксэез Израильлэн эксэез доры мынӥз.3Израильлэн эксэез медоосызлы шуиз: «Тодӥськоды-а, Галаадысь Рамоф кар милям шуыса? Нош ми сокем кема дыр ӵоже ини чус улӥськомы но сое Сириялэн эксэезлэн киулысьтыз ум басьтӥське».4Со Иосафатлы шуиз: «Монэн ӵош Галаадысь Рамоф карлы пумит ожен мынод-а?» Иосафат Израильлэн эксэезлы шуиз: «Кызьы тон, мон но озьы ик; кызьы тынад калыкед, мынам калыке но озьы ик; кызьы тынад валъёсыд, мынам но валъёсы озьы ик».
5Израильлэн эксэезлы Иосафат шуиз: «Туннэ юа, мар шуоз Кузё-Инмар».6Израильлэн эксэез ог ньыль сю пророкъёсты люказ но соослы шуиз: «Галаадысь Рамоф карлы пумит ожен мыным мыныны яра-а, уг-а?» Соос шуизы: «Мын, Кузё-Инмар сое эксэйлэн киулаз сётоз».7Соку Иосафат шуиз: «Кузё-Инмарлэн пророкез татын на-а, со пыр Кузё-Инмарлэсь юаны мед быгатысалмы на?»8Израильлэн эксэез Иосафатлы шуиз: «Вань на эшшо одӥг адями, кин пыр Кузё-Инмарлэсь юаны луоно на, но мон сое уг яратӥськы, уго со мынам азьпалы сярысь ӟечсэ уг вера, уродзэ гинэ вера, – со Иемвлайлэн пиез Михей». Соку Иосафат шуиз: «Эксэй, тазьы эн ни вера».9Израильлэн эксэез одӥг евнухез ӧтиз но солы шуиз: «Иемвлайлэсь пизэ Михеез ӧтьыны ӝоггес мын».
10Израильлэн эксэез но Иудеялэн Иосафат эксэез котькудӥз аслаз пуконаз пукиз, эксэй дӥськутэн дӥсяськыса, Самарияе пырон капка дорысь падвожын пукизы, соос азьын вань пророкъёс азьпалзэ тодытыса улӥзы.11Хенаанлэн Седекия пиез аслыз корт сюръёс лэсьтыса шуиз: «Тазьы шуэ Кузё-Инмар: ”Соосын тон сири пиосты быдтытозяд лекалод”».12Вань пророкъёс но тазьы ик азьпалзэ тодытыса шуылӥзы: «Мын Галаадысь Рамоф каре, азинлыкед луоз, Кузё-Инмар сое эксэйлэн киулаз сётоз».
13Михеез ӧтьыны ыстэм мурт солы шуиз: «Тани, вань пророкъёс огкылысь эксэйлэн азьпал улонэз сярысь ӟечсэ верало; тынад но кылыд соослэн кылынызы мед тупасал: тон но ӟеч кыл вера».14Соку Михей шуиз: «Улэп Кузё-Инмар! Кузё-Инмар мар вераз, мон сое верало».15Со эксэй доры лыктӥз. Эксэй солы шуиз: «Михей! Галаадысь Рамоф кар вылэ милемлы ожен мыноно-а, ӧвӧл-а?» Со солы шуиз: «Мын, азинлыкед луоз, Кузё-Инмар сое эксэйлэн киулаз сётоз».16Эксэй солы шуиз: «Эшшо но эшшо мон тонэ сюлворыса курисько: Кузё-Инмарлэн нимыз понна, зэмлыкез сяна, номыр но мукетсэ тон мыным эн вера».17Со шуиз: «Мон адӟисько гурезьёсы пазьгиськем, возьмаськисьтэк кылем ыжъёсты кадь вань израиль калыкез. Кузё-Инмар шуиз: ”Ӧвӧл соослэн кивалтӥсьсы, ваньзы соос каньылэн асьсэлэн доразы мед бертозы”».18Израильлэн эксэез Иосафатлы шуиз: «Ӧй вера-а мон тыныд, со мынам азьпалы сярысь ӟечсэ уг вера, уродзэ гинэ вера шуыса?»
19Соку [Михей] шуиз: «[Озьы ӧвӧл; мон ӧй, но] Кузё-Инмарлэсь верам кылзэ кылзы: Аслаз эксэй пуконаз пукись Кузё-Инмарез мон адӟи, Инмысь вань кылчин кужымъёс Со вӧзын, бурпалаз но, паллян палаз но сыло.20Кузё-Инмар шуиз: ”Кин меда Ахавез берыктыны быгатоз, Галаадысь Рамоф каре ожен мед мынысал но отчы мед бырысал?” Одӥгез одӥг сямен вераз, мукетыз мукет сямен вераз.21Одӥг дух потӥз но Кузё-Инмарлэн азяз султыса шуиз: ”Мон берыкто сое”. Кузё-Инмар солы шуиз: ”Маин?”22Со шуиз: ”Мон пото но солэн пророкъёсызлэн кылынызы-ымынызы ӧрекчаса верасько”. Кузё-Инмар шуиз: ”Тон сое берыктод, тон со ужез быдэстод; мын, лэсьты озьы”.23Тани, вань пророкъёсыдлэн кылазы-ымазы Кузё-Инмар ӧрекчи духез пырыны лэзиз; нош Кузё-Инмар тон сярысь умойтэмзэ вераз».24Хенаанлэн Седекия пиез лыктӥз но Михейлэн бамаз чабкыса шуиз: «Кызьы озьы, Кузё-Инмарлэн Духез мон бордысь кошкиз, оло, тон пушкын вераськон понна Со кошкиз шат?»25Михей солы шуиз: «Тани, тон тае адӟод пегӟон понна комнатаысь комнатае бызьылон нуналад».26Израильлэн эксэез шуиз: «Михеез кутыса, карлэн Амон кивалтӥсез доры, эксэйлэн Иоас пиез доры нуэ но27шуэ: ”Тазьы эксэй шуэ: Тае пытсэтэ ворсалэ но ӧжытак гинэ нянен сюдэ, ӧжытак ву секталэ, капчи мылкыдын берытскытозям”».28Михей шуиз: «Капчи мылкыдын берытскид ке, соку мон пыр Кузё-Инмар ӧз вераськы». Соку шуиз: «Вань калык, кылзӥськы!»
29Израильлэн эксэез но Иудеялэн Иосафат эксэез Галаадысь Рамоф кар доры мынӥзы.30Израильлэн эксэез Иосафатлы шуиз: «Мон дӥськутме вошто но оже пото, нош тон эксэй дӥськуттэ дӥся». Израильлэн эксэез дӥськутсэ воштӥз но ожмаськыны кутскиз.31Сириялэн эксэез куамын кык ожмаськон уробоосын кивалтӥсьёсызлы косон сётыса шуиз: «Покчиеныз но, бадӟыменыз но эн ожмаське, ожмаське одӥг Израильлэн эксэеныз гинэ».32Ожмаськон уробоослэн кивалтӥсьёссы Иосафатэз адӟыса малпазы: «Зэм ик та Израильлэн эксэез», со пала кожытскизы соин ожмаськон вылысь. Соку Иосафат черектӥськиз.33Ожмаськон уробоослэн кивалтӥсьёссы адӟизы, та Израильлэн эксэез ӧвӧл шуыса, но со дорысь кожытскыса кошкизы.34Нош одӥг адями озьы гинэ пукыӵсэ золтӥз но Израильлэсь эксэйзэ корт дӥсезлэн вурысэз пыр яраё кариз. Валзэ валтӥсьлы шуиз: «Берлань чигна, ожгарчиос дорысь монэ палэнэ ну, мон яраё каремын».35Нош со нуналэ ожмаськон кужмояз, сири ожгарчиослэн ваче пумитазы ожмаськон уробо вылын эксэй сылӥз, нош ӝытазе со кулӥз, яраысьтыз вирыз ожмаськон уробое чур вияса улӥз.36Шунды пуксьыку ожгарчиослэн люкаськон интыязы ялэмын вал: «Ваньды асьтэлэн городады мынэ, ваньды асьтэлэн музъемады мынэ!»37Эксэй кулӥз но, сое Самарияе вайизы, эксэез Самарияе ватӥзы.38Ожмаськон уробоез Самарияысь ӵыпетын миськизы, Кузё-Инмарлэн верам кылызъя вирзэ пуныос нюлыса улӥзы, юмшась-калгись кышноос мисьтӥськизы.
39Ахавлэн вань мукет ужъёсыз, мар со лэсьтӥз, слон лылэсь пуктэм коркаез сярысь но, солэн вань пуктылэм городъёсыз сярысь но Израиль эксэйёслэн книгаязы гожтэмын.40Ахав кулӥз но, атайёсыныз огазе сое ватӥзы, со интые Охозия пиез эксэе пуксиз.
41Асалэн Иосафат пиез Иудеялы эксэе пуксиз, Израильын Ахав ньылетӥ арзэ эксэйын пукыку.42Эксэе пуксьыкуз, Иосафатлы куамын вить арес вал, кызь вить ар ӵоже со Иерусалимын эксэй луыса кивалтӥз. Анаезлэн нимыз Азува, со Салаиллэн нылыз вал.43Со котьку но атаезлэн, Асалэн, сюрес вылтӥз ветлӥз, со вылысь ӧз кожылы, Кузё-Инмарлэн син азяз ярамон уж лэсьтыса улӥз. Гурезь йылъёсын вӧсяськонъёс гинэ быдтэмын ӧй вал; калык ялан, гурезь йылъёсын курбон сётыса, ӵынатыса, вӧсяськонъёс ортчытъяз на.44Иосафат Израильлэн эксэеныз ваче тупаса улон сярысь кыл сётӥз.
45Иосафатлэн мукет ужъёсыз, быдэстэм бадӟымесь ужъёсыз, кызьы со ожмаськиз, ваньмыз Иудей эксэйёслэн книгаязы гожтэмын.46Атаезлэн, Асалэн, улон дырысеныз кылем азыса-калгыса улӥсьёсты со музъем вылысь быдтӥз.47Со виын Идумеялэн эксэез ӧй вал, эксэйлэн воштӥсез гинэ вал.48Офире зарнилы ветлон понна Иосафат [эксэй] зарезь вылтӥ уяно пыжъёс лэсьтӥз; но соос мыныса отчы ӧз вуэ, Ецион-Гаверын пазьгиськизы.49Соку Ахавлэн Охозия пиез Иосафатлы шуиз: «Тынад медоосыд мынам медоосыным ӵош пыжын мед мынозы». Нош Иосафат таин соглаш ӧз луы.50Иосафат кулӥз но, атайёсыныз огазе, Давидлэн, атаезлэн, городаз ватӥзы. Со интые Иорам пиез эксэе пуксиз.
51Ахавлэн Охозия пиез Самарияын Израильлы эксэе пуксиз, со вал Иосафатлэн Иудеяын дас сизьыметӥ арзэ эксэйын пукыкуз; кык ар ӵоже со [Самарияын] Израильлы эксэй луыса кивалтыса улӥз.52Кузё-Инмарлэн син азяз ярантэм ужъёс лэсьтыса улӥз, атаезлэн, анаезлэн сюрес вылтӥз ветлӥз, Наватлэн Иеровоам пиезлэн сюрес вылтӥз ветлӥз, кин Израилез сьӧлыке пыртӥз:53Со Вааллы ужаса-тыршыса, йыбыртъяса улӥз но ваньзэ атаез кадь лэсьтылӥз, Израильлэн Инмарезлэсь Кузё-Инмарлэсь вожзэ поттӥз.
Глава 22