Выбрать язык
Книги Ветхого Завета
Книги Нового Завета
с русским текстом1Та ужъюгдуръёс бере таӵе учыръёс луизы: Изреельысь Навуфейлэн Самарияысь Ахав эксэйлэн юртэз вӧзын Изреельын виноград бакчаез вал.2Ахав Навуфейлы тазьы шуиз: «Сёт мыным виноград бакчадэ; солэсь бакча сиён будэтон инты каро, уго со мынам коркаелы матын; нош со интые мон тыныд устозэгес виноград бакча сёто яке, тыныд яраз ке, азвесь сёто, кӧня тыр со сылэ».3Нош Навуфей Ахавлы шуиз: «Атайёсылэсь мыным сюрем люкетэз тыныд сётонлэсь Кузё-Инмаре монэ мед утёз!»4Изреельысь Навуфейлэн «атайёсылэсь люкетсэс мон тыныд уг сёты» шуэм кылъёсыз бере, Ахав куалектыса, кӧтӝожен гуртаз бертӥз. [Куалекъясь лулыныз] валесаз выдӥз, ымнырзэ огпала берыктӥз, ӧз но сиськы.5Со доры Иезавель кышноез пырыса шуиз: «Мар муген лулыд куалектэмын, малы уд но сиськиськы?»6Со кышноезлы шуиз: «Куке мон Изреельысь Навуфейлы шуи: ”Азвесен вуза мыным виноград бакчадэ яке, тыныд кулэ ке, со интые мон тыныд мукет виноград бакча сёто”, соку со мыным шуиз: ”Виноград бакчаме, [атайёслэсь мыным сюрем люкетэз], мон тыныд уг сёты”».7Кышноез, Иезавель, солы шуиз: «Израильын кыӵе эксэйлык луысал, тон озьы лэсьтысалыд ке? Султы, сиськы, буйгатскы, Изреельысь Навуфейлэсь виноград бакчазэ мон тыныд каро».
8Ахавлэн нимыныз Иезавель гожтэтъёс гожтӥз, солэн печатеныз юнматӥз но Навуфеен одӥг городын улӥсь тӧроослы, нимо-дано адямиослы ыстӥз.9Гожтэтъёсаз со тазьы гожтылӥз: «Визь утён луоз шуыса ялэ, Навуфеез калык пӧлы нырысь радэ пуктэ,10солэн ваче пумитаз кык йӧнтэм адямиосты пуктэ, соос со сярысь тазьы вераса мед тодытозы: ”Тон Инмарез но, эксэез но урод кылъёсын куаретӥд”; соин ик сое поттэ но изэн зӥръяса тышкалэ, мед кулоз».11Навуфейлэн городысьтыз воргоронъёс, солэн городаз улӥсь тӧроос, нимо-дано адямиос Иезавельлэн косэмезъя лэсьтӥзы, кызьы гожтэмын вал солэн ыстэм гожтэтъёсаз.12Визян дыр кутске шуыса ялӥзы, калыклэн азьпалаз Навуфеез пуктӥзы;13кык йӧнтэм адямиос потыса, солэн ваче пумитаз пуксизы но та лек сюлэмо адямиос калык азьын со вылэ ӧвӧлтэм кылъёс вераны кутскизы, соос шуизы: «Навуфей Инмарез но, эксэез но урод кылъёсын куаретӥз». Сое город сьӧры поттыса, изэн зӥръяса тышказы но, со кулӥз.14Иезавельлы ивор вераны ыстӥзы: «Навуфеез изэн зӥръяса тышказы но, со кулӥз».15Навуфей изэн зӥръяса тышкамын но кулэм шуыса, Иезавель кылӥз но Ахавлы шуиз: «Султы но Изреельысь Навуфейлэсь виноград бакчазэ ас киулад басьты, кудзэ тыныд солэн азвесен но сётэмез ӧз поты; Навуфей улэп ӧвӧл ини, со кулӥз».16[Изреельысь] Навуфей виемын шуыса, Ахав кылӥз но [вылысьтыз дӥськутсэ кесяз но чурыт бышкись дӥськут дӥсяз, нош собере] Ахав султыса Изреельысь Навуфейлэсь виноград бакчазэ ас киулаз басьтыны кошкиз.
17Фесваысь Илиялы Кузё-Инмар дорысь верамын вал:18«Султы но Израильлэн Самарияын улӥсь Ахав эксэез доры мын, – тани, али со Навуфейлэсь виноград бакчазэ киулаз басьтыны лыктӥз, –19солы шу: ”Тазьы шуэ Кузё-Инмар: тон виид но эшшо ке люкет басьтыны выриськод?” Солы шу: ”Тазьы шуэ Кузё-Инмар: кытын Навуфейлэсь вирзэ пуныос нюлӥзы, со интыын ик тынэсьтыд но вирдэ нюлозы”».20Ахав Илиялы шуиз: «Шедьтӥд тон монэ, тушмонэ!» Со шуиз: «Шедьтӥ, уго Кузё-Инмарлэн син азяз ярантэм уж лэсьтыса, [Солэсь вожзэ поттыса] улыны кутскид.21[Тазьы шуэ Кузё-Инмар:] ”Тани, тон вылэ шугадӟонъёс лэзё, тон бере ӵужо но Ахавлэсь борддор борды педло потасьёссэ, пытсэтын пукисьёссэ но, Израиле кылемъёссэ но – ваньзэс быдто.22Тынад выжыедлы озьы каро, кызьы Мон кари Наватлэн Иеровоам пиезлэн выжыезлы, Ахиялэн Вааса пиезлэн выжыезлы, вожме поттыса Монэ ултӥямед, йырме кур каремед понна, Израилез сьӧлыке пыртэмед понна”.23Иезавель пумысен но Кузё-Инмар шуиз: ”Иезавелез Изреельлэн борддор сьӧраз пуныос сиёзы”.24Городын, Ахав дорын кулӥсьёсты, пуныос сиёзы, нош бусыын кулӥсьёсты ин тылобурдоос кокчалозы».25Кузё-Инмарлэн син азяз сокем ярантэм ужъёс лэсьтонэ Ахав кадь сётӥськем муртъёс ӧй на вал, сое сыӵе ужъёслы кышноез Иезавель узатыса улӥз;26Кузё-Инмарлэн израиль пиос азьысь уллям аморрейёс кадь со туж йӧнтэм улӥз, сульдэръёслы-идолъёслы йыбыртъяз.
27Та верам кылъёсты кылыса, Ахав [Кузё-Инмар азьын небӟиз но бӧрдыса ветлӥз], вылысьтыз дӥськутсэ кесяз но вылаз чурыт бышкись дӥськут дӥсяз, визь утьыны кутскиз, чурыт бышкись дӥськутэныз ик кӧлаз, ӝожомыса ветлӥз.28Фесваысь Илиялы [Ахав пумысен] Кузё-Инмар дорысь верамын вал, Кузё-Инмар шуиз:29«Адӟиськод-а, Мон азьын макем зӥбыт-востэм луиз Ахав? Мон азьын зӥбыт-востэм кариськемез понна со вылэ шугадӟонъёс уг лэзьы; солэн пиез дыръя солэн выжыез вылэ шугадӟонъёс лэзё».
Глава 21