Выбрать язык
Книги Ветхого Завета
Книги Нового Завета
с русским текстом1Сириялэн Венадад эксэез аслэсьтыз вань ожгарчиоссэ люказ, соин ӵош куамын кык эксэйёс вал, валъёсын, ожмаськон уробоосын мыныса, Самарияез котыртӥз но соин ожмаськыны кутскиз.2Городэ, Израильлэн Ахав эксэез доры, вераськыны адямиосты ыстӥз,3солы шуиз: «Тазьы шуэ Венадад: ”Тынад зарниед, азвесед – со мынам, кышноосыд но, устоосыз пиосыд но – мынам”».4Израиль эксэй ответ сётыса шуиз: «Тынад верам кылыдъя мед луоз, кузёе эксэй: мон но, маи мынам вань, со ваньмыз тынад».5Нош ик ыстэм муртъёс лыктыса шуизы: «Тазьы шуэ Венадад: Мон тыныд тазьы вераны ыстӥ: ”Азвесьтэ, зарнидэ, кышноостэ, пиостэ мыным сёт”;6соин ик ӵуказе, та дыре, тон доры ляльчиосме ысто тынэсьтыд коркадэ мед учкозы-чаклалозы, тон дорын ужась-тыршисьёслэсь но коркаоссэс, тынад синмыдлы мар дуно, ваньзэ сое киязы кутыса мед нуозы».
7Израильлэн эксэез музъем вылысь вань тӧроосты дораз люкаса шуиз: «Чаклалэ, учкелэ, со урод уж лэсьтыны малпа; куке со мон доры кышноосме, пиосме, азвесьме, зарниме курыны лэзиз, мон солы ӧй пумитъяськы».8Соку вань тӧроос, вань калык шуизы: «Эн кылзӥськы, соглаш эн луы».9Венададлэн ыстэм муртъёсызлы шуиз: «Кузёелы эксэйлы вералэ – ваньзэ, нырысь полаз мае курыны ыстылӥд ляльчиед доры, быдэстыны мон дась, нош тазэ быдэстыны уг быгатӥськы». Ыстэм муртъёсыз ответ нуыса кошкизы.10Венадад со доры тазьы вераны ыстӥз: «Инмаръёс мыным сое но сое мед лэсьтозы, эшшо тужгес но мед лэсьтозы, мон бӧрсьы мынӥсьёслэн ваньзылэн кырымазы кутыны Самария музъемлэн сюез тырмиз ке».11Израильлэн эксэез ответ сётыса шуиз: «Шуэлэ: куссэ еэн думись езэ пертчись кадь медаз ушъяськы».12Эксэйёсын ӵош балаганъёсын вина юыса пукись Венадад та кылэз кылӥз но ляльчиосызлы шуиз: «Городэз котыртэ». Соос городэз котыртӥзы.
13Тани, одӥг пророк Израильлэн Ахав эксэез доры лыктыса шуиз: «Тазьы шуэ Кузё-Инмар: ”Адӟиськод-а быдэссэ та адями уллёез? Туннэ Мон сое тынад киулад сёто, тон мед тодод: Мон – Кузё-Инмар”».14Ахав шуиз: «Кин пыр?» Со шуиз: «Тазьы шуэ Кузё-Инмар: улосвылъёсын кивалтӥсьёслэн медооссы пыр». Соку [Ахав] шуиз: «Кин ожмаськыны кутскоз?» Со шуиз: «Тон».15[Ахав] улосвылъёсын кивалтӥсьёслэсь медооссэс лыдъяз но тодӥз, кык сю куамын кык шуыса; собере вань калыкез, вань израиль пиосты лыдъяз – сизьым сюрс.16Нуназе шорын соос оже султӥзы, нош Венадад балаганъёсаз солы юрттӥськись куамын кык эксэйёсын ӵош кудӟытозяз юиз.17Нырысь ик оже потӥзы улосвылъёсын кивалтӥсьёслэн медооссы. Венадад чакласькисьёссэ эскерыны ыстӥз, соос солы ивор вуттӥзы: Самарияысь адямиос потӥзы.18Со шуиз: «Тупаса улон курыны потӥллям ке, соосты улэпкын кутэ, ожмаськыны потӥллям ке, озьы ик улэпкын кутэ».19Улосвылъёсын кивалтӥсьёслэн медооссы городысь потӥзы, соос бӧрсьы – армия.20Котькудӥз аслэсьтыз тушмонзэ погыртӥз; соку Сирияысь ожгарчиос бызьыса пегӟыны кутскизы, нош израиль ожгарчиос соос сьӧры уйиськыса мынӥзы. Нош Сириялэн Венадад эксэез вал вылын, борӟемен мынӥсьёсын ӵош пегӟиз.21Израильлэн эксэез потӥз но валъёсты, ожмаськон уробоосты киултӥз, Сириялэн ожгарчиосызлы бадӟым шуккет лэсьтӥз.
22Пророк Израильлэн эксэез доры лыктыса шуиз: «Мын, юнматскы, тод но чакласькы, мар тыныд кароно, уго, ар ортчыса, Сириялэн эксэез нош ик тыныд пумит ожен лыктоз».23Сирия эксэйлэн медоосыз солы шуизы: «Соослэн Инмарзы луэ гурезьёслэн Инмарзы, [нёжалъёслэн Инмарзы ӧвӧл], соин ик соос асьмеды вормизы; асьмеос соосын ӵошкыт интыысен ожмаськимы ке, зэм ик, соосты вормомы.24Озьыен, тани мар лэсьты: ваньзэс эксэйёсты интыысьтызы палэнты но соос интые улосвылъёсын кивалтӥсьёсты пукты.25Кӧня ожгарчиед кулӥз-быриз, соос интые сомында ик выльёссэ люка; валъёсты но кӧня вал азьвыл валэд, ожмаськон уробоосты но кӧня вал ожмаськон уробоосыд; ӵошкыт интыысен соосын ожмаськыны кутском, соку, зэм ик, соосты вормомы». Соослэсь верамзэс санэ понӥз, лэсьтӥз озьы, кызьы веразы.
26Ар ортчыса, Венадад Сирияысь ожгарчиосты люказ но израиль ожгарчиосын ожмаськыны Афек доры потӥз.27Израиль пиос но люкамын вал, сиён-юон басьтыса, соослэн пумитазы мынӥзы. Израиль пиос соослэн азязы, кык пичиесь кеч уллёос выллем, люкрак султӥзы, Сирияысь ожгарчиос быдэс музъемез басьтӥзы.28Инмарлэн адямиез лыктыса Израиль эксэйлы шуиз: «Тазьы шуэ Кузё-Инмар: сирия калык Кузё-Инмарез гурезьёслэн Инмарзы шуэ, нёжалъёслэн Инмарзы уг шуы бере, вань та бадӟым адями уллёез тон кие сёто, тӥ мед тододы, Мон – Кузё-Инмар шуыса».
29Огзылы огзы ваче пумит султыса, соос сизьым нунал сылӥзы. Сизьыметӥ нуналаз ожмаськыны кутскизы но израиль пиос одӥг нунал куспын Сириялэсь сю сюрс пыдын ожмаськись ожгарчиоссэ погыртӥзы.30Кылемез бызьыса Афек каре пегӟизы; отысен кылемез кызь сизьым сюрс ожгарчиос вылэ борддор усиз. Нош Венадад городэ кошкиз, корка пушкысь одӥгысьтыз бӧлет сьӧрысь мукет бӧлет сьӧры бызьылыса ветлӥз.31Медоосыз солы шуизы: «Ми кылӥмы, Израиль юртлэн эксэйёсыз гажась-жалясесь шуыса; лэзь милемыз, чурыт бышкись дӥсь дӥсяса, йыр котырамы гозы думыса, Израиль эксэй доры мыныны; оло нош тынэсьтыд лулдэ уз быдты».32Кусъёссэс бышкись чурыт дӥськутэн думизы, йыр котыразы гозы думизы но Израильлэн эксэез доры лыктыса шуизы: «Венадад ляльчиед шуэ: ”Жаля мынэсьтым улонме”». Соиз солы шуиз: «Со улэп на шат? Со мынам братэ».33Та адямиос тае умой тодмет луэ шуыса малпазы но солэн ымысьтыз потэм кылэз ӝегатскытэк санэ поныса шуизы: «Тынад братэд Венадад». Со шуиз: «Мынэлэ, сое татчы вае». Венадад со доры потӥз, сое со ас вӧзаз ожмаськон уробояз пуктӥз.34Венадад солы шуиз: «Тынад атаедлэсь городъёссэ, кудъёссэ мынам атае басьтӥз, мон тыныд берыкто, кызьы мынам атаелэн падвожъёсыз*а Самарияын вал, тынад но Дамаскын падвожъёсыд луыны быгатозы». Ахав шуиз: «Огкыл (договор) гожтэм бере мон тонэ кошкыны лэзё». Огкыл гожтэмзы бере сое кошкыны лэзиз.
35Соку пророк пиос пӧлысь одӥгез адями мукетызлы Кузё-Инмарлэн верам кылызъя шуиз: «Жуг монэ». Нош та адями со адямиез жугыны соглаш ӧз луы.36Солы шуиз: «Кузё-Инмарлэсь верам кылзэ санэ понымтэед понна, мон дорысь кошкыкуд, тонэ лев кесялоз». Со дорысь кошкыкуз, солэн пумитаз лев потӥз но сое кесяз.37Со мукетсэ адямиез шедьтӥз, солы шуиз: «Жуг монэ». Та адями сое сокем зол жугиз, – яраё кариз.38Пророк азьлань кошкиз, сюрес вылысен эксэен ваче пумит луиз, соку со ымнырзэ шобыртӥз.39Эксэй со вӧзтӥ ортчыку, со эксэйлы кесяськыса шуиз: «Ляльчиед ожмаськонэ ветлӥз, но тани, одӥг адями, палэнэ кожыса, мон доры адямиез вайыса шуиз: ”Чакласа возь та адямиез; со ӧз ни ке луы, соку тынад лулыд солэн лулыз интыын луоз, яке талант азвесьтэ мертаса сётоно луод”.40Тынад ляльчиед со но та ужъёсын вырыны кутскем бере со ышиз». Израиль эксэй солы шуиз: «Таӵе тыныд приговор, тон ачид соглаш луид».41Со соку ик син вылысьтыз шобретсэ басьтӥз но, эксэй сое тодмаз, со пророкъёс пӧлысь шуыса.42Солы шуиз: «Тазьы шуэ Кузё-Инмар: Мынэсьтым бырон киулэ сётыны сӥзем муртме киысьтыд лэземед понна тынад лулыд солэн лулыз интыын луоз; тынад калыкед солэн калыкез интыын луоз».43Израильлэн эксэез дораз куалектыса, кӧтӝожен кошкиз, Самарияе вуиз.
*а 20:34 падвож – гурт яке город шорысь площадь, вузкарон, юмшан, кенешъёс ортчытъян инты
Глава 20