Выбрать язык
Книги Ветхого Завета
Книги Нового Завета
с русским текстом1-тӥ книга
1Таос но Давид доры Секелаге ветлӥзы Кислэн Саул пиезлэсь ватӥськыса улон дыръяз, соос кышкасьтэмъёс пӧлысь вал, ожмаськонъёс дыръя юрттӥськисьёс.2Пукыӵен ыбылӥськисьёс, бурыныз но паллянэныз киынызы из зӥръясьёс, – Вениамин выжыысь, Сауллэн агай-вынъёсыз пӧлысь:3вылӥез Ахиезер, со бӧрсьы Иоас, Гиваысь Шемаялэн пиосыз; Иезиел но Фелет Азмавефлэн пиосыз; Бераха но Анафофысь Иегу;4Гаваон карысь Ишмаия, куамын пӧлысь кышкасьтэмез, куамын муртэн кивалтӥсь йыр; Иеремия, Иахазиил, Иоханан но Гедераысь Иозавад;5Елузай, Иеримоф, Веалия, Шемария, Хариф карысь Сафатия.6Елкана, Ишшияху, Азариил, Иоезер но Иошавам Корей пиос;7Иоела но Зевадия – Гедор карысь Иерохамлэн пиосыз.
8Гад пиос пӧлысь Давид доры, луоё кырысь юнматэм каре, выжизы кышкасьтэм, ожмаськыны быгатӥсь муртъёс, шибодыен, щитэн ожмаськисьёс; ымныръёссы левлэн ымнырызлы укша, соос гурезьын улӥсь кыркечъёс кадь шаплыесь.9Кузёйырзы вал Езер, чинэзъя кыкетӥез вал Овадия, куинетӥез – Елиав,10ньылетӥез – Мишманна, витетӥез – Иеремия,11куатетӥез – Афай, сизьыметӥез – Елиел,12тямысэтӥез – Иоханан, укмысэтӥез – Елзавад,13дасэтӥез – Иеремия, дас одӥгетӥез – Махбанай.14Соос Гад выжыысь пиос, ожгарчиосын кивалтӥсь йыръёс вал: пичиез сю ожгарчиосын кивалтӥз, бадӟымез – сюрс ожгарчиосын.15Соос Иордан вамен нырысетӥ толэзе выжизы, ву ӧрысьтыз потыса бызён вакытэ, нёжаллэн шундыӝужан но, шундыпуксён палаз но улӥсьёсты уллязы.
16Давидлэн юнматэм караз Вениамин но Иуда выжыосысь пиос лыктӥзы.17Давид соослэн пумитазы потыса шуиз: «Мон доры тӥ ӟеч мылкыдын, мыным юрттӥськон вылысь лыктӥды ке, мынам киы чылкыт ке, соку мынам сюлмы тӥледын одӥг медло; нош кескич амалэн монэ тушмонъёсы киулэ сётыны лыктӥды ке, атайёсмылэн Инмарзы мед адӟоз но Ачиз судить мед кароз».18Куамын муртлэсь йырзэ, дух Амасаез ӟыгыртӥз, соку Амасай шуиз:
«Каньыллык тыныд, Давид,
Иессейлэн пиез;
каньыллык тыныд,
тынад юрттӥсьёсыдлы но;
уго Инмаред тыныд юрттэ».
Соку Давид соосты бордаз кутӥз но ожгарчиосызлы кивалтӥсь йыре пуктӥз.
19Манассия выжыысь но куд-огез Давид доры выжизы, куке со филистим пиосын ӵош Сауллы пумит ожмаськыны мынэ вал, но соослы ӧз юрттӥськы, малы ке шуоно филистим пиослэн кивалтӥсь йыръёссы куспазы вераськизы но, сое берен келякузы, асьсэ куспын шуизы: «Асьмелы куректон-кайгу возьматон понна со аслаз кузёез Саул доры выжоз».20Секелаге берытскыкуз, со доры Манассия выжыысь выжизы: Аднах, Иозавад, Иедиаел, Михаил, Иозавад, Елигу но Цилльфай, Манассия выжыысь сюрс ожгарчиосын кивалтӥсь йыръёс.21Соос Давидлы юрттӥзы тушмон уллёен ожмаськыны, уго соос ваньзы кышканэз тодӥсьтэм, ожгарчиосын кивалтӥсь йыръёс вал.22Тазьы нуналлы быдэ Давид доры юрттӥськисьёс вуылӥзы но, солэн армиез сокем бадӟым луиз ини, Инмарлэн армиез кадь.
23Тани армиысьтыз кивалтӥсь йыръёслэн лыдзы, кинъёс Давид доры Хевронэ лыктӥзы, Кузё-Инмарлэн верам кылызъя, Сауллэсь эксэйлыксэ солы сётон понна:24Иудалэн щит но шибоды нуллӥсь пиосыз, ожмаськыны дась луись пиосыз куать сюрс тямыс сю кузя;25Симеонлэн пиосыз, кышкасьтэм ожгарчиос, сизьым сюрс сю кузя ожгарчиос пӧлын вал.26Левий пиос ньыль сюрс куать сю кузя;27Аарон выжыысь Иоддай кивалтӥсь йыр, соин ӵош куинь сюрс сизьым сю мурт;28Садок, кышкасьтэм егит пи, солэн выжыез, кызь кык мурт кивалтӥсь йыръёс;29Вениаминлэн пиосыз, Сауллэн агай-вынъёсыз, куинь сюрс кузя, но соос пӧлысь тросэз Саул выжы бордын возиськизы на;30Ефрем пиос пӧлысь кызь сюрс тямыс сю кышкасьтэм ожгарчиос, асьсэ выжы пушкын нимо-дано адямиос.31Манассиялэн ӝыныё выжыез пушкысь дас тямыс сюрс мурт, соос Давидэз эксэе пуктон понна нимын-нимын ӧтемын вал.32Иссахар пиос пӧлысь лыктӥзы визьмо муртъёс, соос тодо вал, ку но мар лэсьтыны кулэ Израиль, – соос ваньзы, кык сю мурт, кивалтӥсь йыръёс вал, соослэн вань агай-вынъёссы бӧрсязы мынӥзы, верам кылзэс санэ поныса;33Завулон выжыысь ожмаськыны дась, огмылкыдын улӥсь, пӧртэм ожмаськон арбериосын, стройын сылӥсь муртсы витьтон сюрс вал;34Неффалим выжыысь сюрс азьвалтӥсьёс лыктӥзы, соосын ӵош куамын сизьым сюрс мурт щитъёсын, шибодыосын;35Дан выжыысь кызь тямыс сюрс куать сю ожмаськыны дась мурт лыктӥз;36Асир выжыысь ожмаськыны дась луись ньыльдон сюрс мурт лыктӥз;37Иордан тупалась Рувим, Гад выжыосысь, Манассиялэн ӝыныё выжыысьтыз пӧртэм ожмаськон тӥрлыкъёсын сю кызь сюрс мурт лыктӥзы.
38Вань та ожгарчиос, стройын сылӥсьёс, вань сюлэмзэс поныса, Хевронэ лыктӥзы Давидэз быдэс Израильлы эксэе пуктон понна. Озьы ик мукет израиль адямиос но огкылысь вал Давидэз эксэе пуктон пумысен.39Отын, Давид дорын, куинь нунал ӵоже улӥзы, сиизы, юизы, уго агай-вынъёссы ваньзэ тае соослы дасязы;40соослы матысьёс но, Иссахар, Завулон, Неффалим выжыысь муртъёс гинэ но вань сиён-юонэз ишакъёссы, верблюдъёссы, мулъёссы, ошъёссы вылын вайылӥзы: пызь, смоква но изюм, вина, вӧй, векчизэ но, тазазэ но пудоосты тросэн вайизы, уго Израиле шумпотон вуиз.
Глава 12