Выбрать язык
Книги Ветхого Завета
Книги Нового Завета
с русским текстом1-тӥ книга
1Ас корказ улыкуз, Давид Нафан пророклы шуиз: «Тани, мон кедырпулэсь пуктэм коркан улӥсько, нош Кузё-Инмарлэн сӥзён-косонэн ковчегэз балаган пушкын».2Соку Нафан Давидлы шуиз: «Тынад сюлмад мар вань, лэсьты, уго Инмар тонэныд».
3Со уе ик Нафанлы Инмар дорысь тазьы верамын вал:4«Мын, Мынам Давид ляльчиелы вера: ”Тазьы шуэ Кузё-Инмар: Мыным улыны корка тон уд пукты,5уго израиль пиосты Египетысь поттэм дырысеным та нуналозь Мон коркан ӧй улы, скинияысь скинияе, улон юртысен улон юртозь ветлӥ.6Вань израиль калыкен кытӥ гинэ Мон ӧй ветлы, Аслэсьтым калыкме возьманы косэм израиль судьяослы одӥг кыл ке но верай-а: ”Малы тӥ Мыным кедырпулэсь корка уд пуктӥське?”7Нош али Давид ляльчиелы тазьы шу: ”Тазьы шуэ Саваоф Кузё-Инмар: Мон тонэ ыж уллё пушкысь басьтӥ, тон Мынам израиль калыкелы азьвалтӥсь мед луод шуыса;8кытчы гинэ тон ӧд ветлы, котькытын но тонэн ӵош вал, тынад азяд вань тушмонъёстэ быдтӥ, музъем вылысь быдӟым адямиослэсь кадь нимдэ быдӟым кари;9Аслам израиль калыкелы улон инты дасяй, пырак ӵожелы отчы выжызэ лэзьытӥ, ас интыяз со каньылэн улоз, азьланяз кышкатыса уз ни возе, сьӧлыклэсь кышкасьтэмъёс азьло кадь сое ӝикатыса уз ни возе,10кызьы израиль калыкелы судьяос пуктэм дыръёсы ӝикатыса возизы; тынэсьтыд тушмонъёстэ зӥбломытӥ, тыныд ивортӥсько: Кузё-Инмар тынэсьтыд эксэй выжыдэ юнматоз.
11Улон нуналъёсыд пумаз вуизы ке, тон атайёсыд доры кошкод, тон бере тынад кускысьтыд потэм кидыстэ эксэй каро – со тынад пиосыд пӧлысь луоз, солэсь эксэйлыксэ юнмато.12Со Мыным корка пуктоз, солэсь престолзэ пумтэм вапумъёслы юнмато.13Мон солы атай луо, со Мыным пи луоз, со бордысь гажан-жалянме уг басьты, кызьы басьтӥ тынэсьтыд азьвыл луэмлэсь.14Сое мон Ас коркам, Аслам эксэйлыкам пумтэм вапумъёслы пукто, солэн престолэз пумтэм вапумъёс ӵоже юн сылоз”».15Ваньзэ та кылъёсты, вань адӟемзэ Нафан Давидлы шонер вераз.
16Давид эксэй лыктӥз но Кузё-Инмарлэн азяз султыса шуиз: «Инмаре Кузё-Инмаре, кин мон сыӵе, мар со мынам выжые, сокем монэ вылэ ӝутӥд?17Инмаре, Тынад син азяд со но пичи потӥз на; Аслад ляльчиедлэн выжыезлэсь азьпалзэ но ивортӥд, мон шоры быдӟым мурт шоры кадь учкиськод, Инмаре Кузё-Инмаре!18Ляльчидэ вылӥ карон понна Тон азьын Давид мар ватсаны быгатоз на? Тон ляльчидэ тодӥськод!19Кузё-Инмаре! Аслад ляльчиедлы Ас сюлэмъяд Тон вань та быдӟымлыкез лэсьтӥськод котькыӵе но быдӟымлыкез возьматон понна.20Кузё-Инмаре! Асьмелэн пельынымы мае гинэ ми ӧм кылэ, тодӥмы: Тыныд укшасез ӧвӧл, Тон сяна, мукет Инмар ӧвӧл.21Тынад Израиль калыкедлы укшасез кин вань? Со музъем вылын одӥг гинэ калык, кин доры Инмар ветлӥз сое мозмытыны, Аслыз калык карыны, быдӟым но кышкыт ужъёс лэсьтыса, Египет киулысь мозмытэм калыкедлэн азьысьтыз мукет калыкъёсты улляса, Аслэсьтыз нимзэ дано кариз.22Израиль калыктэ пумтэм вапумъёслы Аслыд калык карид; Тон, Кузё-Инмаре, солы Инмар луид.23Нош табере, Кузё-Инмаре, ляльчиед сярысь, солэн выжыез сярысь верам кылдэ пумтэм вапумъёс ӵожелы юнматы, лэсьты озьы, кызьы верад.24Тынад нимыд мед улоз, данэ мед потоз пумтэм вапумъёс ӵоже, тазьы мед вералозы: ”Саваоф Кузё-Инмар, Израильлэн Инмарез – Израильлы Инмар, Давид ляльчиедлэн выжыез Тынад азяд юн мед луоз”.
25Уго Тон, Инмаре, Ас ляльчиедлы усьтӥд, со бордысь эксэй выжы поттод шуыса, соин ик Тынад ляльчиед Тон азьын вӧсяськыны дӥсьтӥз.26Али но Тон, Кузё-Инмаре, Инмар, Тон ляльчиед сярысь таӵе ӟечлык верад.27Ляльчиедлэсь выжызэ бакель карыны кутскы ук, пумтэм вапумъёс ӵоже со Тынад азяд мед луоз шуыса. Уго Тон, Кузё-Инмаре, бакель карид ке, со пумтэм вапумъёслы бакель каремын луоз».
Глава 17