Выбрать язык
Книги Ветхого Завета
Книги Нового Завета
с русским текстом1-тӥ книга
1Инмарлэсь ковчегзэ вайизы но Давидлэн юри та понна лэсьтэм скинияезлэн шораз пуктӥзы, соку Инмарлы тылын сутӥськись курбонъёс, тупаса улонлы сӥзем курбонъёс сётӥзы.
2Тылын сутӥськись курбонъёс, тупаса улонлы сӥзем курбонъёс сётэм бераз Кузё-Инмарлэн нимыныз Давид калыкез бакель кариз.3Вань израиль калыклы, пиосмуртъёслы но, кышномуртъёслы но, быдэн колды нянь, сӥль люкет но быдэн кружка вина сётъяз.4Левитъёс пӧлысь куд-огзэ Кузё-Инмарлэн ковчегез азе служить карыны пуктӥз, соос Израильлэсь Инмарзэ Кузё-Инмарез мед ушъялозы, мед данъялозы, Солы тау мед карозы шуыса:5Асафез кивалтӥсь йыр карыса пуктӥз, со бере чинзыя кыкетӥ радын мыно Захария, Иеиел, Шемирамоф, Иехиил, Маттафия, Елиав, Ванея, Овед-Едом но Иеиел, соос крезьёсын, цитраосын шудо, Асафез кимвалэн шудыны пуктӥзы,6нош Ванея но Озиил священникъёсты, Инмарлэн сӥзён-косонэн ковчегез азьын дугдылытэк гумы мед пеллялозы шуыса.
7Та нуналэ нырысьсэ Давид Асафлы но солэн агай-вынъёсызлы Кузё-Инмарез данъян псалом сётӥз:
8«Кузё-Инмарез данъялэ, Солэн нимызлы вазиське, калыкъёс пӧлын Солэн ужъёсыз сярысь ивортэ.9Солы ушъян гуръёс кырӟалэ, кырӟалэ Солы; Солэн вань паймымон ужъёсыз сярысь ивортэ.10Солэн дун-чылкыт нимыныз ушъяське; Кузё-Инмарез утчасьёслэн сюлэмзы мед шумпотоз.11Утчалэ Кузё-Инмарез, Солэсь кужымзэ, ялан Солэсь ымнырзэ утчалэ.12Тодады вае Солэсь лэсьтэм паймымон ужъёссэ, паймымон тодметъёссэ, ымысьтыз потэм курон-косонъёссэ.13Тӥ, Израильлэн кидысэз, Солэн ляльчиосыз, Иаковлэн пиосыз, Солэн быръемъёсыз.14Со Кузё-Инмар, асьмелэн Инмармы, быдэс дунне вылэ Солэн курон-косонъёсыз вӧлмо.15Солэсь сӥзёнзэ пырак ӵоже тодады возе, сюрс выжыослы Со сӥзён-косонзэ утьыны косӥз,16сое Со Авраамлы сӥзиз, Исаак азьын кыл сётӥз,17сое Со Иаковлы закон карыса пуктӥз, Израильлы пумтэм вапумъёс ӵожелы сӥзён кариз.18”Тыныд Ханаан музъемез сёто, со тӥледлы люкет музъем луоз”, – шуиз.19Соку соос лыдзыя ӧжыт на вал, туж ӧжыт, соос отын лыктэм калык вал.20Одӥг калык дорысь мукет калык доры выжылӥзы, одӥг эксэйлыкысь мукет выжыос доры вуылӥзы.21Кузё-Инмар нокинлы но соосты ултӥяны ӧз лэзьы, соос понна эксэйёсты куаретылӥз:22”Эн йӧтӥське Мынам вӧйын зырӟемъёсы борды, пророкъёсылы уродзэ эн лэсьты”.23Быдэс музъем выл, Кузё-Инмарлы кырӟалэ, нуналлы быдэ Солэн утёнэз сярысь ӟеч ивор вералэ!24Язычникъёс пӧлын Солэн данэз сярысь ивортэ, вань калыкъёс пӧлын Солэсь паймымон ужъёссэ тодытэ.25Кузё-Инмар – быдӟым, туж ушъямон, вань инмаръёслэсь Со кышкамон.26Уго язычникъёслэн инмаръёссы номырлы ярантэмъёс, нош Кузё-Инмар инъёсты кылдытӥз.27Солэн азьпалаз данлык но быдӟымлык, Солэн [святой] интыяз кужымлык но шумпотон уло.28Калыкъёслэн выжыоссы, Кузё-Инмарлы тау каре, Кузё-Инмарез данъялэ.29Кузё-Инмарез, Солэсь нимзэ данъялэ; курбон басьтыса, Солэн ымныр азяз мынэ, сӥё-дано вӧсяськон интыяз пырыса, Кузё-Инмарлы йыбырттэ.30Быдэс музъем, Со азьын куалекъя, уго Со быдэс дуннеез кылдытӥз, со юн сылэ, уз вырӟылы.31Инъёс мед шулдыръяськозы, музъем мед шумпотоз; калыкъёс пӧлын мед шуозы: ”Кузё-Инмар – эксэй!”32Зарезь но мар со пушкын вань, мед куашетоз, бусы но мар отын будэ, мед шумпотозы.33Кузё-Инмарлэн азяз мед шумпотозы-шулдыръяськозы тыпы сурдысь писпуос, уго Со музъемез судить кароз.34Кузё-Инмарез данъялэ, Со ӟеч, Солэн гажан-жалянэз пумтэм вапумъёс улэ,35шуэлэ: ”Инмаре, Утисьмы милям, уть милемыз! Тынэсьтыд дун-чылкыт нимдэ данъян понна, Тынад данэныд ушъяськон понна, калыкъёс пӧлысь люка, мозмыты милемыз!”36Дано мед луоз Кузё-Инмар, Израильлэн Инмарез, вапумъёсысь вапумъёсы!» Вань калык шуиз: «Аминь! Аллилуия!»
37Давид отчы, Кузё-Инмарлэн сӥзёнэныз ковчегез азе, Асафез но солэсь агай-вынъёссэ кельтӥз, соос ковчег азьын ялан, нуналлы быдэ, ужаса-тыршыса мед улозы шуыса,38озьы ик, Овед-Едомез но солэсь агай-вынъёссэ, куатьтон тямыс муртэ; Идифунлэсь Овед-Едом пизэ но Хосаез капка возьмасе пуктӥз,39нош Садок священникез но священник агай-вынъёсты – Гаваонысь гурезь йылысь Кузё-Инмарлэн коркаез доры40дугдылытэк, ӵукна но, ӝыт но тылын сутыса курбон сётон вылын Кузё-Инмарлы тылын сутӥськись курбонъёс сётон понна, Кузё-Инмарлэн законаз, кудзэ со Израильлы сӥзьыса сётӥз, мар гожтэмын, сое быдэсъян понна.41Соосын огазе ик Еманэз, Идифунэз но мукет быръем муртъёсты, нимын-нимын вераса пуктэмын Кузё-Инмарез данъяса улон понна, уго Солэн гажан-жалянэз пумтэм вапумъёслы.42Соос бордын Еманэн Идифун гумыосын, кимвалъёсын, мукет пӧртэм шудон арбериосын Инмарез данъяса улӥзы; нош Идифунлэсь пиоссэ капкаос доры пуктылӥз.
43Вань калык, котькудӥз аслаз корказ мынӥз; Давид корказэ бакель карыны гуртаз бертӥз.
Глава 16