Выбрать язык
Книги Ветхого Завета
Книги Нового Завета
с русским текстом1-тӥ книга
1Шайтан Израиль вылэ урдскиз но Давидлэсь мылкыдзэ ӝутӥз израиль калыклэсь лыдзэ ӵотаны.2Давид Иоавлы но калык пӧлын кивалтӥсьёслы шуиз: «Мынэлэ, израиль калыкез лыдъялэ-ӵоталэ, Вирсавияысен кутскыса Дан музъемозь, лыдпуссэс мыным вуттэ, мон мед тодом соослэсь лыдпуссэс».3Иоав шуиз: «Кузё-Инмар аслэсьтыз калыксэ али кӧня вань, сое сю поллы мед йылэтоз. Кузёе, эксэй, ваньзы ик соос кузёелэн ляльчиосыз ӧвӧл-а? Малы бен тае кузёе куре? Тае Израилез янгыше уськытон понна-а?»4Нош эксэйлэн кылыз Иоавез вормиз. Иоав потӥз но быдэс Израилез ортчиз, собере Иерусалиме берытскиз.5Калыкез лыдъян-ӵотан списокез Иоав Давид кие сётӥз, ваньмыз израиль калык пӧлын одӥг миллион сю сюрс мечен ожмаськисьёс, нош иудейёслэн ньыль сю сизьымдон сюрс меч поттӥсьёссы вал.6Нош левитъёсты но Вениамин выжыез соос пушкы ӧз пырты, малы ке шуоно эксэй кыл Иоавлы синазькыль потӥз.
7Инмарлэн азяз та уж ярамон ӧй вал, Со Израилез погыртӥз.8Соку Давид Инмарлы шуиз: «Тазьы лэсьтыса, мон туж сьӧлыкай. Мынэсьтым, ас ляльчиедлэсь, янгышме простить кар, уго мон чик малпаськытэк та ужез лэсьтӥ».9Давидлэн муртэзлы, азьпалзэ адӟись Гадлы, Кузё-Инмар тазьы вераз, тазьы шуиз:10«Мын, Давидлы тазьы шу: ”Тазьы шуэ Кузё-Инмар: куинь пумо вӧсь карон Мон тыныд ӵектӥсько, соос пӧлысь одӥгзэ аслыд бырйы, – сое Мон тон вылэ ысто”».
11Гад Давид доры лыктыса шуиз: «Тазьы шуэ Кузё-Инмар: ”Бырйы аслыд:12яке куинь ар сютэм улон, яке куинь толэзь ӵоже тонэ тушмонъёсыд ӝикатса возёзы, тушмонъёсыдлэн мечсы тон доры вуоз; яке куинь нунал Кузё-Инмарлэн мечез но музъем вылын сьӧдчер, Кузё-Инмарлэн Кылчинэз Израильлэн вань люкетъёсаз виылоз”. Озьыен, малпаськы, монэ кылын Ыстӥсьлы мар мон вераны кулэ».13Соку Давид Гадлы шуиз: «Туж мыным секыт, но эсьма Кузё-Инмарлэн кияз мед сюром, уго Солэн туж бадӟым гажан-жалянэз, адямиослэн киулазы гинэ медам сюры вал».
14Соку Кузё-Инмар Израиль вылэ сьӧдчер лэзиз но, сизьымдон сюрс израиль калык кулӥз.15Инмар Кылчинэз Иерусалимез быдтыны ыстӥз. Со виылыны кутскем бере Кузё-Инмар татысь курадӟонэз адӟыса жаляз, Со виылӥсь Кылчинлы шуиз: «Тырмоз! Табере кидэ улэ лэзь». Кузё-Инмарлэн Кылчинэз со виын иевусей пилэн, Орналэн, итымезлэн вылӥяз сылӥз.16Давид синъёссэ вылэ ӝутӥз но инэн музъем вискын сылӥсь Кузё-Инмарлэсь Кылчинзэ адӟиз: Иерусалим вылэ урдэм, кияз кутэм мечен со сылэ; соку Давид но чурыт, бышкись дӥськутэн дӥсяськем тӧроосын ӵош ымныр вылаз уськытскиз.17Давид Инмарлы шуиз: «Мон ӧй косы-а калыкез лыдъяны? Мон сьӧлыкай, мон урод уж лэсьтӥ, нош та ыжъёс мар лэсьтӥзы? Инмаре Кузё-Инмаре! Тынад киыд мон вылын, атаелэн выжыез вылын мед луоз, Тынад калыкед вылын, сое быдтон вылысь медаз лу».18Соку Кузё-Инмарлэн Кылчинэз Гадэз Давидлы тазьы вераны косӥз: «Давид Иевусей пилэн Орналэн итымаз мед лыктоз но Кузё-Инмарлы курбон сётон мед пуктоз».
19Гад Кузё-Инмарлэн нимыныз вераськись мурт вал, Давид, Гадлэсь верамзэ санэ поныса, косэм интые мынӥз.20Орна берытскиз но Кылчинэз адӟиз, соку соин ӵош учырам ньыль пиосыз ватскизы. Орна соку чабейзэ кутса вал.21Давид Орна доры лыктӥз. Орна учкиз но, Давидэз адӟыса, итымысьтыз потӥз, Давидлы музъемозь ик йыбырттӥз.22Давид Орналы шуиз: «Итым музъемдэ сёт мыным, со вылэ мон Кузё-Инмарлы курбон сётон инты лэсьто; кӧня сылэ, сыӵе дунын сёт мыным сое, калыкез быдтон мед дугдоз».23Орна Давидлы шуиз: «Аслыд басьты; кузёе, эксэй, мед лэсьтоз, мар солы ярано; тани мон ошъёсме но тылын сутоно курбонлы сётӥсько, кутсаськон арбериосме пу карыны, чабейме нянь курбонлы сётӥсько; ваньзэ тае мон так сётӥсько».24Соку Давид эксэй Орналы шуиз: «Ӧвӧл озьы, зэмос дун тырыса, мынам тынэсьтыд басьтэм потэ, уго тынэсьтыд ваньбурдэ мон уг сёты ук Кузё-Инмарлы, дун тырытэк басьтэмез тылын сутӥськись курбонлы уг сёты ук».25Та инты понна Давид Орналы куать сю сӥкль зарни сётӥз.26Со интые Давид Кузё-Инмарлы курбон сётон инты лэсьтӥз но тылын сутӥськись, тупаса улонлы сӥзем курбонъёс сётӥз; Кузё-Инмарлы вазиськиз но, Со кылӥз, тылын сутӥськись курбон сётон ӝӧк вылэ инмысь тыл лэзиз.27Кузё-Инмар Кылчинлы шуиз: «Мечтэ пуртэсаз пон».28Со виын Давид адӟиз, Иевусей пилэн Орналэн кутсаськон итымаз Кузё-Инмар сое кылӥз шуыса, соку отысен со курбон сётӥз.
29Нош Моисейлэн луоё кырын лэсьтэм Кузё-Инмарлэн скинияез, тылын сутӥськись курбон сётон ӝӧк со виын Гавонысь гурезь йылын вал.30Отчы Инмарез утчаны мыныны Давид ӧз быгаты, малы ке шуоно Кузё-Инмарлэн Кылчинэзлэн мечезлэсь со туж кышказ.
Глава 21