Выбрать язык
Книги Ветхого Завета
Книги Нового Завета
с русским текстом1-тӥ книга
1Давид пересьмем бераз, улыса жадем бераз, Израильлы эксэе Соломон пизэ пуктӥз.2Израильысь кивалтӥсьёсты, священникъёсты, левитъёсты люказ но3куамын ареслэсь ортчем левитъёсты лыдъязы, соослэн лыдзы, одӥгзэ но кельтытэк лыдъяса, куамын тямыс сюрс вал.4Кузё-Инмарлэн корказ ужаны соос пӧлысь кызь ньыль сюрс мурт быръемын вал, подъясьёс но судьяос куать сюрс мурт,5ньыль сюрс мурт капка возьмасьёс, ньыль сюрс мурт Кузё-Инмарлэсь нимзэ данъяны солэн лэсьтэм крезьгур шудонъёсыныз шудӥсьёс.
6Давид Левийлэн Гирсон, Кааф, Мерари пиосызлы – соослэн выжызылы – служба нуыны черод тупатӥз.7Гирсон пиос пӧлысь Лаеданэз, Шимеез бырйиз.8Лаеданлэн куинь пиосыз вал: Иехиил, Зефам но Иоиль. Иехиил кивалтӥсь йыр луиз.9Шимейлэн куинь пиосыз вал: Шиломиф, Хазиил но Гаран; соос Лаедан выжылы кивалтӥсь йыръёс луизы.10Шимейлэн эшшо ньыль пиосыз вал на: Иахаф, Зӥза, Иеуш но Берия.11Иахаф кивалтӥсь йырзы вал, Зӥза со бӧрсьы мынӥз. Иеушлэн но Бериялэн трос нылпиоссы ӧй вал, соин ик соос атайзылэн юртаз одӥг радын-ӵотын вал.12Каафлэн ньыль пиосыз вал: Амрам, Ицгар, Хеврон но Озиил.
13Амрамлэн пиосыз: Аарон но Моисей. Аарон Святойлэсь но Святое служить карыны пуктон понна, со ачиз, пиосыз но, Кузё-Инмарлэн азяз ческыт зын ӵындытон понна, Солы ужан-тырон понна, пумтэм вапумъёс ӵожелы Солэн нимыныз бакель карон понна висъямын вал.14Нош Моисей, Инмар адями, солэн пиосыз но Левий выжые гожтэмын.15Моисейлэн пиосыз: Гирсон но Елиезер.16Гирсонлэн пиосыз: нырысетӥез Шевуил.17Елиезерлэн пиосыз: нырысетӥез Рехавия, Елиезерлэн мукет пиосыз ӧй вал, нош Рехавиялэн туж трос пиосыз вал.18Ицгарлэн пиосыз: нырысетӥез Шеломиф.19Хевронлэн пиосыз: нырысетӥез Иерия, кыкетӥез Амария, куинетӥез Иахазиил, ньылетӥез Иекамам.20Озииллэн пиосыз: нырысетӥез Миха, кыкетӥез Ишшия.
21Мерарилэн пиосыз: Махли но Муши, Махлилэн пиосыз: Елеазар но Кис.22Елеазар кулӥз, но солэн пиосыз ӧй вал, нылъёсыз гинэ вал; соосты Кислэн пиосыз, соослэн братъёссы, кышнолы басьтӥзы.23Мушилэн пиосыз: Махли, Едер но Иремоф куиньназы.
24Тани Левийлэн пиосыз, атайёссылэн выжыоссыя, семьяослэн кузёоссы, ваньзэс, одӥгтэм, нимын-нимын лыдъяса, – соос Кузё-Инмарлэн корказ, кызь арескысен кутскыса бадӟым арескозь, службаос ортчытъязы.25Уго Давид шуиз: «Израильлэн Инмарез Кузё-Инмар Ас калыкезлы каньыллык сётӥз но сое Иерусалиме пумтэм вапумъёслы улыны интыяз,26вӧсяськон скинияез но отын служить карон понна пӧртэм арбериосты левитъёслы нуллыны кулэ ӧй ни вал».
27Соин ик, Давидлэн берпум косонъёсызъя, левитъёс лыдъямын кызь аресысен кутскыса бадӟым арескозь,28соос Аарон пиос бордын мед луозы Кузё-Инмарлэн корказ служить карон понна, азбаръёсаз но, бӧльмыосаз но, быдэс вӧсяськон интыын чылкытлыкез утён понна, Кузё-Инмарлэн корказ пӧртэм службаосты ортчытъян понна,29курбон няньёсты чаклан понна, чабей пызез нянен курбон сётон понна, чырсатымтэ уднянез, пыжем сиёнэз, кебатэм сиёнэз чаклан понна, вань мертэтъёсты, весъёсты чакласа улон понна пуктэмын,30ӵукналы быдэ Кузё-Инмарез данъяны, ушъяны султытон понна, озьы ик ӝытъёсы но,31Кузё-Инмарлы тылын сутӥськись курбонъёс ӝутыку, субботаосы, выль толэзь потыку, праздникъёсы, кызьы соос сярысь гожтэмын, лыдзыя сомында Кузё-Инмар азьын ялан луыны кулэ вал,32мед утёзы сӥзён-косонэн скинияез, вӧсяськон интыез, Ааронлэсь пиоссэ, асьсэлэсь агай-вынъёссэс, Кузё-Инмарлэн корказ службаос ортчыку.
Глава 23