Выбрать язык
Книги Ветхого Завета
Книги Нового Завета
с русским текстом1-тӥ книга
1Кенеше люкаськем вань калыклы Давид шуиз: «Соломон, мынам пие, сое Инмар огназзэ бырйиз, егит но кужымтэм на, нош лэсьтоно уж туж бадӟым, уго со юрт адямилы уг, Инмарлы Кузё-Инмарлы пуктӥське.2Вань кужымме поныса, Инмарелы корка пуктыны зарни дасяй зарни арбериос лэсьтыны, азвесь – азвесь арбериос лэсьтыны, ыргон – ыргон арбериослы, корт – корт арбериослы, пу – пу арбериос лэсьтыны, оникс из, пуктӥськись изъёс, чебересь, пӧртэм буёло изъёс, пӧртэм дуно изъёс, трос мрамор;3Инмарелэсь корказэ яратэменым, мынам аслам зарни, азвесь ваньбуре вань, сое но Инмарелэн коркаезлы сётӥсько, святой корка пуктыны мар дасяй, со вӧзы ватсаса:4куинь сюрс талант зарни, Офирысь ваем зарни, сизьым сюрс талант чылкыт азвесь коркалэн борддоръёсаз лякылон понна,5вань зарни арбериос лэсьтонэ, азвесь арбериос лэсьтонэ, кибашлыослы киынызы пӧрмытоно арбериос лэсьтыны сётӥсько. Эшшо кин ке но табере мылкыд уз кары-а Кузё-Инмар понна салам-кузьым сётыны?
6Семьяослэн кузёоссы, Израиль выжыослэн тӧрооссы, сюрс ожгарчиосын, сю ожгарчиосын кивалтӥсьёс, эксэй юртын кивалтӥсьёс саламъёс-кузьымъёс сётъяны кутскизы.7Инмар корка пуктыны вить сюрс талант сётӥзы, дас сюрс драхма зарни, дас сюрс талант азвесь, дас тямыс сюрс талант ыргон, сю сюрс талант корт.8Кинъёслэн дуно изъёссы шедизы, соосты Кузё-Инмарлэн коркасьтыз ваньбур тырон шыкысэ сётӥзы, Герсон выжыысь Иехиил кие сётӥзы.9Соослэн тыршемзылы калык шумпотӥз, уго соос, вань сюлмысьтызы тыршыса, Кузё-Инмарлы сётъязы, озьы ик Давид эксэй но туж шумпотӥз.
10Кенеше вань люкаськем калык азьын Давид Кузё-Инмарез данъян кылъёс вераз, Давид шуиз: Тон, атаймылэн, Израильлэн Инмарез, Кузё-Инмар, данлыко, дауръёс кутсконысен, пумтэм дауръёс ӵоже.11Кузё-Инмаре, Тынад быдӟымлыкед, кужымед, данэд, вормонэд, чеберлыкед, – мар вань инмын но музъем вылын – ваньмыз Тынад; Кузё-Инмаре, Тынад эксэйлыкед, Тон ваньмызлэсь вылӥын, Тон ваньмызлы Кузё.12Тон бордысь пото узырлык но, данлык но, Тон ваньмызлы кузё луиськод, Тынад кияд кужым но быдӟымлык, Тон киын кужым, ваньзэ вылэ ӝутыны но юнматыны быгатӥськод.13Али, Инмармы, ми Тонэ, Тынэсьтыд быдӟымлыко нимдэ данъяськомы, ушъяськомы.14Уго, кин со мон, кин со мынам калыке, тазьы саламъёс-кузьымъёс сётыны быгатӥмы? Но ваньмыз Тынад сётэмед, Тынад киысьтыд басьтэмез Тыныд сётӥмы,15уго ми Тон азьын пыдйылчиос, лыктэм калык вань атайёсмы мактал ик, музъем вылын улон нуналъёсмы вужер кадесь гинэ, номыр но вошъяськытэк, йыг-йыг сылӥсез ӧвӧл.16Инмармы Кузё-Инмар! Вань та трослык, кудзэ ми Тыныд корка пуктыны дасямы, Тынад святой нимыдлы, со Тынад киысьтыд потэмын, ваньмыз со Тынад.17Инмаре, тодӥсько: Тон сюлэмез чакласькод-эскериськод, чылкыт сюлэмез яратӥськод; ваньзэ тае мон чылкыт сюлмыным кузьымлы-саламлы сётӥ, али адӟисько: Тынад татчы лыктэм калыкед шумпотыса Тыныд саламъёс-кузьымъёс сётъя.18Кузё-Инмаре, Авраамлэн, Исааклэн, Израильлэн – атайёсмылэн Инмарзы! Уть тае пумтэм вапумъёс ӵоже, Ас калыкедлэсь ӟеч сюлэм малпанъёссэ, соослэсь сюлэмъёссэс Ас палад берыкты.19Нош Соломонлы, мынам пиелы, чылкыт, шекланысьтэм сюлэм сёт, Тынэсьтыд курон-косонъёстэ, усьтӥськонъёстэ, пуктон-косонъёстэ быдэсъяса улыны мед быгатоз, ваньзэ тае кабыл басьтыса улыны но мынам дасяменым юрт пуктыны мед быгатоз».
20Кенеше люкаськем вань калыклы Давид шуиз: «Инмармес Кузё-Инмарез данъялэ». Кенеше вань люкаськем калык атайёссылэсь Инмарзэс Кузё-Инмарез данъяз но пыдесъяськыса Кузё-Инмарлы йыбырттӥз, эксэйлы но.21Та бере, мукетаз нуналэ Кузё-Инмарлы курбонъёс вайизы, Кузё-Инмарлы тылын сутӥськись курбонъёс сётӥзы, курбон сётыкузы, курбон-салам вина кисьтӥзы: сюрс ошпи, сюрс така, сюрс ыжпи курбонлы сётӥзы, быдэс Израиль понна трос мукет курбонъёс сётэмын вал.22Со нуналэ Кузё-Инмар азьын туж шумпотыса сиизы, юизы: мукетаз нуналэ Соломонэз, Давидлэсь пизэ, эксэе пуктӥзы, вылӥ кивалтӥсь карыны Кузё-Инмар азьын вӧйын зырӟизы, нош Садокез, вӧйын зырӟыса, священнике пуктӥзы.23Соку Соломон Кузё-Инмарлэн престолэз вылэ эксэй луыса атаез, Давид, интые пуксиз, азинлыкез вал, быдэс Израиль солы тэрытскыса улӥз.24Вань кивалтӥсьёс но кужмоос, озьы ик Давидлэн вань мукет пиосыз но Соломонлы тэрытскыса улыны кутскизы.25Кузё-Инмар Соломонэз быдэс Израильлэн син азяз вылэ ӝутӥз, эксэйлыклэсь данлыксэ солы кузьмаз, азьвыл Израильын со кадез одӥг эксэй но ӧй вал.
26Давид, Иессейлэн пиез, быдэс Израильлы эксэй вал.27Израильын со ньыльдон ар ӵоже эксэй луыса кивалтӥз: Хевронын сизьым ар ӵоже эксэй пуконын пукиз, Иерусалимын куамын куинь ар ӵоже эксэй пуконын пукиз.28Пересьмытозяз ӟечкын, узырлыкен, данлыкен тыр улӥз но кулӥз, солэн интыяз эксэе Соломон пиез пуксиз.
29Давид эксэйлэн ужъёсыз, кутсконысеныз пумозяз, гожтэмын азьпалзэ адӟись Самуиллэн гожъямъёсаз, Нафан пророклэн гожъямъёсаз, азьпалзэ адӟись Гадлэн гожъямъёсаз,30эксэйын пуконэзлэн вань нуналъёсыз гожтэмын, кышкасьтэм луэмез, соин асэныз, Израилен луэм учыръёс, музъем вылысь вань эксэйлыкъёсын кусыпъёс сярысь но гожтэмын.
Глава 29