Выбрать язык
Книги Ветхого Завета
Книги Нового Завета
с русским текстом2-тӥ книга
1Давидлэн пиез, Соломон, эксэй луон кужымзэ юнматӥз; Инмарез Кузё-Инмар соин огазьын вал, сое вылэ ӝутӥз.
2Вань израиль калыклы огазе люкаськыны косон сётӥз Соломон: сюрс ожгарчиосын, сю ожгарчиосын кивалтӥсьёслы, судьяослы, быдэс Израильын кивалтон ужъёсын вырисьёслы – выжыослэн йыръёссылы.3Соломон но кенеше вань люкаськем калык Гаваонысь гурезь йылэ мынӥзы, уго отын Инмарлэн сётэм люкаськыса вӧсяськон скинияез вал, сое кыр дуннее Инмарлэн ляльчиез Моисей лэсьтӥз.4Инмар ковчегез Давид Кириаф-Иаримысь вайиз аслаз дасям интыяз, Иерусалиме ковчегез возьыны скиния пуктӥз.5Нош Орлэн Урий пиезлэн Веселеил пиезлэн ыргонлэсь лэсьтэм курбон сётон ӝӧкез отчы ик, Кузё-Инмарлэн скиния азяз, кылиз, Соломон вӧсяськись калыкен ӵош со доры лыктӥзы.6Отын, Кузё-Инмар азьын, вӧсяськон скиния азьысь ыргонлэсь лэсьтэм курбон сётон ӝӧк вылын, Соломон сюрс пол тылын сутӥськись курбон сётӥз.
7Со уе Соломонлы Инмар возьматскыса шуиз: «Мар Мон тыныд мед сётом, кур».8Соломон Инмарлы шуиз: «Мынам атаелы, Давидлы, Тон туж бадӟым гажан-жаляндэ возьматӥд но монэ со интые эксэе пуктӥд.9Инмаре Кузё-Инмаре, мед быдэсмоз Тынад Давидлы мынам атаелы верам кылыд. Уго, Тон монэ музъем вылысь луо мында, трос лыдъем калыклы эксэе пуктӥд,10соин ик табере Тон мыным визьлык но тодонлык вай, мон мед быгатом та калык азе потаны, пыраны, уго кин кивалтыны быгатоз Тынад та трос лыдъем калыкеныд?»11Инмар Соломонлы шуиз: «Тынад сюлмад та луэм понна – тон аслыд ваньбур, узырлык но, данлык но, тушмонъёсыдлэсь лулзэс но ӧд куры, трос улон нуналъёс но ӧд куры, – курид аслыд визьлык но тодонлык, Мынам калыкеным кивалтыны мед быгатод шуыса, Мон тонэ соослы эксэе пуктӥ,12визьлык но тодонлык тыныд сётӥське, нош узырлык, ваньбур но данлык Мон тыныд сыӵезэ сёто, кудъёсыз тынэсьтыд азьвыл но, берло но улоно эксэйёслэн ӧй вал, уз но луы».
13Соломон Гаваонысь, гурезь йылысь, Иерусалиме вӧсяськон скиния доры вуиз, эксэй луыса быдэс Израилен кивалтыны кутскиз.14Соломон ожмаськон уробоос, вал вылын ожмаськись ожгарчиосты люказ; солэн сюрс ньыль сю ожмаськон уробоез, дас кык сюрс вал вылын ожмаськисьёсыз вал; соосты со ожмаськон уробоосты возён городъёсы интыяз, озьы ик Иерусалиме, эксэй доры.15Иерусалимысь азвесез, зарниез эксэй огшоры изэн огдунъем кариз, нош кедырпу трос луэмысь, сое улыгын будӥсь сикоморпуэн огдунъем кариз.16Соломонлы Египетысь но Куваысь валъёс вайылӥзы; Куваысь эксэй вузчиос соосты дунэн басьтылӥзы.17Египетысь ожмаськон уробоосты октыса вайылӥзы куать сю азвесь сӥклен, нош валэз – сю витьтонэн. Таӵе амалэн соос ас киынызы вуттылӥзы Хеттей кунысь эксэйёслы, арамей эксэйёслы.
Глава 1